ISAÍAS 40 - Biblia Guarani Tumpa Iñee

YandeYa ombopɨakatu Sión

¹ PeTumpa jei: “Pemoäta ngatu, pemoäta ngatu, tëta chembae;

² pemiari kavi mboroaɨu ndive Jerusalén ndive; pesapúkai reve pere chupe, kërai oiporara vae iyapɨta ma, iyoa re cheɨ̈ro ma chupe; echa aiporarauka yae ma chupe reta, opaete iyoa reta re.”

³ Ñeeäta oyeendu ñuu pe körai: “Peñono kavi tape yandeYa pe; pembosɨmbi tape ñaneTumpa pe, tapembaea rupi.

⁴ Opaete ɨvɨtɨ päu reta toyemboyovake, jare opaete ɨvɨtɨ guasu jare ɨvɨtɨ toyembosɨmbi; opaete ɨ̈vɨa toyembosɨmbi, jare ipe kavimbae toyemboipe.

⁵ YandeYa omboyekuaata iyemboetea, jare opaete kuimbae reta oecha päveta. Echa yandeYa etei ko jei.”

⁶ Ñeeäta oyeendu vae jei: “Esapúkai.” Jare che aparandu chupe: “¿Mbae pa jaeta asapúkai?” Esapúkai körai: “¡Opaete kuimbae reta ñana rami ko, opaete iyemboetea mbaepotɨ ñana rupigua rami ko!

⁷ Ñana yɨpi jare mbaepotɨ ipiru, yandeYa iɨvɨtu oipeyu yave. Añetete, ñana ramiño ko opaete vae reta.

⁸ Ñana yɨpi, mbaepotɨ ipiru; ërei ngatu ñaneTumpa iñee oiko jekuae avei.”

⁹ Eyeupi ɨvɨtɨ ɨvate vae re, esapúkai täta emombeu ñee kavi reru Sión peguarä vae, ñee kavi reru Jerusalén peguarä vae, esapúkai rekɨɨyembae reve, ere Judá pegua tëta guasu reta pe: “¡Ko oï peTumpa!”

¹⁰ Ko ou yandeYa Tumpa mbaepuere ndive, oñonota opaete vae imbaepuere igüɨ pe. Güeru jupíe tëta imbae vae reta, opa güire opɨ̈ro ye.

¹¹ Ou vecha iyangarekoa oyangareko ivecha re rami, ovoɨ vecha kuimbae taɨrusu vae reta, oiküava güɨraja ipɨtía re, jare oyangareko kavi imembɨmii vae reta re.

Tumpa Israel pegua imboyovakeambae vae

¹² ¿Kia pa ojäa ipo mbɨte pe ɨguasu, ani ojäa ipoäka pe ara reta, jare mboapɨ ipoäka pe omboatɨ ɨvɨkúi ɨvɨ pegua, jare ojäa mbaejäaka pe ɨvɨtɨ guasu reta jare ɨvɨtɨ reta?

¹³ ¿Kia pa omboe yandeYa iEspíritu, ani omboarakuaa omboe reve?

¹⁴ ¿Kia pe pa oiporu yemboarakuaa, iyarakuaa katu yae vaerä? ¿Kia pa omboe oporojäa vaerä jupi rupi, ani omboe arakuaa katu re, ani oechauka chupe tape arakuaa katu regua?

¹⁵ Chupegua, tëtaguasu reta, ɨ otɨkɨ jɨru güi vae ramiño ko, ɨvɨkúi michi yae vae mbaejäaka pe oï rami, ɨvɨkúi ramiño omboaita tëta reta ɨguasu ipäu rupigua reta.

¹⁶ Ɨvɨtɨ Líbano re oime mɨmba reta vae, ngaraa oupitɨ oyeyuka opaetei oyeapɨ oñemee vaerä Tumpa pe, ani yepea joko pegua ave ngaraa oupitɨ oyeapɨ vaerä.

¹⁷ Chupeguarä mbaeä etei ko opaete tëtaguasu reta, mbaeä etei ko omae jese reta.

¹⁸ ¿Kia ndive pa pepuere pemboyovake Tumpa? ¿Mbae iä pa peyapota Tumpa iärä?

¹⁹ Ipoki ombaapo vae omondɨkui, mbae iä oyapo vaerä, oro pe oikatu oparavɨkɨ vae oñova oro pe, oyapo karena raɨ korepoti pegua chupe.

²⁰ Paravete vae oeka ɨvɨra täta vae, ɨvɨra mbaetɨta ikúi vae, jare oeka kia oikatu mbae iä oyapo vae, oyapo vaerä chupe mbae iä ipöra kavi vae, täta kavi oï vae.

²¹ ¿Mbaetɨ pa peikuaa? ¿Mbaetɨi pa peendu? ¿Mbaetɨi pa kia omombeu peve? ¿Mbaetɨ pa kia pemboe jese arakae güive?

²² Tumpa oikoa, güɨnoi ko ara re, joko güi oecha ɨvɨ pegua reta tuku ramiño ko vae. Jae oipɨso ara, asoya oyepɨso rami, jae omoata ara, küaraɨa guakapi pegua oñemoata rami.

²³ Jae omomichi kuimbae imbaepuere yae vae reta, jare ɨvɨ pegua mburuvicha reta opa omokañɨtei.

²⁴ Jae reta ko temitɨ ipɨau vae rami, jaeramo etei japo oyepota oï vae rami. Tumpa oipeyu yave, jaema voi opa ipiru reta, kusumirou ou yave, opa güɨraja kapii rami.

²⁵ Tumpa Iyoambae oparandu: “¿Kia ndive pa chemboyovaketa pe reta? ¿Kia pa ipuere chemboyovake?”

²⁶ Perovaɨva pemae ara kotɨ: ¿Kia pa oyapo opaete jókuae mbaembae reta? Jae ko oipapa jare oñono jenda pe kavi kavi, ombojee metei ñavo, ngaraa metei ave oata. Jökorai ko imbaepuere yae jare ipɨ̈rata yae.

²⁷ ¿Israel, Jacob iñemuña reta maera pa rere: “CheYa mbaetɨ oikuaa kërai ko aiko vae, jare cheTumpa mbaetɨ imaendúa cheré”?

²⁸ ¿Mbaetɨ pa reikuaa, mbaetɨ pa reendu yandeYa jae ko Tumpa oiko avei vae, jae ko oyapo opaete ɨvɨ vae? Mbaetɨ ko ipɨtu, mbaetɨi vi ikangɨ, jare iyarakuaa katu mbaetɨ kia ipuere omboyovake.

²⁹ Jae omomɨ̈rata ikangɨ vae, jare omoïru mɨ̈rata, mbaetɨ etei güɨnoi vae pe.

³⁰ Kunumi reta ikuérai jare ikangɨ, jare taɨrusu vae reta ipɨtu jare ogüɨapi;

³¹ ërei yandeYa reño oyeko vae reta ipɨ̈rata pɨau aveita; oveve retata güɨraké rami; osɨi retata jare ngaraa ikangɨ, oguata retata jare ngaraa ikangɨ reta.