ISAÍAS 17 - Biblia Guarani Tumpa Iñee

Tëta guasu Damasco maratuta vae regua

¹ Tëta guasu Damasco maratuta vae regua: Damasco mbaetɨta ma oiko tëta guasurä; jendagüeño yatɨta opɨta.

² Oyemombo eteta opɨta, tëta guasu Aroer iyɨvɨrigua reta ndive, mɨmba ikaruaräño opɨtata, jokoropi oke retata, mbaetɨta kia oiämondo vae.

³ Efraín mbaetɨta ma güɨnoi tëta guasu oñekëse kavi vae, jökorai vi Damasco; Siria pegua jembɨregüe reta, Israel pegua reta ramiñota vi. Jökorai jei yandeYa Imbaepuere yae ete vae.

Israel oiporara vae regua

⁴ Jókuae ara Israel iyemboetea jagüeta, mbaetɨta ma ikɨra oiko.

⁵ Ombaepoo vae, oipoo trigo vae ramita ko, ipo pe oipoo trigo jäka vae ramita ko, ɨvɨtɨ päu ipe kavi vae oï Refaim pe vae pe oyepoo vae ramita ko,

⁶ oyeechambae vae jembɨre; olivo jäka oñemokana yave ia jembɨregüe rami; mókoi ani mboapɨ ia oï jäka re, irundɨ ani pandepo ia oï jäka ikavi yae vae re. Jökoraita opɨta tëtaguasu jei yandeYa Israel iTumpa.

⁷ Jókuae ara kuimbae omaeta Iyapoa re, omaeta Iyoambae Israel pegua re.

⁸ Ngaraa ye ma omae mɨmba oyeyuka oyeapɨ jese vae reta oyapo iyeupe reta vae re. Ngaraa ye ma omae jembiapo reta re, ngaraa ye ma omae Asera iä reta re, ngaraa ye ma omae kuaraɨ iä reta re.

⁹ Jókuae ara, jëta guasu oñekëse kavi yae vae reta opata opɨta, heveo reta jare amorreo reta jëta reta opa oyeeya rami, Israel iñemuña reta güi okɨɨye jeko pegua ipombae opɨtata,

¹⁰ echa neakañɨ Tumpa ndereepɨ vae güi, mbaetɨ nemaendúa jae ko neñepɨ̈roa vae, ërei jaeño reñotɨ temitɨ ikavigüe, temitɨ matɨ güi oyererugüe,

¹¹ reñotɨ yave reyangareko kavi jese, jare ɨmambae ipotɨ. Ërei ia opata okañɨtei, ou yave chupe mbaerasɨ pɨ̈chɨi ngaraa etei omomara.

¹² ¡Peendu jeta vae reta kërai oyeendu, ɨguasu jɨapu oyeendu rami! Tëta guasu reta jɨapu oyeendu, ɨguasu jɨapu oyeendu rami.

¹³ Ërei Tumpa iñeeäta rupi matɨ opa otekuarai reta; ɨvɨtu jenonde ɨtɨ güɨraja vae rami, kusumirou güɨraja ɨvɨkúi vae rami.

¹⁴ Kaaru yave yavaete tovaicho reta, ërei köe-pota yave mbaetɨ etei ma. Köraita ko oasa oyuvanga yanderé vae reta, jare opa mbaembae opɨ̈ro yandegüi vae reta.