ISAÍAS 31 - Biblia Guarani Tumpa Iñee

Egiptoɨgua reta Tumpaä ko

¹ ¡Paravete, opa yogüɨraja Egipto kotɨ oeka yemborɨ vae reta, kavayu reta re oyerovia vae reta, oyeko reta käretou jeta ko vae re, jare kavayu regua reta, echa jëia yae reta, jare mbaetɨ omae reta Iyoambae Israel pegua re, mbaetɨ oeka reta yandeYa!

² Ërei jae iyarakuaa vae ko jare oikatu güeru vaerä susere, jae jei yave mbae, mbaetɨ oipoepɨ. Oñemopüata jeko ikavimbae vae reta kotɨ, iyoa vae reta omborɨ vae reta kotɨ.

³ Egiptoɨgua reta kuimbaeño ko, Tumpaä ko; ikavayu reta, kavayu tumpaä ko. Jayave yandeYa omopüa ipo oinupa reta vaerä yave, opata ko ñamɨri oporomborɨ vae jare oyemborɨuka vae vi, opaete voita omano reta.

⁴ YandeYa jei cheve körai: “Yaguapope ani yaguapope raɨ oñee jembia iárambo vae mbaetɨ okɨɨye, yepe tëi vecha iyangarekoa reta oyomboatɨ oiämondo vaerä isapúkai pe, ngaraa oñeiämondouka chupe reta, jökoraita ko yandeYa Imbaepuere yae ete vae ou oepɨ tëta imbae vae ɨvɨtɨ Sión re.

⁵ Güɨra oveve jaitɨ iárambo rupi oyangareko vaerä, jökoraita yandeYa Imbaepuere yae ete vae oyangareko Jerusalén re, oñovatuta, güɨroasayepeta, oepɨta, oyorata.”

⁶ Israel iñemuña reta, peyerova ye jókuae peyembopɨapochɨ yae ikotɨ vae kotɨ.

⁷ Echa, opaete pe reta metei ara pemombo petumpa-raanga reta korepoti pegua ani oro pegua, peyapo peyeupe vae jare peyemboyoa pɨpe vae yave,

⁸ Asiria ñamɨrita ñeraro pe, ërei kuimbae potaä omoamɨri. Otekuaraita ñeraro güi, jare taɨrusu vae reta ñeraro regua opata oyepɨɨ tembipɨɨrä;

⁹ jare okɨɨye güi opata oë otekuarai oñemía güi, jare sundaro ruvicha reta opata omombo oeya ibandera. Jökorai jei yandeYa, jae oime güɨnoi Sión pe, Jerusalén pe tata.