ISAÍAS 46 - Biblia Guarani Tumpa Iñee

¹ Tumpa-raanga Bel oyeitɨ, tumpa-raanga Nebo opa oyeka. Jókuae tumpa-raanga reta opata oñeñono mɨmba ivoɨtarä, oipotagüe voɨta rami ko oñeñonota mɨmba ikangɨ vi vae reta re.

² Jókuae tumpa-raanga reta opa oyeitɨ, mbaetɨ ipuere reta oyereroasayepe, opa vi oyererajauka ɨvɨ ambuae kotɨ.

³ Peyeapɨsaka cheré, Jacob iñemuña reta, opaete Israel iñemuña jembɨregüe reta: Che ko ayangareko peré ndei pea güive voi ma, che ko povoɨ pea ramo güive,

⁴ jare jekuaeñota poangareko pendechi regua, peatï ma yave jekuaeñota ayangareko peré. Che ko poapo, jekuaeñota ko pogüɨroata, poangarekota jare pogüɨroasayepeta.

⁵ ¿Kia ndive pa pepuere chemboyovake? ¿Oime pa kia chemboyovake vae?

⁶ Amogüe reta güɨnoe oro jɨru güi ani ojäa korepoti mbaejäaka pe, javoi oyókuai metei ipoki korepoti pegua mbaravɨkɨ oyapo vae, oyókuai oyapo vaerä itumparä; javoi oyetavatɨka omboete.

⁷ Jare ovoɨ reta güɨraja iyatiɨ re, güɨraja reta oñono jenda pe, joko pe opɨta, mbaetɨ omɨi jókuae jenda güi. Yepe tëi osapúkai reta oyerure chupe, ërei mbaetɨ oyapo iyerure chupe reta, ani mbaetɨ ipuere güɨroasayepe ipɨatɨtɨ güi.

⁸ Iyoa vae reta, pemaendúa kuae re, agüɨye peyembotavɨ pe aeño, peyemongeta kavi jese;

⁹ pemaendúa oasa arakae güive voi ma vae re. Che ko jae Tumpa, mbaetɨ yé ko ïru Tumpa; mbaetɨ yé oime che rami vae.

¹⁰ Che amoërakua mbaembae oasata vae, iyɨpɨ güive voi ma, jare arakae güive voi ma amoërakua mbaembae oasata vae. Che ayemongeta vae, oyeapota ko, ayemongeta ayapo vaerä vae, ayapota ko.

¹¹ Kuaraɨ oëa kotɨ güi aenɨi metei güɨraké rami vae, matɨ güi outa metei kuimbae aiparavo vae, outa oyapo ayemongeta ayapo vaerä vae. Jae vae, ayapota ko, ayemongeta ayapo vaerä vae, ambopota ko.

¹² Peyeapɨsaka cheré, ipɨatäta vae reta, pe, mbaetɨ perovia yereroasayepe outa ma ko vae:

¹³ Che, aruta yereroasayepe; aruta ete ma, köi yae ma ou. Che ameeta yereroasayepe Sión pe, jare cheyemboete tëtaguasu Israel pe.