ISAÍAS 21 - Biblia Guarani Tumpa Iñee

Tëtaguasu Babilonia maratuta vae regua

¹ Ɨguasu iyɨ́vɨri ñuu oï vae maratuta vae regua: Kusumirou Neguev kotɨ güi ou vae rami, jökorai ou ñuu kotɨ güi ɨvɨ yavaete vae kotɨ güi.

² Yavaete ko, Tumpa oechauka cheve vae: Omaepɨ̈ro vae, omaepɨ̈ro; oporomboai vae, ombaemboai. ¡Pepüa, ɨvɨ Elam pegua reta! ¡Peporepeña, Media pegua reta! ¡Jäse vae reta amokïrii ma!

³ Jáeramo, cherete orɨrɨi akɨɨye güi, ayandu chepɨa pe jasɨ, kuña imembɨrasɨ oï vae oiporara rami, jókuae mbaetɨ omaeño aendu, kɨɨye mbaetɨ omaeño aecha.

⁴ Chepɨa jopa apɨta, arɨrɨi akɨɨye güi. Pɨ̈tu amomora yae yepi vae, añave, chemongɨɨye.

⁵ Mesa oñono reta ma, jendarä oipɨso reta ma asoya, okaru reta, okau reta. ¡Peyemboɨ, mburuvicha reta, peyapo kavi peyeopiaka reta!

⁶ Echa yandeYa jei cheve: “Eñono omae vae, omombeu vaerä opaete mbae oechagüe.

⁷ Oecha yave kavayu reta omoata käretou vae, ani kuimbae opo oyoapɨ mburika re ani camello re vae reta yave, tomae kavi jese.”

⁸ Jare jókuae omae vae osapúkai täta: “CheYa, kuae aïa mbaetɨ etei ko aeya ara pe, pɨ̈tu ñavo ko amae ngatu avei aï.

⁹ Aecha yogüeru kuimbae reta kavayu reta re opo oyoapɨ vae reta.” Jare jei reta: “¡Babilonia opa oyemboai, Babilonia opa oyemboai! Jare opaete itumpa-raanga reta opa oyeka oa ɨvɨ re.”

¹⁰ Tëta chembae, trigo oyembopiriri jare oyembovevegüe rami vae, amombeu ndeve aendu yandeYa Imbaepuere yae ete vae güi vae, jae ko Israel iTumpa.

Ɨvɨ Edom maratuta vae regua

¹¹ Ɨvɨ Edom maratuta vae regua: Seir kotɨ güi osapúkai cheve jei: “Omae vae, ¿mbae ora ma pa kuae pɨ̈tu?”

¹² Jare che jae: “Köeta ma, jare pɨ̈tu yeta vi. Pekɨ̈reɨ peparandu yave, peparandu; pekua peyu ye.”

Arabia maratuta vae regua

¹³ Arabia maratuta vae regua: Ñuu pe pepɨta pɨ̈tu yave vae reta, Dedán pegua, oguatagüe reta,

¹⁴ peë peövaiti iɨuve vae, peraja ɨ chupe. Tëta Tema pegua reta, peë peövaiti tembíu pe, otekuaraigüe reta.

¹⁵ Echa jae reta otekuarai ko kɨsepuku güi, kɨsepuku jaimbe vae güi, uvɨ güi, ñeraro ikavimbae güi.

¹⁶ YandeYa jei cheve: “Kuae güi metei añoa pe, jókuae ara ñavo oyemboepɨ iparavɨkɨ chupe vae oipapa ara reta rami, opata okañɨtei ɨvɨ Cedar imboetea yae yepi vae.

¹⁷ Jare mbovɨ yaeta jembɨre Cedar pegua, uvɨ regua jëia yae vae reta.” Echa yandeYa Imbaepuere yae ete vae, Israel iTumpa ko jei jökorai.