ISAÍAS 44 - Biblia Guarani Tumpa Iñee

YandeYaño ko jae Tumpa jaevaeño

¹ YandeYa jei: “Eyeapɨsaka Israel, Jacob iñemuña reta, cherembiokuai, cherembiparavo.

² NdeYa, ndeApoa ko che, che ko roapo, ndei rea mbove voi, che ko romborɨta. Agüɨye ekɨɨye, Jesurún, Jacob iñemuña reta, cherembiokuai, cherembiparavo,

³ echa amoëta ɨ ñuu rupi, jare ɨ̈aka reta, ɨvɨ otini vae rupi. Ameeta tekove neñemuña reta pe, cheporerekuata jese reta.

⁴ Jare okuakuaa retata, temitɨ oyemboɨugüe rami, ɨvɨra sause jee vae okuakuaa ɨ jembeɨ rupi rami.

⁵ Jayave amogüe jeita: ‘Che ko YandeYa imbae’, amogüe oñeenɨita Jacob iñemuña jee pe, amogüe oikuatiata ipo re: ‘YandeYa imbae ko che’, jare omoïruta Israel iñemuña reta jee pe jee ae.”

⁶ YandeYa, Israel iñemuña reta juvicha guasu jare jeepɨa, yandeYa Imbaepuere yae ete vae, jei: “Che ko, oikoño mai vae; mbaetɨ yé ïru Tumpa chegüi.

⁷ ¿Oime pa kia, che rami vae? Omoërakua vae jare imiari mbaembae oasata vae re vae. Oime yave emombeu cheve.

⁸ Ërei, ¡agüɨye pekɨɨye, peñemoäta ngatu! Amombeu ko peve jókuae iyɨpɨ güive voi, pe reta ko, cheregua omombeu vae. ¿Oime pa ïru Tumpa chegüi? Mbaetɨ yé ko ïru Imbaepuere yae vae; mbaetɨ aikuaa metei ave.”

Tumpa-raanga reta imboetea reta regua

⁹ Tumpa-raanga iyapoa reta, mbaeä etei ko opaete, jare chupe reta ikavi yae vae, mbaeä etei ko. Jae reta oikuaa kavi ko, jókuae tumpa-raanga reta mbaetɨ omae jare mbaetɨ yarakuaa; jáeramo imarata ko opɨta reta kuri.

¹⁰ Kia omondɨkui oyapo tumpa-raanga omboete vaerä vae, jeieiño ma ko.

¹¹ Opaete jókuae tumpa-raanga omboete vae reta imarata ko opɨta. Echa jókuae ipoki tumpa-raanga oyapo vae reta kuimbaeño ko. Opaete jae reta yogüeru ñejäa pe yave, ipɨakañɨta jare okɨɨye yae retata.

¹² Jiero pegua mbaravɨkɨ pe oparavɨkɨ vae oipɨɨ tenasa, jare jiero omboakuasɨ güire okua jese martillo pe jare oyapo mbae iä. Ipo pe oyapo jókuae mbaravɨkɨ. Ërei mbaetɨ okaru yave, yɨmbɨaɨ jare jesagüɨrɨ; mbaetɨ ɨ jou yave ipɨtu.

¹³ Ɨvɨra pegua mbaravɨkɨ pe oparavɨkɨ vae oipɨɨ tembiporu reta mbae ojäa pɨpe vae, jare ojäa kavi opaete mbaembae oyapota vae, omokañɨmaa lapi pe jare omboɨpɨ oparavɨkɨ; oyapo metei kuimbae iä, ombokavi kuimbae rami, javoi oñono o pe.

¹⁴ Amogüe oyasɨa ɨ̈vɨrare ani ɨvɨra ciprés jee vae, kaa pe okuakuaa vae; ani amogüe oñotɨ ɨvɨra pino jee vae, jare ama ombokuakuaa chupe.

¹⁵ Javoi joko güi güɨraja kuimbae reta iyepearä, güɨraja jaɨgüe oyepee pɨpe vaerä; amogüe güɨraja ihorno oatapɨ vaerä, omboyɨ vaerä mbɨyape; güɨraja vi oyapo vaerä itumparä, javoi oyetavatɨka reta omboete.

¹⁶ Amogüe oyatapɨ pɨpe, omboyɨ soo pɨpe, jou jókuae oyeapegüe jare ipɨakatu opɨta. Oyepee pɨpe yave jei: “¡Ikavi yae tata, cheraku katu ma aï!”

¹⁷ Jare jókuae ɨvɨra jembɨregüe oyapo tumpa-raangarä, javoi oyetavatɨka jóvai omboete vaerä, oyerure chupe körai: “¡Chereepɨ, nde ko chetumpa!”

¹⁸ Jókuae nunga reta mbaetɨ mbae oikuaa, mbaetɨ iyarakuaa; echa jesa oñeova oï rami mbaetɨ ipuere mbae oecha, jaeramiño vi ipɨa mbaetɨ ipuere mbae oikuaa.

¹⁹ Mbaetɨ oyemongeta reta, oata arakuaa chupe reta jei vaerä: “¡Kuae amboete aï vae, ɨvɨraño ko! Echa, kuae ɨvɨra jaɨgüe pe ayatapɨ, itätapɨigüe re amboyɨ mbɨyape jare soo jau vaerä; jare jókuae ɨvɨra jembɨregüe güi ayapo kuae mbae ikavimbae yae vae.”

²⁰ Tanimbuño jou vae rami ko jókuae reta. Ipɨa pe oyembotavɨuka reta. Jókuae nunga ngaraa ipuere oasayepe, echa mbaetɨ oparandu reta iyeupe: “¿Kuae anoi chepo pe vae añetete ra ko?”

YandeYa iñɨ̈ro jare güɨroasayepe Israel iñemuña reta

²¹ “Israel, Jacob iñemuña reta, agüɨye neakañɨ, nde ko cherembiokuai, nde ko cherembiokuai, echa che ko roapo. Israel, agüɨye neakañɨ chegüi.

²² Opa amboai ndepɨapochɨ reve reyavɨgüe amapɨtu opa okañɨ rami, jare ɨ̈vɨti rami opa amokañɨ ndeyoa reta. Eyerova ye chekotɨ, echa che royora.”

²³ ¡Ara, etairari reyerovia reve yandeYa oyapogüe re! ¡Ɨvɨroso guasu, esapúkai reyerovia reve! ¡Ɨvɨtɨ reta jare kaa reta opaete ɨvɨra reta pɨpegua ndive, pesapúkai peyerovia reve! Echa yandeYa oyora Israel, Jacob iñemuña reta, jare Israel iñemuña rupi oyemboeteuka yaeta.

²⁴ Körai jei yandeYa, ndeReepɨ vae, ndei rea mbove voi ma ndeapo vae: “Che peYa, jae ko opaete mbaembae iyapoa, che ko ayapo ara jare ɨvɨ, mbaetɨ kia chemborɨ reve.

²⁵ Mbaetɨ amaeño oyembopo vaerä maratuta vae imombeúa reta omombeu vae, amombokere susere oimeta vae imombeúa reta. Yarakuaa katu vae reta iñee amboyopɨndekua oyougüi, opaete iyarakuaa katu arokomegua chugüi reta.

²⁶ Ërei ayapo oyembopo vaerä cherembiokuai reta omombeu vae, jare ayapo oë kavi vaerä cheremimondo reta oyemongeta oyapo vaerä vae. Che amoërakua Jerusalén oñemopüa pɨau yeta vae, oime yeta ipo kuri vae, jare ɨvɨ Judá pegua tëta reta opa yeta oñemopüa pɨau. Che amopüa yeta, opa oyemboai oï vae.

²⁷ Che chepuere opa omondɨpa ɨguasu jare ɨ̈aka reta.

²⁸ Che jae mburuvicha guasu Ciro pe: ‘Nde ko jae chevecha iyangarekoa rami, reyapota opaete mbaembae royókuai vae’; jare Jerusalén pe jae: ‘Nde reñemopüa pɨau yeta ko’; jare tupao pe jae: ‘Oñeñonota ko ndeguapɨka.’ ”