ISAÍAS 29 - Biblia Guarani Tumpa Iñee

Ariel jare jovaicho reta

¹ ¡Paravete, tëta Ariel, David oikose pɨpe vae! Peroaño añoi peyapo jókuae pearete reta.

² Ërei aruta chupe mbaesusere, jäseta jare oyaeota, jare jókuae tëta guasu oïta cheve Arielrä.

³ Aruta chesundaro reta opa neova, roñovata teyupa pe, jare amopüata cheyeopiakarä ndeɨ́vɨri.

⁴ Jayave reñemomichiukata, reyeitɨukata ɨvɨ re, joko güi remoëta neñee; jókuae neñee oyeenduta mbae iñee rami, jäve yaeta oyeendu neñee.

^5-6 Ërei güɨramoiño, outa yandeYa Imbaepuere yae ete vae oiporarauka vaerä nderovaicho reta pe ara rɨapu rupi, ɨvɨkana rupi, mbae täta jɨapu vae rupi, ama ɨvɨtuai reve jare kusumirou guasu rupi, jare tata yavaetegüe rupi. Jare jókuae nderovaicho jeta yae vae opɨtata ɨvɨkúi rami, jare jëia yae vae reta opɨtata ɨtɨ rami.

⁷ Pɨ̈tu yave yapaɨu vae ramiñota oasa, opaete jókuae jeta tëtaguasu reta oñeraro Ariel ndive vae, opaete oñemopüa ikotɨ vae reta ndive ani oiporarauka chupe reta vae ndive.

⁸ Pɨ̈tu yave yɨmbɨaɨ reve oke vae opaɨu ramita, ike pe okaru, ërei opa yave jekuaeñoi ichuri ipoä, ani iɨuve yae reve oke vae opaɨu ramita, ike pe oɨu, ërei opa yave jekuaeñoi iɨuve jare otini iyaseo, jökoraita ko oasa opaete jókuae jeta tëtaguasu reta oñeraro Sión ndive vae.

Israel jesambae vae rami

⁹ ¡Peiko peikuaambae, jayave! ¡Peiko jesambae rami! ¡Peresagüɨrɨ, osavaɨpogüe rami, yepe tëi mbaetɨ peu mbae oporombosavaɨpo vae!

¹⁰ Echa yandeYa ombou peve topeɨ tätagüe, ñeemombeúa reta opa oesaöva, maratuta vae imombeúa reta opa oesaöva.

¹¹ Jare opaete mbaembae oyeechauka tëi Tumpa güi peve vae, peveguarä metei tembikuatía oyeokenda oï vae ramita ko. Kia omee yave ïru vae pe omongeta vaerä, jei chupe: “Emongeta kuae.” Jae jei: “Mbaetɨ chepuere, echa oyeokenda oï.”

¹² Ani oñemee yave mbaetɨ oikuaa ambaemongeta vae pe, amongeta vaerä, jae jei: “Mbaetɨ aikuaa ombaemongeta.”

¹³ Jayave yandeYa jei: “Echa kuae tëta chemboete iñee rupi jare jembe pe, ërei ngatu ipɨa mombɨrɨ ko oï chegüi; oipoɨu reta chegüi vae, kuimbae reta iporookuai re oyemboe vae ramiño ko;

¹⁴ jáeramo, jekuae ayapo yeta mɨakañɨ kuae tëta pe, metei mɨakañɨ tuicha vae jare oporoiämondo vae; jayave yarakuaa katu vae reta iyarakuaa opata okañɨ, jare ipoki vae reta ipɨarakuaa opata vi okañɨ.”

¹⁵ ¡Paravete! YandeYa güi oñemi vae reta, oñomi reta iyemongeta jare jembiapo pɨtumimbi pe, jare jei reta: ¡“Mbaetɨ kia yandereecha, mbaetɨ kia yandekuaa”!

¹⁶ ¡Añetete perembiapo ikavimbae reta oñejäata ko, oñaeu-apo vae jembiapo re oñemae kavi rami! Echa, ¿ipuere pa ñaeu jei iyapoa pe: “Nde mbaetɨ ko cheapo”? Ani ¿tinaa jeita pa iyapoa pe: “Mbaetɨ reikatu reyembiapo”?

Israel iyereroasayepe regua

¹⁷ Líbano, oyepoepɨta ete ma ɨvɨ kavirä, jare ɨvɨ kavi oyepoepɨta kaarä.

¹⁸ Jókuae ara, oendumbaese vae reta oenduta, tembikuatía oyemongeta chupe reta yave, jare jesambae vae reta oechata.

¹⁹ Jayave oñemomichi vae reta, oyerovia yeta yandeYa re, jare paravete yae vae reta, oyerovia yeta Iyoambae Israel pegua re.

²⁰ Echa opata ipɨarai vae reta, jare ipɨayemboete vae reta opata, jare opata okañɨ ikavimbaeño oyemongeta oyapo vaerä vae reta,

²¹ ambuae rei omboya reta iparapiti, jókuae ikɨ̈reɨ oyavɨuka oporojäa vae pe vae reta, jare oporombotavɨ reve oikuaku jupi vae kia jekombae güi vae.

²² Jáeramo, yandeYa, Israel iTumpa, oepɨ Abraham vae, jei Jacob iñemuña reta kotɨ: “Añave güive Jacob ngaraa ye ma oñemomaraiuka, ngaraa ye ma jova pɨ̈ta imara güi,

²³ echa taɨ reta oecha yave cherembiapo jae reta ipɨte pe, chemboete retata che Iyoambae ko, Jacob iñemuña reta ipɨte pe, jare oipoɨu retata chegüi, che jae ko Israel iTumpa.

²⁴ Jare ipɨa jopa yepi yogüɨreko vae reta, iyarakuaata, jare iñeenguruse vae reta, oyeapɨsakata yemboe reta re.”