ISAÍAS 25 - Biblia Guarani Tumpa Iñee

Tairari mbaemboete pegua yandeYa kotɨ

¹ CheYa, nde ko jae cheTumpa; tambotuicha jare tamboete nderee, echa reyapo jeta mɨakañɨ, ndeyemongeta arakae güive voi ma reyapo vae, añete vae ko jare oyembopo vae ko.

² Echa tëta guasu opa reeya jendagüeño, tëta guasu oñekëse kavi yae vae opɨta jendagüeño; tovaicho mburuvicha reta jo kavi opa remboai, jare ngaraa ye ma oñemopüa pɨau ye.

³ Jáeramo ko, tëta imbaepuere yae vae reta ndemboete, jare kuimbae reta jëia vae, oipoɨu ndegüi.

⁴ Echa, nde ko jae paravete vae iñepɨ̈roka, nde reepɨ oiporara oï vae, okɨrai yave nde ko ñemía, araku yae yave nde ko küaraɨa. Echa kuimbae ipɨapochɨ vae reta iyarasɨ, okɨrai vae oa ovapetea re vae rami ko.

⁵ Okɨmbaea rupi araku vae rami. Jökoraita ko remomichi tovaicho reta ipɨayemboete, jare amapɨtu omoröɨsa araku vae ramita ko remoröɨsa ipïrimbae reta iyarasɨ.

⁶ Ɨvɨtɨ Sión re yandeYa Imbaepuere yae ete vae, oyapota arete opaete ɨvɨ pegua reta peguarä, tembíu kavi ndive jare vino ikavigüe ndive, tembíu jëe ngatugüe ndive jare vino oyeambae ndive.

⁷ Kuae ɨvɨtɨ re yandeYa opata omboai ñeapevaka rami vae, tëta guasu reta oñeapeva ñogüɨnoi pɨpe vae, tëtaguasu reta oyeasoi ñogüɨnoi pɨpe vae;

⁸ jae ko mano, yandeYa omboaita jekuae avei pegua vae, jare oyoeta opaete vae jesaɨ, jare omboaita ɨvɨ iárambo güi, tëta imbae vae iñemomarai. YandeYa ko jei jökorai.

⁹ Jókuae ara jei retata: “Kuae ko jae ñaneTumpa ñaäro yaiko vae, jese yarovia jare jae yandemborɨta. Yayerovia jare yavɨa, echa jae ko yandemborɨta.”

¹⁰ YandeYa ko oyangarekota ɨvɨtɨ Sión re, ërei Moab re opɨ̈rota, kapii re oñepɨ̈ro ɨtɨapɨ pe rami.

¹¹ Jare Moab oipɨsota iyɨva oɨtai vae oɨtai vaerä oipɨso rami, ërei oɨtai ñavo ojota ɨ rugua kotɨ iyembotuicha, jare iyererovia katu.

¹² YandeYa opata oitɨ chugüi ikësea ɨvategüe jare yandambusu vae, opata oitɨ oeya chugüi ɨvɨ pe.