ISAÍAS 26 - Biblia Guarani Tumpa Iñee

Tairari yandeYa iporoangareko re

¹ Jókuae ara otairari retata kuae tairari ɨvɨ Judá pe: “Ñanoi tëta guasu jëguambae, yandeYa yandereepɨ vaerä oñono tëta guasu ikësea, omboyokupe oñono.

² Peipea öke reta, oike vaerä jupi vae reta, añete vae rupi yogüɨreko vae reta.

³ CheYa, nde reñovatu mbɨakatu pe, ndereño ipɨa oñono vae reta, echa nderé oyeko reta.

⁴ Peyeko avei yandeYa Tumpa re, echa jae ko ñepɨ̈roa opambae.

⁵ Echa jae oitɨ ipɨayemboete vae reta, omomichita tëta guasu ipɨarai vae, oitɨta ɨvɨ re oeya,

⁶ opɨ̈ro vaerä jese oiporara vae reta jare paravete vae reta.”

⁷ Jupi vae reta jeko isɨmbi ko, nde cheYa jupi vae ko, reñono kavi jupi vae japerä.

⁸ OreYa, roguata ko orepɨakatu reve kavi ndeporookuai jei vae rupi. Ndekotɨño ko orepɨa oyemongeta.

⁹ Pɨ̈tu yave cheä-yekɨi nderé, aikove aiko ramboeve roekata ndeimbove voi, opaete chepɨa ndive ko roeka. Nde rejäa yave ɨvɨ pegua reta, kuimbae reta oikuaata jupi vae.

¹⁰ Yepe tëi renoi mboroparareko jupimbae reta re, ërei jae reta ngaraai omomoe jupi vae, jekuae ñotai ko oyapo reta ikavimbae, isɨmbi vae reta ñogüɨnoia pe, echa mbaetɨ oipoɨu reta ndegüi cheYa.

¹¹ CheYa, ndepo remopüa ma renoi reinupa reta vaerä, ërei jae reta mbaetɨ oipota oikuaa jókuae regua, ërei oecha reta ndeporoaɨu, tëta ndembae vae kotɨ yave, imarata jókuae imotareɨa reta. ¡Mbae mona ndearasɨ opa omboai reta!

¹² CheYa, nde ko remeeta oreve mbɨakatu, nde ko reyapo ore rupi opaete orerembiapo reta.

¹³ OreYa Tumpa, ïru vae reta oyemombae oreré, ërei ndereño oremaendúa, ndeño ko jae oreYa.

¹⁴ Jae reta opa ma ko omano, ngaraa ye ma oikove reta; jendagüe retaño ma ko opɨta; echa reinupa reta ko, remokañɨtei reta ko, opaeteita remoakañɨ chugüi reta vae.

¹⁵ CheYa, nde ko rembotuicha tëtaguasu, rembotuicha ko reyemboeteuka vaerä, rembotuicha kuae ɨvɨ jembeɨ.

¹⁶ CheYa, reiporarauka oreve yave, roeka, orenupa yave, royerure.

¹⁷ Kuña imembɨ oata ma yave, jäse, imembɨrasɨ güi rami ko, roï nderóvai oreYa.

¹⁸ Orepurúa, oremembɨrasɨ, oa oremembɨ ɨvɨtuño yepe, mbaetɨ rogüeru yeyora kuae oreɨvɨ pe, jare mbaetɨ vi oa ɨvɨ iporä vae.

¹⁹ Ërei omanogüe reta oikove yeta, opüa yeta tëogüe reta. Ɨvɨ ndive opa ma oyea reta vae opüa yeta, jare osapukaita oyerovia güi. Echa, nde rembou tekove ɨsápɨi rami, jare omanogüe reta opüa yeta ɨvɨ güi.

²⁰ Cherëtaɨgua reta, peike pero pe, jare peyokenda öke peike yave. Peñemi räri joko pe, yandeYa iyarasɨ oasa regua.

²¹ Echa ko yandeYa ou oïa güi, oinupa vaerä ɨvɨ pegua reta, opaete imbaeyoa reta re, jare ɨvɨ omboyekuaata, jekombae jugüɨ oyepɨyere pɨpe vae, ngaraa ma oñomi, oyeyukagüe reta oime pɨpe vae.