ISAÍAS 43 - Biblia Guarani Tumpa Iñee

YandeYaño ko Oporoepɨ vae

¹ Añave, Israel, Jacob iñemuña reta, yandeYa, ndeapoa jei ndeve körai: “Agüɨye ekɨɨye, che ko roepɨ; che ko reenɨi, chembae ko nde.

² Ɨ reta reasa yave, che aïta nde ndive, ɨ̈aka reta reasa yave, ngaraa ɨ ndereraja; tata reasa yave, ngaraa rékai, ngaraa ave nderendɨ.

³ Echa, che ndeYa Tumpa ndereroasayepe vae ko, Tumpa Iyoambae Israel pegua. Che ko rogua; amee ko nderekovia pe Egipto, Etiopía jare Sabá.

⁴ Echa ndereepɨ yae ko amae nderé, che roaɨu yae ko. Rogüɨnoi vaerä che ndive jare rogüɨroasayepe vaerä, amee ko nderekovia pe kuimbae reta jare tëtaguasu reta.

⁵ Agüɨye ekɨɨye, echa oime ko aï nde ndive, kuaraɨ oëa kotɨ güi jare kuaraɨ oikea kotɨ güi aru yeta neñemuña reta.

⁶ Ɨvɨtuguasu kotɨgua reta pe jaeta: ‘Opa ye embou’, jare arayevɨ kotɨgua reta pe jaeta: ‘Agüɨye emombɨta. Eru mombɨrɨ ɨvɨ iyapɨ kotɨ güi cheraɨ reta jare cherayɨ reta,

⁷ opaete jókuae cheree güɨnoi vae reta, jókuae ayapo jupi reta ayemboeteuka vaerä vae.’

⁸ Pembou tëta chembae vae, oime tëi jesa, ërei jesambae rami, oime tëi iyapɨsa, ërei iyapɨsambae rami.

⁹ Toyemboatɨ opaete tëtaguasu reta jare opaete tëta reta. ¿Kia pa chugüi reta arakae omombeu kuae mbaembae oasata vae, ani arakae mbaembae oasagüe reta ndei oasa yave voi ma omoërakua reta vae? Oime kia oecha jae reta jeigüe oyembopo ko vae yave, tou jare timiari kuae pe añetete ko vae.”

¹⁰ YandeYa jei: “Pe reta ko jae pemombeu cheregua vae, cherembiokuai che aiparavo vae, chekuaa vaerä, perovia vaerä cheré, jare chekuaa vaerä kia ko che vae. Mbaetɨ yé ïru tumpa tenonde voi ma oiko chegüi vae, jare cheraɨkue rupi ngaraai vi oime ïru.

¹¹ Che ko peYa, mbaetɨ yé ko oime chegüi ïru ipuere oporoepɨ vae.”

¹² YandeYa jei: “Che ko amombeu, che ko amoërakua; che ko poepɨ; tumpa ambuaeä ko oyapo, pe reta ko jae pemombeu cheregua vae.

¹³ Che ko Tumpa oikoño mai vae. Mbaetɨ kia ipuere chemboavai. Mbaetɨ kia ipuere omboai che ayapogüe.”

¹⁴ YandeYa, Tumpa Iyoambae Israel pegua, jae peReepɨ vae jei, körai: “Pogüɨroasayepe vaerä amondota jeta vae, oporepeña vaerä Babilonia re, oipea reta vaerä öke reta, jare opaete jókuae Caldeaɨgua reta, ibarco re oyerovia reta vae otekuaraita.

¹⁵ Che ko peYa Iyoambae, Israel iyapoa, peRuvicha guasu.”

¹⁶ Jökorai jei yandeYa oipea tape ɨguasu mbɨte rupi vae, ɨ yavaete vae rupi omboape vae;

¹⁷ omondo jeta vae sundaro reta peraɨkue, ikavayu reve reve jare ikäretou ñeraro pegua reve reve vae. Ërei opa ogüɨapi reta, mbaetɨ ye ipuere opüa reta; opa ogüe reta, mechero imecha opa ókai rami.

¹⁸ YandeYa jei körai tëta imbae vae reta pe: “Agüɨye mo pemaendúa mbaembae oasagüe re, agüɨye mo peyemongeta arakae ma oasagüe re,

¹⁹ mase, ko ayapota mbae ipɨau vae, jare peechata añave voi. Aipea yeta tape ñuu rupi, jare ɨvɨ otini vae rupi ɨ̈aka reta.

²⁰ Chemboeteta mbaeporou kaa rupigua reta, aguarayaɨmba reta jare yandu raɨ reta, echa amoëta ɨ ñuu rupi, jare ɨvɨ otini vae rupi aipeata ɨ̈aka reta, oɨu vaerä tëta chembae vae, cherembiparavo,

²¹ ayapo ko kuae tëta chembaerä, omoërakua vaerä cheyemboetea.

²² Ërei pe, Jacob iñemuña reta, mbaetɨ chereenɨi chemboete vaerä, pekuérai chegüi.

²³ Mbaetɨ peru cheve mɨmba oyeyukagüe opaetei oyeapɨ vaerä vae, mbaetɨ chemboete mɨmba oyeyukagüe pe ave. Che mbaetɨ ko pombogüérai aeka peve mbota vae rupi, mbaetɨ vi pomoambeko pemee vaerä cheve ikäti kavi vae incienso.

²⁴ Mbaetɨ ko pegua cheve mbae ikäti kavi vae reta, peru vaerä cheve mbotarä, mbaetɨ ave vi peru chembopɨakatu vaerä mɨmba ikɨragüe pe. Jaeño chembogüérai peyoa reta pe, chembokangɨ pereko kavimbae reta pe.

²⁵ Ërei che peTumpa, ayeaɨu jeko pegua amboai peyoa reta, ngaraa ye ma chemaendúa peyoa reta re.

²⁶ Ërei oime yave mbae pere vaerä chekotɨ, yayoaka. Pemoë peñee, yaecha mbaetɨ oñeväe teko peré.

²⁷ Peñemuñagüe tenondegua ete iyoa, pemboe vae reta ombaeyavɨ chekotɨ,

²⁸ peruvicha reta omongɨa chero mbaemboetea; jáeramo, tëta Israel, Jacob iñemuña reta amaeño opa okañɨtei jare oyeyoyaiuka.”