ISAÍAS 34 - Biblia Guarani Tumpa Iñee

YandeYa iyarasɨ tëtaguasu reta kotɨ

¹ Tëtaguasu reta, peyu peyeapɨsaka, opaete vae reta, peyeapɨsaka. Toyeapɨsaka ɨvɨ jare opaete pɨpegua reta, opaete oñemuña pɨpe vae reta.

² Echa yandeYa iyarasɨ oï opaete tëtaguasu reta kotɨ, jare opaete sundaro reta kotɨ, opata omboai, opata omee mano pe.

³ Jare jókuae tëogüe reta opaiñota oyemombo, iine yaeta otimbo, jare tugüɨ osɨrɨta ɨ rami ɨvɨtɨ rupi.

⁴ Jare opaete ara ipo reta, opata oyemboai, ara opata yapúa tupapire rami, jare yasɨtata reta opata oa, uva joogüe osururu rami ani ɨva joogüe osururu rami.

⁵ YandeYa ikɨsepuku oyekuaata ara re, oata Edom re, jókuae tëta oï yandeYa iyepopeyu pe vae.

⁶ YandeYa ikɨsepuku tugüɨ katuai jare mbaekɨra katuai oï, vecha kuimbae taɨrusu vae jare kavara kuimbae jugüɨgüe pe rami, vecha kuimbae ipɨ̈rɨkɨti ikɨragüe pe rami, echa yandeYa oporoyukata tëta guasu Bosra pe, jare jeta oyukata ɨvɨ Edom pe.

⁷ Omano retata mɨmba búfalo jee vae rami, jare toro reta jare toro taɨrusu vae reta rami, jare iɨvɨ ñakɨ̈ta tugüɨ pe, jare ɨvɨkúi oñemonata mbaekɨra pe.

⁸ Echa yandeYa iyepɨ iara ko, ou oväe año, oyepɨ vaerä Sión pe.

⁹ Ɨ̈aka raɨ reta Edom pegua opata oyepoepɨ ipomo vaerä, iɨvɨ opata oyepoepɨ azufrerä, jare iɨvɨ jendɨta mbae ipomo vae ókai katu rami.

¹⁰ Ngaraa ogüe ara pe ani pɨ̈tu yave ave; jätatita jekuae avei rupi. Oyemombota oyeeya jekuae avei rupi; ngaraa ye ma kia oasa jokoropi vae.

¹¹ Güɨratï jare mɨmba küi jee vae oñemoëtata joko pe, chucha jare suinda oyapota jaitɨrä joko pe. YandeYa omboai kuae tëtaguasu, oeyata ñuurä jare ɨvɨ ipombae vaerä.

¹² Ngaraa ye ma oime güɨnoi mburuvicha guasu, opaeteita juvicha reta okañɨtei.

¹³ Jogüe reta pe oñemuñata ñurati, jaenunga vi jo jëguambae vae rupi. Aguarayaɨmba reta oñemoëtata jokoropi jare yandu reta.

¹⁴ Mbarakaya reta oñemoëtata jokoropi aguarayaɨmba reta ndive, kavara ñana rupigua oñoenɨita jokoropi, jae ramiño vi suinda oñemoëtata jokoropi; jokoropi oputuuta.

¹⁵ Jokoropi surumbukuku oyembojaitɨta, omboata jare omboyata imembɨ reta, jare omboatɨta oyangareko vaerä jese reta. Jare joko pe oyomboatɨta ururutï reta jembireko reve reve.

¹⁶ Pemongeta yandeYa iñee reta oyekuatía oï vae, emongeta, oime ra oata mbae nunga mɨmba; mbaetɨ metei pe ave oata iñeïrurä, echa yandeYa ko jei jökorai, iEspíritu etei ko opata omboatɨ.

¹⁷ Jae etei ko opa omboyao yao chupe reta jendarä, omee chupe reta kia pe yogüɨreko vaerä, joko pe yogüɨreko avei retata, jekuae avei rupi.