ISAÍAS 22 - Biblia Guarani Tumpa Iñee

Jerusalén maratuta vae regua

¹ Tëta guasu ɨvɨtɨ päu ipe kavi vae reta ipäu pegua maratuta vae regua: ¿Maera pa opaete vae oyeupi o iárambo?

² Tëta guasu oyembokepegua jare jäsémbai pɨpe vae, tëta guasu oyerovia katu vae; kuae tëta guasu pe omanogüe reta, mbaetɨ ko omano kɨsepuku pe, mbaetɨ vi ko omano reta ñeraro pe;

³ nderuvicha reta opaete reve otekuarai tëi uvɨ güi, ërei opa oyepɨɨuka reta; opaete vae otekuarai reta tëi mombɨrɨ, ërei opa oyepɨɨuka reta.

⁴ Jáeramo jae: Pemaeño tayaeo chepɨatɨtɨ yae reve, agüɨye peyemoambeko chembopɨakatu vaerä, kuae cherëta oyemboai vae güi.

⁵ Echa yandeYa Imbaepuere yae ete vae oñono ma ou vaerä ara yavaetegüe, kañɨtei pegua jare mbɨatɨtɨ pegua tëta guasu ɨvɨtɨ päu ipe kavi vae reta ipäu pegua pe. Opa oyemboai tëta guasu ikësea; ojoi oyeendu jäse reta vae ɨvɨtɨ re.

⁶ Elam pegua reta oyapo kavi ma juvɨrɨru, ñogüɨnoi ma ikavayu re jare ikäretou ñeraro pegua pe; jare Kir pegua reta güɨnoe ma iyeopiaka.

⁷ Ndeɨvɨtɨ päu ipöra ipe kavi vae tɨnɨe oï käretou ñeraro pegua pe, jare kavayu regua reta oyembojeyupa ma tëta guasu jöke pe.

⁸ Judá iyeroviaka ñamɨri jókuae ara. Jókuae ara pe reta pemae O Kaa jee vae kotɨ, tembiporu reta ñeraro pegua oï pɨpe vae kotɨ,

⁹ jare peecha David Jëta Guasu ikësea jeta oyeka vae, jare peru ɨ, ɨrɨru ɨvɨkotɨgua güi.

¹⁰ Jare peiparavo amogüe o reta Jerusalén pe, pemboai amogüe peyapo katu vaerä tëta guasu ikësea.

¹¹ Jókuae tëta guasu ikësea mókoi oyóvai ñogüɨnoi vae ipäu pe peyapo ɨ jɨrurä, jókuae ɨrɨru ñɨma vae kotɨ güi ou vae. Mbaetɨ reve pemboete jókuae iyapoa, arakae yae ma omee vae.

¹² Jáeramo, kuae ara yandeYa Imbaepuere yae ete vae, oparea peve reta peyaeo vaerä jare pepɨatɨtɨ vaerä, oparea peve reta peñeapi vaerä jare pemonde reta vaerä temimonde mbɨatɨtɨ pegua.

¹³ Ërei pe reta peyerovia jare peapirai, peyuka guaka jare vecha, peu soo jare vino. Jare pere: “Yakaru jare yakau, echa pɨareve ñamanota.”

¹⁴ YandeYa Imbaepuere yae ete vae oyekuaa cheve, jare jei cheve: “Mbaetɨta cheɨ̈ro peve kuae mbaeyoa re; opa pemano regua.” Jae ko yandeYa Imbaepuere yae ete vae iñee.

Eliaquim oguapɨ Sebna jekovia pe

¹⁵ YandeYa Imbaepuere yae ete vae jei cheve: “Ekua, emae Sebna re, mburuvicha guasu imbaembae iyangarekoa re, jare ere chupe:

¹⁶ ‘¿Mbae pa reyapo kuae pe, ani kia pa oime renoi kuae pe, maera pa reyapo reï kuae tɨvɨa ɨvate mbatee vae ndeyeupe, maera pa reyapo ndeyeupe tɨvɨa ɨ̈vavira re?

¹⁷ Yandeya ndererajata matɨ yae tembipɨɨrä, jasɨ katu yaeta ndereraja,

¹⁸ jare ndembotokororota metei ita yapúa vae rami, ndemombota matɨ ɨvɨ ipɨguasu vae kotɨ. Joko pe remanota, jokotɨ opata oyereraja nekäretou reta ipöra yae vae reta, echa, nde ñemomarai ko nderuvicha guasu jo pe.

¹⁹ Jáeramo Tumpa jei: Che romombota reïa güi, che roekɨta ndeparavɨkɨ güi.

²⁰ Jókuae ara aenɨita cherembiokuai Eliaquim, Hilcías taɨ;

²¹ amondeukata chupe nderemimonde, aumbɨkuata ndekuakuaa pe, amboasata chupe mbaepuere reta renoi tëi vae. Jare jae oïta Jerusalén pegua reta jare Judá pegua reta turä.

²² Jae ipo pe añonota David jo illave; mbaetɨta kia ipuere oyokenda jae oipeagüe, ani oipea jae oyokendagüe.

²³ Jae oïta iñemuña reta omboeteuka vaerä. Añonota täta metei clavo täta oyekutu oï rami.

²⁴ Jese oyembosagüɨuta iñemuña reta, opaete mbaembae ikavigüe rami, oipotagüe tasa, tasa michi vae güive tasa tuicha vae rami.

²⁵ Jókuae ara, okuéta jókuae clavo täta oyekutu oï tëi rami vae; oyeekɨta jare oata, opaete mbaembae oyembosagüɨu rami oï jese vae oata jare opata oyeka.’ ” Jei yandeYa Imbaepuere yae ete vae.