ISAÍAS 14 - Biblia Guarani Tumpa Iñee

Iɨvɨ güi opa oyereraja vae reta oyerova ye vae regua

¹ YandeYa oipararekota Jacob iñemuña reta. Jekuae oyapo yeta imbaerä Israel iñemuña reta, güeru yeta oñono reta vaerä iɨvɨ ae pe. Ketɨgua reta oyemboyata jese reta, oñemoïruta Jacob iñemuña reta ndive.

² Jeta tëtaguasu reta omboresive kavita Israel iñemuña reta, jare omoïru retata yogüeru ye jëta kotɨ yave, jare Israel iñemuña reta oyapota jembiokuairä yandeYa iɨvɨ pe. Jökorai Israel iñemuña reta oyapota tembipɨɨrä arakae jökoraise oyapo vae, güɨnoi retata mbaepuere, arakae güɨrekose mbaepuere jese reta vae re.

Mbuka mburuvicha guasu Babilonia pegua re

³ Tëta Israel, yandeYa ndemombutuu opaete mbɨatɨtɨ reta güi, mbaembae reiporara vae güi, jare yeokuaiasɨ katu pe neñono reta vae güi yave,

⁴ rereta kuae ñee arakuaa pegua, mburuvicha guasu Babilonia pegua kotɨ: “¡Mase, kërai ou opɨta imbaeyuvanga yepi vae! ¡Mase, kërai ou opɨta tëta guasu oro oipota rai yae yepi vae!

⁵ YandeYa omboai ipɨapochɨ vae imbaepuere, opɨ̈ro mburuvicha iyoa vae reta ipopoka mborookuai pegua,

⁶ tëtaguasu reta pe oiporarauka yepi iyarasɨ reve vae, oinupa avei yepi vae, iyarasɨ reve oyokuaiasɨ katu yepi tëtaguasu reta vae, oyapo yepi jeta ikavimbae chupe reta vae ipïrimbae reve vae.

⁷ Opaete ɨvɨ pegua reta oputuu pɨagüive ñogüɨnoi, jare jäsémbai oyerovia reta güi.

⁸ Ɨvɨra ciprés jee vae reta jare ɨ̈vɨrare reta ave oyerovia reta ndesusere re, jare jei reta: ‘Nde resusere güire mbaetɨ ye kia ou oreasɨa vae.’

⁹ Omanogüe reta ñogüɨnoia pe, ipɨakañɨ reta nderé, tëogüe reta opüa nderapependo vaerä, opaete ɨvɨ pegua mburuvicha reta opüa iguapɨka güi, jare opaete mburuvicha guasu tëtaguasu pegua reta opüa oyemboɨ.

¹⁰ Opaete jae reta jeita ndeve: ‘Opa ndembaepuere ndegüi, reyu vi repɨta ore rami.

¹¹ Kuae omanogüe reta ñogüɨnoia pe ou opa ndepɨapochɨ, jare nderemimbɨ arpa ipu reta. Taso reta ko nderuparä jare ndeasoyarä.’

¹² ¡Maera pa ko rea ara güi, yasɨtata köembiya, jembipeasɨ köe-pota yave vae! Reyeitɨuka ɨvɨ re, nde remoamɨri yepi tëtaguasu reta vae.

¹³ Rere yepi ndepɨa pe ndeyeupe: ‘Tayeupi ara kotɨ; tañono cheguapɨka mborookuaía pegua Tumpa iyasɨtata reta iárambo ye; taguapɨ ɨvɨtɨ guasu, tumpa reta ñogüɨnoia pe ɨvɨtuguasu kotɨ.

¹⁴ Tayeupi amapɨtu ɨvate yae vae kutɨ ye; tamboyovake Tuicha yae ete vae.’

¹⁵ ¡Ërei rea ko omanogüe ñogüɨnoia kotɨ, ɨvɨgüɨasɨ kotɨ!

¹⁶ Ndereecha vae reta, oyemboɨta omae nderé, jare jei retata: ‘¿Jae pa kuae kuimbae omborɨrɨi yepi ɨvɨ vae, opa yepi omboai tëtaguasu reta vae,

¹⁷ ɨvɨ oeya yepi ipombae vae, opa yepi omboai tëta guasu reta vae, jare mbaetɨi oyora jembipɨɨ reta vae?’

¹⁸ Opaete vae mburuvicha guasu tëtaguasu pegua ñavo oputuu kavi ñogüɨnoi jɨvɨa ae ae pe;

¹⁹ ërei nde, ndemombo reta ikatu pe tɨvɨa güi, mbae yavaete yae vae rami, kɨse pe omano vae jemimondegüe rami, tëogüe ɨvɨkua pe oyemombogüe rami, tëogüe re oñepɨ̈rogüe rami.

²⁰ Mbaetɨta neotɨ reta ïru mburuvicha guasu reta rami, echa opa rerokomegua ndeɨvɨ, opa reyuka joko pegua reta. Jeko kavimbae vae reta iñemuña reta ngaraa yogüɨreko avei.

²¹ Peyupavo peyuka vaerä taɨgüe reta, tu reta oyapo ikavimbae vae jeko pegua, agüɨye vaerä oyemombae reta kuae ɨvɨ re, ani omotɨnɨe reta kuae ɨvɨ tëta guasu reta pe.”

²² YandeYa Imbaepuere yae ete vae jei: “Apüata ikotɨ reta, opata amboai Babilonia jee, jare joko pe jembɨregüe reta, taɨ reve reve jare jɨmɨmino reve reve.

²³ Mɨmba küi jee vae oiko vaeräño ikavita, ɨvɨ yasuru vaerä, opata atupei, tupeicha kañɨtei pegua pe.” YandeYa Imbaepuere yae ete vae ko jökorai jei.

Tëtaguasu Asiria opata oyemboai

²⁴ YandeYa Imbaepuere yae ete vae jei jee re aeño: “Añetete, che ayemongeta rami oyeapota; ayemongeta oyeapo vaerä vae oyembopota ko.

²⁵ Asiriaɨgua reta opata amboai cheɨvɨ pe, cheɨvɨtɨ re opata apɨ̈ro jese reta, mbaetɨta ma güɨnoi reta mbaepuere tëta chembae vae re, mbaetɨta ma oiporarauka chupe reta.

²⁶ Körai ko oï cheyemongeta opaete ɨvɨ pegua reta re, aïndaivi aï aiporarauka vaerä chearasɨ yae reve, tëtaguasu reta pe.”

²⁷ Echa yandeYa Imbaepuere yae ete vae oyemongeta vae, mbaetɨ ko kia ipuere oyopia chugüi, jekuaeñoi iyarasɨ oï, ¿kia pa ipuere oyopia chugüi?

Filisteo reta maratuta vae regua

²⁸ Jókuae año mburuvicha guasu Acaz omano yave, Isaías omoërakua kuae ñee:

²⁹ Agüɨye eyerovia tëtaguasu Filistea, jókuae oiporarauka yepi ndeve vae iporookuai opa chugüi jeko pegua, echa moichɨ güi oëta moitini, ani mboi oveve vae.

³⁰ Paraveteasɨ yae vae reta oyeangarekota, jare mbaetɨ mbaembae güɨnoi vae reta yogüɨreko pɨagüiveta. Ërei, che amboovarurukata ndembae vae reta, mbovɨ yae jembɨre ndeve vae ave ayukata.

³¹ ¡Neräse tëta guasu jöke, pesapúkai, tëta guasu reta Filistea pegua! Echa ɨvɨtuguasu kotɨ güi outa tätati rami sundaro reta; chugüi reta mbaetɨta metei ave ipɨtu vae.

³² ¿Mbae pa yaeta jokotɨ güi ñee jerúa reta pe? Echa kërai, yandeYa omomɨ̈rata ma Sión, jare jae imbae vae reta matɨ rupi oiporara yogüɨreko vae reta yogüeru yeta joko pe.