ISAÍAS 11 - Biblia Guarani Tumpa Iñee

Mesías mburuvicha guasu jupi vae

¹ Ɨvɨraɨpɨ rami vae Isaí güi oëta metei jokɨ, iyɨpɨasɨ güi jeñɨita.

² Jese oïta yandeYa iEspíritu; espíritu pɨaarakuaa katu pegua jare arakuaa katu, espíritu yemboarakuaa pegua jare mbaepuere pegua, espíritu oikuaa yae mbae vae, jare oipoɨu yandeYa güi vae.

³ Jare oikuaaukata chupe, oyepoɨu vaerä yandeYa güi. Ngaraa oporojäa oechagüe reño, ani ngaraa mbae jei oendugüe reño;

⁴ oporojäata ko jupi rupi paravete vae reta re, oñemoëta arakuaa katu reve kavi, ipɨa omomichi vae reta re; jare iñee rupi oporonupata, iñee pe oyukata iTumpa potambae.

⁵ Jare oyemondeta jupi vae pe, jare oyekuakuata añete vae pe.

⁶ Jayave aguarayaɨmba oiko päveta vecha raɨ ndive, jare yaguapara oyapakuata kavara raɨ ndive; toro taɨrusu vae, yaguapope jare mɨmba tëta rupigua reta oguata päveta, jare metei michia oyangarekota jese reta.

⁷ Guaka jare oso kuña jou päveta ñana, imembɨ reta oyapakua päveta; jare yaguapope güeye rami jouta kapii.

⁸ Jare michia raɨ okambuño vɨteri vae, oyuvangata moitini ikua iárambo, jare okambu poi ramo vae omopöeta ipo mboi ikua pe.

⁹ Ngaraa oyapo reta ikavimbae opaete cheɨvɨtɨ oï tee vae pe; echa opaete ɨvɨ pegua reta oikuaata yandeYa, ɨ tɨnɨe ɨguasu oï rami.

¹⁰ Jare jókuae ara Ɨvɨraɨpɨ rami vae Isaí güi oëta metei jokɨ, jae oñeñonota metei bandera rami opaete vae reta peguarä, opaete vae reta oekata; jare jëta jërakua yaeta.

¹¹ Jökoraiño vi jókuae ara yandeYa, imbaepuere rupi güeru yeta imbae vae reta jembɨregüe oimeño opɨta Asiria pe vae, Egipto pe, Patros pe, Etiopía pe, Elam pe, Sinar pe, jare Hamat pe jare ɨguasu jembeɨ rupigua tëta reta güi.

¹² Omopüata bandera opaete tëtaguasu reta peguarä, omboatɨta peɨvɨ Israel güi oyemombogüe reta, omboatɨta Judá pegua reta opa oñemoai ñogüɨnoi mombɨrɨ ara igüɨ kotɨ rupi vae.

¹³ Jare Efraín iporomotareɨ opata, jare Judá jovaicho reta opata oyemboai; Efraín ngaraa ma omotareɨ Judá, Judá ngaraa ma oiporarauka Efraín pe.

¹⁴ Oñemoïru retata oporepeña kuaraɨ oikea kotɨ filisteo reta re, opɨ̈ro retata kuaraɨ oëa kotɨgua güi imbaembae. Edom pegua reta jare Moab pegua reta oyeokuaita chupe reta, Amón pegua reta yogüɨrekota jae reta jeia pe.

¹⁵ YandeYa oipeata tape chupe reta Epigto pegua ɨguasu rupi, omopüata iyɨva ɨ̈aka Éufrates re, chiu pe opata omboyao jókuae ɨ̈aka, jare ipuereta oasa reta ipɨapaa omboimbae reve.

¹⁶ Oyepeata tape, tëta imbae vae jembɨregüe pe, Asiria kotɨ güi oyerova reta ye yave, jëtara Israel iñemuña reta oyerova ye Egipto kotɨ güi yave rami.