ISAÍAS 32 - Biblia Guarani Tumpa Iñee

Mburuvicha guasu jupi vae regua

¹ Mase, oimeta metei mburuvicha guasu sɨmbi rupi kavi oporookuai vae, jare iyɨvɨrigua mburuvicha reta jupi rupi kavi oporookuaita vi.

² Jókuae mburuvicha guasu oïta ɨvɨtuai güi ñañemi jese vae rami, ani okɨrai vae güi ñañemi pɨpe vae rami, ani ɨvɨ otinía pe oime ɨ̈aka raɨ rupi ɨ vae rami, ani ɨ̈vavira iküaraɨa araku yaea pe oï vae rami.

³ Jayave ikɨ̈reɨ oecha vae reta, ipuereta oecha, jare ikɨ̈reɨ oendu vae reta, ipuereta oendu;

⁴ jare iyarakuaambae reta, iyarakuaata, jare iñee ngatumbae reta, iñee ngatuta.

⁵ Ngaraa ye ma omboete reta kuimbae jeko kavimbae vae, jeko kavi vae rami, ngaraa ye ma omboete reta kuimbae jeko pɨ̈chɨi vae, imboetea vae rami.

⁶ Echa kuimbae jeko kavimbae, imiarita ko ikavimbae re, oyemongeta ipɨa pe, oyapo vaerä ikavimbae, ani jei ikavimbae vae yandeYa kotɨ; yɨmbɨaɨ vae güi opɨ̈ro jembíu, ani iɨuve vae güi opɨ̈ro ɨ.

⁷ Jeko kavimbae oeka kërai oyapo vaerä ikavimbae, ikaviä oyemongeta ipɨa pe; apu rupi oyapo ikavimbae vae paravete vae kotɨ jare ñeapo rupi oeka tëi oime vaerä jupi rupi ñeñono kavi chupe vae kotɨ.

⁸ Ërei ngatu ipɨa ikavi vae, ikavi oyemongeta, jare jókuae iyemongeta kavi re oñemomɨ̈rata.

Kuña reta Jerusalén pegua kotɨ

⁹ Pe, kuña reta, mbaetɨ peyemoambeko mbae re vae, peyeapɨsaka kuae jaeta vae re. Pe, kuña reta, peiko pɨagüive vae reta, peyeapɨsaka ñee jaeta vae re.

¹⁰ Peiko pɨagüive añave, ërei metei año jaɨkue rupi pekɨɨyeta, echa peechata uva oyepoogüe opa, jare mbaetɨ yeta mbaarɨvo.

¹¹ Pe, peiko pɨagüive vae reta, perɨrɨi pekɨɨye güi, jare pepɨa kɨɨye, pemboi jókuae peremimonde reta, jare peyemonde temimonde mbɨatɨtɨ pegua pe.

¹² Peipete pepɨtía pepɨatɨtɨ güi, pepɨatɨtɨ jókuae kó ikavigüe re, jare uvarupa ikavigüe re.

¹³ Chembae vae reta iɨvɨ pe oñemuñata ñurati jare ñana, opaete jókuae o reta yerovia katu oimea rupi ave, tëta guasu yerovia katu pegua pe.

¹⁴ Mburuvicha jo kïrii ngatuta opɨta; tëta guasu jeta tëi ipo vae ipombae opɨtata; maeka ɨvate vae reta jare ñepɨ̈roka reta oyeeyata jekuae avei pegua; joko pe oñemoëtata mburika ñana rupigua reta, jare mɨmba reta ikaruarä opɨtata.

¹⁵ Ërei yandeYa iEspíritu outa yanderé ɨvate güi, jayave ɨvɨ ipombae, ikavi yeta oñemaetɨ pɨpe vaerä, jare ɨvɨ kavi jeiete yaeta ikavi.

¹⁶ Sɨmbi vae jare jupi vae oimeta opaete kuae ɨvɨ pe.

¹⁷ Jupi vae omboyekuaata, mbɨakatu, mbutuu jare yerovia katu jekuae avei pegua.

¹⁸ Jare tëta chembae vae oiko pɨagüiveta, jëguambaea pe oikota, jare oputuuta,

¹⁹ yepe tëi amandau opa omboai kaa reta, jare tëta guasu opa oyemboai,

²⁰ ërei pe reta peyekou aveita, oime aveita pemoäkɨ vaerä peremitɨ reta, jare pemburika jare peguaka reta jembíu katu aveita.