ISAÍAS 39 - Biblia Guarani Tumpa Iñee

Ezequías omboresive Babilonia güi yogüerugüe

¹ Jókuae ara rupi Merodac-baladán mburuvicha guasu Babilonia pegua Baladán taɨ, ombou tupapire jare mbota Ezequías pe; echa oikuaa imbaerasɨ, ërei okuera ye ma vae.

² Jare Ezequías oyerovia yae jókuae tupapire jerúa reta ndive, jare oechauka chupe reta imbaembae jepɨ vae oñeñovatúa, ikorepoti, ioro, ikäti kavi vae, asaite oyeambae vae, opaete tembiporu ñeraro pegua jare opaete mbaembae joko pe oime vae. Mbaetɨ etei mbae jo pe jare opaete jókuae iɨvɨ pe oechaukambae chupe reta vae.

³ Jayave ñeemombeúa Isaías ojo mburuvicha guasu Ezequías pɨri, jare oparandu chupe: —¿Ketɨ güi pa yogüeru jókuae kuimbae reta, jare mbae pa jei reta ndeve? Ezequías jei: —Matɨ güi ko yogüeru reta; Babilonia kotɨ güi.

⁴ Jare Isaías oparandu ye chupe: —¿Mbae pa oecha reta, kuae ndero pegua? Ezequías jei: —Opaetei mbaembae oecha reta. Mbaetɨ etei mbae jembɨre mbae oñeñovatúa pe aechaukambae chupe reta vae.

⁵ Jayave Isaías jei mburuvicha Ezequías pe: —Eendu yandeYa Imbaepuere yae ete vae iñee, jei körai:

⁶ “Metei ara, opaeteita oyereraja Babilonia kotɨ kuae ndero pe oimegüe, neñemuñagüe reta omboatɨgüe. Mbaetɨ eteita mbae jembɨre. Che ndeYa ko jae körai.

⁷ Neñemuña reta güi ave güɨraja retata Babilonia kotɨ, oapiao retata yogüɨreko vaerä tembiokuairä, mburuvicha guasu jo pe.”

⁸ Jayave Ezequías jei Isaías pe: —Jókuae ñee reru cheve yandeYa güi vae, ikavi ko. Jare jei ye: —Ërei aikove aiko ramboeve oimeñota mbɨakatu jare oiko pɨagüive vae.