ISAÍAS 12 - Biblia Guarani Tumpa Iñee

Tairari yasoropai pegua

¹ Jókuae ara rupi retairarita körai: “Yasoropai amee ndeve cheYa, echa yepe tëi ndearasɨ chekotɨ, ërei oasa ma ndearasɨ chembopɨakatu ye ma.

² Tumpa ko jae chereroasayepe vae; tayeko jese, agüɨye takɨɨye, echa cheñepɨ̈roa ko jae, chetairari yandeYa kotɨño ko, jae ko chepɨ̈rata jare chereroasayepe vae.”

³ Peuta ɨ peyerovia reve, jókuae ɨesaɨ mboromboasayepe pegua güi.

⁴ Jókuae ara rupi petairarita körai: “Pemee yasoropai jare peyerure yandeYa pe, pemoërakua tëtaguasu reta pe, jae mbaembae oyapogüe, pemomaendúa jae ko tuicha yae vae.

⁵ Petairari yandeYa pe, echa oyapo mbae tuichagüe, ikavi ko opaete vae ɨvɨ pegua reta oikuaa vaerä kuae.

⁶ Pesapúkai jare petairari peyerovia güi, pe Sión pegua reta, echa Tumpa, Iyoambae Israel pegua tuicha yae vae, oime oï pepɨte pe.”