ISAÍAS 3 - Biblia Guarani Tumpa Iñee

YandeYa ojäa Judá jare Jerusalén

¹ ¡Mase! YandeYa Imbaepuere yae ete vae opɨ̈rota Jerusalén güi jare Judá güi opaete mbaembae jerúa, opaete tembíu jare ɨ,

² jëia vae jare ñeraro regua, oporojäa vae, ñeemombeúa, maratuta vae imombeuaraanga, tenondegua,

³ sundaro ruvicha, kuimbae imboetea yae vae, oporomboarakuaa vae, ipaye vae jare ñee regua;

⁴ jare oñonota kunumi reta petenondeguarä, michia reta ñogüɨnoita peruvicharä.

⁵ Jare teko mbaetɨta ikavi, metei ñavo oñemopüata jo iyɨpɨ pegua re. Taɨrusu vae reta oñemopüata ndechi reta re, jare paravete vae reta oñemopüata oikokatu vae reta re.

⁶ Amogüe oipɨɨta jëtara jare jeita chupe: “Nde oime vɨteriño nderemimonde; eiko oreruvicharä, ndepo pe toï opaete kuae oikomegua oï vae.”

⁷ Jare jókuae ïru jeita Tumpa jee re: “Mbaetɨta chepuere, mbaetɨ chero pe tembíu ani temimonde yepe. Agüɨye cheñono mburuvicharä kuae tëta pe.”

⁸ Echa Jerusalén opa oyemboai oï, Judá opa okañɨtei, echa joko pe jei reta jare oyapo reta ikavimbae yandeYa kotɨ, mbaetɨ omboete reta jae iyemboetea, omboarasɨuka vaerä.

⁹ Ikañɨmaa reta; echa Sodoma rami omoërakua reta iyoa, mbaetɨ oikuaku reta. ¡Paravete! Jae reta aeño oyapo ñogüɨnoi iyeupe ikavimbae oiporara vaerä.

¹⁰ Ere jupi vae pe, ojo kavita ko, echa oyekouta jembiapo re.

¹¹ ¡Paravete iyoa vae! Ngaraa ojo kavi, echa iyoa reta oï rupi jekoviata chupe.

¹² Tëta chembae vae pe oiporarauka reta vae, kunumi retaño ko; jare kuña reta ko ñogüɨnoi mburuvicharä jese. Tëta chembae vae, nderuvicha reta ndembotavɨ, ndereroata ïkotɨa rupi.

¹³ YandeYa oporojäa vaerä ma oï, ojäata tëta imbae vae.

¹⁴ YandeYa outa ojäa tëta imbae vae itenondegua jare juvicha reta: “Pe reta opa pemokañɨtei cheuvarupa; paravete vae reta güi peñomigüe oime penoi pero pe.

¹⁵ ¿Maera pa peyuvanga tëta chembae re? ¿Maera pa peyuvanga mbatee paravete vae reta re?” Jei yandeYa Tumpa Imbaepuere yae ete vae.

Morojäa kuña reta Sión pegua kotɨ

¹⁶ YandeYa jei ye: “Kuña reta Sión pegua, iyemboete iyé vae reta, iñäka oupi avei oguata vae reta, jesäɨ mbokere reve, opɨ̈ro pɨi pɨi oguata vae reta, jare omochinini ipɨ imopöraka oguata reta yave;

¹⁷ jáeramo, opata ambosururuka ia chugüi reta äka mbaerasɨ pe, jare iñäka raambae opɨta retata.”

¹⁸ Jókuae ara, yandeYa opata omokañɨ kuña ipɨɨru imopöraa reta, äka-regua reta, mboɨ reta imopöraa,

¹⁹ mboɨ reta, namicha reta, yɨva regua reta,

²⁰ äka-ɨru reta, tɨmaka imopöraa reta, apɨkuaa reta, ikäti kavi vae jɨru reta, mboɨ reta oyepeyugüe,

²¹ moäka-vera rami vae äpɨgua imopöraa reta,

²² temimonde ikavigüe reta, ñeapevaka reta, äka-soya reta jare mbaerɨru reta,

²³ epeo reta, temimonderä vae reta ikavigüe, äka-ɨru jare ñeapevaka raɨ reta,

²⁴ mbae ikäti kavi vae reta, ikäti äragüe, iine retata; kuakuaa jekovia pe, oimeta tɨmasaño; iñäkarachi kavi vae jekovia pe, mbaetɨta iñäka raa reta; jemimonde kavi jekovia pe, oimeta temimonde mbɨatɨtɨ peguaño; jova pöra jekovia pe, okaigüe ramita jova re.

²⁵ Peraɨe reta opata omano ñeraro pe, jare peraɨe ñeraro regua reta, omanota ñeraroa pe.

²⁶ Tëta pegua reta oyaeota, jare omondeta temimonde mbɨatɨtɨ pegua, jare ipombae opɨtata.