ISAÍAS 20 - Biblia Guarani Tumpa Iñee

Asiria opɨ̈rota Egipto jare Etiopía vae regua

¹ Metei ara Sargón mburuvicha guasu Asiria pegua ombou metei mburuvicha Tartán jee vae, tëta guasu Asdod jee vae pe; ou oñemopüa jókuae tëta re jare opɨ̈ro.

² Jókuae ara rupi yandeYa imiari ñeemombeúa Isaías, Amoz taɨ pe, jei chupe körai: “Emboi ndeyeugüi jókuae temimonde mbɨatɨtɨ pegua jare emboi vi ndepɨapaa.” Jökorai oyapo Isaías, jare oguata ipɨgüɨrai jare omboi jókuae jemimonde mbɨatɨtɨ pegua.

³ Jare yandeYa jei: “Kuae mboapɨ año cherembiokuai Isaías oiko inandi jare ipɨgüɨrai vae, omoërakua ko mbae Egipto jare Etiopía kotɨ.

⁴ Jökoraita ko mburuvicha guasu Asiria pegua opa güɨraja tembipɨɨrä Egipto pegua reta jare Etiopía pegua reta, taɨrusu vae jare ndechi, ipɨgüɨraita jare inandita, jevi oyekuaañota, imara reta vaerä.

⁵ Jare opaete vae okɨɨyeta jare imarata, echa Etiopía re oyerovia reta tëi, jare Egipto ko jae reta iyemboetea tëi.

⁶ Jare jókuae ara opaete yogüɨreko ɨguasu jembeɨ kuae kotɨgua reta jeita: ‘Mase, kërai ou oasa yayerovia yepi jese vae, chupe yaiporu yepi yandereepɨ vaerä mburuvicha guasu Asiria pegua güi. ¿Këraita pa yaasayepe añave?’ ”