ISAÍAS 23 - Biblia Guarani Tumpa Iñee

Tiro jare Sidón maratuta vae regua

¹ Tiro maratuta vae regua: Peräse peyaeo barco Tarsis pegua reta, echa tëta Tiro opa oyemboai, mbaetɨ jembɨre o ave yepe, barco reta iyemboɨa opa vi oyemboai, Quitim kotɨ güi omombeu reta chupe.

² Tiro pegua jare Sidón pegua omaemee vae reta oñemokïrii. Pɨpegua reta oasase yepi ɨguasu güeru vaerä mbaembae.

³ Jembiurä güeru reta yepi iyeupe, temitɨ oñemuña jare oyearɨvo ɨ̈aka Nilo jembeɨ rupi vae güi, jare omaemee reta yepi jeta rupi ïru tëtaguasu reta pe.

⁴ Nemara Sidón, echa ɨguasu yavaete vae jei: “Mbaetɨi chemembɨ, mbaetɨi ayekuaku, mbaetɨi ambokuakuaa kunumi reta ani kuñatai reta.”

⁵ Egiptoɨgua reta oikuaa yave, ipɨatɨtɨ yaeta, Tiro oasa vae jërakua yave chupe reta.

⁶ Jei retata: “Pekua Tarsis pe, peräse peyaeo, ɨguasu jembeɨ rupigua reta.”

⁷ ¿Jaeä pa kuae, jókuae tëta guasu ñɨma yae vae, jókuae tëta guasu iyapirai avei vae? ¿Jaeä pa kuae, jókuae tëta guasu matɨ opa ojo oñemoëta vae?

⁸ ¿Kia pa jei körai kuae Tiro kotɨ? Pɨpegua omaemee vae reta ko mburuvicha yepi, pɨpegua omaemee vae reta ko oikokatu vae kuae ɨvɨ pe.

⁹ YandeYa Imbaepuere yae ete vae ko jei, omomichi vaerä opaete ipɨayemboete vae reta, jare oipɨaka vaerä opaete kuae ɨvɨ pe imbaepuere vae reta.

¹⁰ Peasa, Tarsis pegua reta, peɨvɨ rupi ɨ̈aka oï vae rupi ɨ oasa rami, echa mbaetɨ yeta ma pembaepuere.

¹¹ YandeYa omopüa ipo ɨguasu re, omborɨrɨiuka tëta guasu ñavo, jare opa omboaiuka Canaán iñepɨ̈roka reta.

¹² Jare jei Sidón pe: “Ngaraa ma peapirai, Sidón pegua reta, oyuvanga katu kia peré vae reta. Pepüa, peasa vaerä Quitim kotɨ, ërei ngaraa joko pe ave peiko pɨagüive.”

¹³ Pemae kërai opɨta Caldeaɨgua reta ɨvɨ, Asiriaɨgua reta omopüa, tëta mbaetɨse oiko vae. Omopüa reta tëta ñuu pe, oguataiño vae reta peguarä. Caldeaɨgua reta omopüa ñepɨ̈roka, jare o mburuvicha peguarä, jae reta opa omboai tëta.

¹⁴ Peräse peyaeo barco Tarsis pegua reta, echa opa ko oyemboai peñepɨ̈roka.

¹⁵ Jókuae ara rupi Tiro güi opaete vae ñakañɨta setenta año rupi, mburuvicha guasu reta iñemuña ndive mbovɨ año mburuvicharä yogüɨreko vae rami. Ërei jókuae setenta año oasa yave, Tiro otairarita, metei iyaguasa pota vae otairari rami, körai:

¹⁶ “Iyaguasa pota vae güi, opaete vae ñakañɨta vae, eipɨɨ metei arpa, jare ekua emboapɨ eguata tëta guasu, embaembopu ikavigüe, jeta etairari, yaecha ra jökorai imaendúa nderé vae.”

¹⁷ Jare setenta añoa pe yandeYa ou yeta omborɨ Tiro. Jare jae jekuae oikomegua yeta iyaguasa pota vae rami, opaete tëtaguasu reta ɨvɨ pegua ndive.

¹⁸ Ërei opaete omonganagüe oñeñono teeta yandeYa peguarä, mbaetɨta omboɨru ani oñovatu reta iyeupe, omee retata yandeYa jembiokuai reta pe, jae reta ogua vaerä jeta tembíu jare temimonde ikavigüe.