ISAÍAS 24 - Biblia Guarani Tumpa Iñee

YandeYa iporojäa opaete ɨvɨ re

¹ Mase, yandeYa opata oikuavo kuae ɨvɨ, opaeteita omboai jare güɨrokomegua, jare opata omoai moai pɨpegua reta.

² Jökoraita oasa opaete tëta pegua reta: Sacerdote reta, ani sacerdotembae reta ndive, tembiokuai kuimbae ani iya, tembiokuai kuña ani iya kuña, ombaegua vae ani omaemee vae, ombaeporuka vae ani ombaeporu vae, ipía vae ani oporombopiauka vae.

³ Ɨvɨ opaeteita oyemboai opɨta, opaeteita oñerenoe mbae chugüi. Echa jökorai ko omoërakua yandeYa.

⁴ Opa oyemboai ɨvɨ, opa okañɨtei, opaetei ɨvɨ oikomegua, opaetei tëtaguasu reta ɨvɨ pegua imbaerasɨ ñogüɨnoi.

⁵ Ɨvɨ opa oikomegua pɨpe yogüɨreko vae reta jeko pegua, echa mbaetɨ oyapo reta Tumpa iporookuai, mbaetɨ oendu reta mborookuai reta jei vae, oyavɨ reta morogüɨrökuavee päve opambae vae kotɨ.

⁶ Jáeramo, yepopeyu opa omokañɨtei ɨvɨ, jaenunga vi pɨpegua reta. Jáeramo, ɨvɨ pegua reta mbovɨ yae opɨta.

⁷ Vino mbaetɨ ma jeta, opa imbaerasɨ temitɨ uva reta, oyerovia katu yepi vae reta, opa ipɨatɨtɨ.

⁸ Osondo yerovia katu angúa raɨ reta jare arpa reta pegua, osondo oyombokepegua iyapirai vae reta.

⁹ Mbaetɨta ma okau reta tairari ndive; vino irota iua reta pe.

¹⁰ Tëta guasu opa oñererokomegua ikavimbae pe, mbaetɨ ma yandepuere yaike metei o japɨpe ave.

¹¹ Kuimbae reta oyaeo kaye rupi vino mbaetɨ ramo; opa okañɨ yerovia katu tëta güi, oñerenoe oyemombo yerovia katu kuae ɨvɨ güi.

¹² Opa oyemboai opɨta kuae tëta guasu, opa oñemopë öke reta.

¹³ Jökoraita opaete tëta guasu reta kuae ɨvɨ pe, ɨvɨra olivo ia oñemokana oyeitɨ rami, uva opa ma oyepoogüe re kia oyevɨka rami.

¹⁴ Omomaragüe reta osapukaita oyerovia reve, kuaraɨ oikea kotɨ güi otairari retata, oecha reta yave yandeYa imbaepuere, tuicha yae ko vae.

¹⁵ Opaete kuaekuae re pemboete yandeYa, kuaraɨ oëa kotɨgua reta, ɨguasu päu rupigua reta pemboete yandeYa, Tumpa Israel pegua.

¹⁶ Ɨvɨ iyapɨ kotɨ güi roendu otairari reta yandeYa pe körai: “¡Toyemboeteuka Jupi yae vae!” Ërei che jae: “¡Atataɨ, maera pa ko jökorai mbatee!” ¡Jupimbae reta oyapo ikavimbae yae vae!

¹⁷ Ɨvɨ pegua reta, jevae ñana rupigua oñemoña vae ramita, oimeta ñuai ani ɨvɨkua japerä pe.

¹⁸ Ojoyepe tëigüe, oata ɨvɨkua pe, jare ɨvɨkua güi oë tëi vae oata ñuai pe. Ama tuicha yaeta oa ara güi, okanata ɨvɨ iguapɨka reta.

¹⁹ Ɨvɨ okanata täta yae, opaeteita oyemboai, okanata jare opaeteita jaɨ jaɨ.

²⁰ Okanata ɨvɨ, mbae oñemokana rami, okanata metei tapɨi iyagüɨ oïeiño vae okana rami. Iyoa jeta yae ma jese, güɨrogüɨapita jare ngaraa ye ma opüa.

²¹ Jókuae ara yandeYa oiporaraukata ara ipo reta pe ara pe, jare ɨvɨ pe mburuvicha guasu reta;

²² opata omboatɨ oyokenda metei tembipɨɨrɨru pe, jare joko pe oyeokendata opɨta, jare oinupata ɨma ara ma oasa yave.

²³ Jare yandeYa Imbaepuere yae ete vae oguapɨ mburuvicha guasurä ɨvɨtɨ Sión re, Jerusalén pe yave, yasɨ jare kuaraɨ ngaraa ma oesape, jare tëta imbae pegua tenondegua reta oecha iyemboetea.