ISAÍAS 13 - Biblia Guarani Tumpa Iñee

Babilonia maratuta vae regua

¹ Isaías, Amoz taɨ oecha Babilonia maratuta vae regua vae, jae kuae:

² “¡Peupi bandera ñeraro pegua metei ɨvɨtɨ jaambae re! ¡Pesapúkai sundaro reta! ¡Peupi pepo chupe reta, oike reta vaerä, mburuvicha reta jöke rupi!

³ Tumpa jei: Aenɨi ma chesundaro reta, jëia vae reta, oyeparavogüe reta, cheporomoamɨri re oyerovia vae reta, amondo oyapo reta vaerä cheporonupa.”

⁴ Oyeendu jeta yae vae reta isapúkai ɨvɨtɨ re, jeta yae yogüeru vae reta oyeendu rami. Oyeendu tëtaguasu reta isapúkai, jeta vae kuimbae reta oyemboatɨ ñogüɨnoi vae rami. YandeYa Imbaepuere yae ete vae omae jare oipapa kavi sundaro reta ñeraro peguarä.

⁵ Matɨ güi yogüeru reta, matɨ ɨvɨ iyapɨ kotɨ güi, yandeYa güeru iyarasɨ pegua jembiporu reta, opa vaerä omboai ɨvɨ.

⁶ Peräse peyaeo, echa oväeta ma yandeYa iporojäa iara, Imbaepuere yae ete vae iporomokañɨtei ko.

⁷ Jáeramo, opaete vae ipɨtuta, opaete vae ipɨa jëogüeta,

⁸ okɨɨye yaeta vae, ipɨatɨtɨ yaeta jare mbae jasɨ yae vae ombokepeguata kuña imembɨrasɨ vae rami. Omae oyoe yave, ipɨakañɨta oyoe, echa jova iyu yaeta oyekuaa.

⁹ Mase, oväe ma yandeYa iporojäa iara, ara yavaetegüe jare arasɨ yae pegua, oeyata ipombae ɨvɨ, opata omokañɨtei chugüi iyoa vae reta.

¹⁰ Yasɨtata reta jare ïru yasɨtata reta yatɨ yatɨ ara re ñogüɨnoi vae, mbaetɨta ma omoembipe; kuaraɨ oë tëi rupive opata ogüe, jare yasɨ mbaetɨta ma omoembipe.

¹¹ YandeYa jei: “Aiporaraukata kuae ɨvɨ pegua reta pe iyoa jeko pegua, jare iTumpa potambae reta pe ikavimbae oyapo jeko pegua. Amboapɨta iyemboete iyé vae reta güi iyemboete, amomichita ipɨayemboete vae reta.

¹² Mbovɨ yaeta kuimbae reta ɨvɨ pe, oro ikavi yae vae Ofir pegua mbovɨ yae rami.

¹³ Echa, ara omokanata, jare ɨvɨ osɨrɨta jenda güi, chearasɨ aitɨta jókuae ara vae jeko pegua, chearasɨ yaeta jókuae ara.

¹⁴ Kuimbae reta, guasu oñemoñagüe ramita, ani vecha opa oñemoai moai vae mbaetɨ iyangarekoa vae ramita. Metei ñavo oyerova yeta jëtaguasu ae kotɨ, otekuaraita iɨvɨ ae kotɨ.

¹⁵ Oipotagüe oñeväeka vae omanota kɨse pe, oipotagüe oyepɨɨuka vae oyeyukaukata.

¹⁶ Jovake reta etei imichia reta oyererokuaukata ɨvɨ re; jo güi opata oñerenoe mbaembae, jare jembireko ñavo re oyuvangata chugüi reta vae.

¹⁷ Ambouta ikotɨ reta tëtaguasu Media pegua reta, mbaetɨ oipotarai oro ani korepoti vae reta.

¹⁸ Juvɨ pe oñɨvo retata michia reta, oa ramo vae reta re ngaraa ipïri reta, jaeramiño vi kunumi reta re.

¹⁹ Babilonia, tëtaguasu reta omboete yae vae, Caldeaɨgua reta oyembotuicha jare oyemboete jese vae, opɨtata Sodoma jare Gomorra che opa amboai vae rami.

²⁰ Ngaraa ye ma kia oiko pɨpe vae, ngaraa kia ave oñemoëta pɨpe. Árabe reta ave ngaraa oyembojeyupa pɨpe, ani vecha iyangarekoa reta ave ngaraa ivecha omombutuu joko pe.

²¹ Jokoropi oñemoëtata mbaeporou reta ñana rupigua reta, o reta rupi oñemoëtata suindaño, jokoropi oñemoëtata yandu retaño, jare kavara ñana rupigua reta oyuvangata jokoropi.

²² Mburuvicha jogüe reta pe jare mburuvicha reta jo ikavi reta pe oyaeota aguarayaɨmba retaño. Babilonia iara oyearo yae ma; köi yae ma opa vaerä chugüi.”