ISAÍAS 2 - Biblia Guarani Tumpa Iñee

YandeYa iporookuaía oimeta opaete ɨvɨ re

¹ Isaías, Amoz taɨ oecha Judá jare Jerusalén regua vae jae kuae reta:

² Ara taɨkuegua rupi, ɨvɨtɨ yandeYa jo oï jese vae, oïta kuri opaete ɨvɨtɨ reta itenondeguarä, jare oyembotuicha yaeta opaete vae ɨvɨtɨ reta güi, jare opaete tëtaguasu reta yogüeruta ikotɨ;

³ jeta vae yogüeruta ketɨ ketɨ güi, jare jei retata: “Peyu yayeupi yandeYa iɨvɨtɨ re, Jacob iñemuña reta iTumpa jo kotɨ; jae yandemboe vaerä kërai yaiko vaerä, yaguata vaerä jae jemimbota rupi.” Echa Sión jae ko Jerusalén, joko güi oëta mborookuai jare yandeYa iñee.

⁴ Jare oporojäata opaete tëtaguasu reta re, jare ombosɨmbita jeta vae reta jeko. Jare opata oyapo reta ikɨsepuku reta arao itïrä, jare imii reta oyapota tembiporu hozrä. Tëtaguasu reta mbaetɨta ma oñoraro, jare ngaraa ye ma oime yemboe ñeraro peguarä.

⁵ ¡Peyu, Jacob iñemuña reta, yaguata yandeYa omee tembipe yandeve vae pe!

YandeYa iporojäa ipɨapochɨ vae reta kotɨ

⁶ CheYa, añetete reeya kuae tëta ndembae vae, Jacob iñemuña reta, echa kuae ɨvɨ pe tɨnɨe oï teko oyereru kuaraɨ oëa kotɨ güi vae, jare omomora reta susere oimeta vae re omombeu reta, filisteo reta rami, jare oyapo reta ñererökuavee päve ketɨgua reta ndive.

⁷ Kuae ɨvɨ tɨnɨe oï korepoti jare oro pe, jeta mbaembae ikavigüe pe; kuae ɨvɨ tɨnɨe oï kavayu pe, jare jeta yeyé käretou ñeraro pegua.

⁸ ¡Ërei tɨnɨe vi oï tumpa-raanga reta pe! Oyetavatɨka reta omboete jembiapo, ipo pe oyapogüe.

⁹ Kuimbae oyetavatɨka itindɨ reve ombaemboete, oñemomichi reta tumpa-raanga reta kotɨ. ¡Agüɨye neɨ̈ro chupe reta!

¹⁰ Opaete vae reta peñemi ɨ̈vavira ipäu rupi, peñemi ɨvɨkúi igüɨ rupi, yandeYa kɨɨyea yae vae güi, iyemboetea tuicha yae vae güi.

¹¹ Ipɨayemboete vae reta iñäkatindɨta opɨta; ipɨapochɨ vae reta oñemomichiukata. YandeYaño oyembotuichaukata jókuae ara,

¹² echa yandeYa Imbaepuere yae ete vae ojäa yave jókuae ara, opaete kuimbae ipɨapochɨ vae reta, ipɨayemboete vae reta, ipɨa ombotuicha vae reta, omoñemomichita;

¹³ opaete ɨ̈vɨrare Líbano pegua rami vae, jókuae ɨvɨra ɨvate jare sɨmbi rami vae, jare opaete ɨvɨra encina jee vae Basán pegua reta rami vae,

¹⁴ opaete ɨvɨtɨ guasu reta, opaete ɨvɨtɨ ɨvate yae vae reta rami oyererovia vae,

¹⁵ opaete maeka o ɨvate vae reta, ani tëta guasu oñekëse kavi yae vae reta,

¹⁶ opaete barco Tarsis pegua reta, jare opaete ipöra yae oñemopɨ̈ta vae reta rami vae.

¹⁷ Ipɨayemboete vae reta iñäkatindɨta; ipɨapochɨ vae reta oñemomichiukata. YandeYaño oyembotuichaukata jókuae ara,

¹⁸ jare opaeteita omboai tumpa-raanga reta jókuae ara.

¹⁹ YandeYa opüa jókuae ara oiporarauka vaerä kuae ɨvɨ pe yave, opaete vae oiketa ɨ̈vavira oyeka vae rupi ɨvɨkua rupi; yandeYa kɨɨyea yae güi, iyemboetea tuicha yae vae güi.

²⁰ Jókuae ara kuimbae reta omombota itumpa-raanga reta korepoti pegua jare oro pegua anguya reta pe jare andɨra reta pe. Jókuae itumpa-raanga reta oyapo reta omboete reta vaerä vae,

²¹ jare oike retata ɨ̈vavira oyeka vae rupi, ɨvɨkua rupi; yandeYa kɨɨyea vae güi, iyemboetea tuicha yae vae güi, yandeYa oiporarauka jókuae ara kuae ɨvɨ pe yave.

²² Agüɨye peyeko kuimbae re, echa jekove ipɨ̈túe reño ko oï. Jae mbaeä etei ko.