Hechos 3 - Biblia Guarani Tumpa Iñee

Oguatambae vae okuera

¹ Pedro jare Juan yogüɨraja päve tupao pe, Tumpa pe oyerure vaerä, mboapɨ ora ma kaaru yave.

² Jare ïru vae reta güeru ara ñavo metei kuimbae oguatambae oa ramo güive vae oñono tupao jöke pe, Öke Pöra jee vae pe, oyerure vaerä mbae re tupao pe oike vae reta pe.

³ Jókuae kuimbae oguatambae oecha Pedro jare Juan oiketa tupao pe yave, oyerure mbae re chupe reta.

⁴ Jayave Pedro jare Juan omae ngatu jese; jare Pedro jei: —¡Emae oreré!

⁵ Jayave kuimbae omae ngatu jese reta, omeetaecha mbae chupe ramo.

⁶ Ërei Pedro jei: —Mbaetɨ anoi korepoti ani oro. Ërei anoi vae tamee ndeve. Jesucristo Nazaret pegua jee re epüa jare eguata.

⁷ Jayave Pedro oipɨɨ kuimbae ipo iyakatu pe omopüa. Jare jupiveiño ipɨ̈rata kuimbae ipɨ jare ipɨñúa.

⁸ Jare oyemboɨ voi. Jayave oguata jare oike jae reta ndive tupao pe. Omboete Tumpa güɨropo reve.

⁹ Jare opaete vae reta oecha oguata jare omboete Tumpa.

¹⁰ Oikuaa reta jae ko oguapɨse tupao jöke, Öke Ipöra jee vae pe oyerure mbae re vae. Ipɨakañɨ yae reta jare okɨɨye reta vi kuae oyeapo kuimbae pe vae re.

Pedro oñemoñee Salomón ikorero jee vae pe

¹¹ Kuimbae okuera ma vae opoiä Pedro jare Juan güi. Jare opaete vae reta osɨi oyemboatɨ ipɨakañɨ reve jae reta ñogüɨnoia pe, Salomón ikorero jee vae pe.

¹² Jayave Pedro oecha jókuae yave, jei opaete vae reta pe: “Kuimbae Israel iñemuña reta, ¿maera pa pepɨakañɨ kuae re? ¿Maera pa pemae ngatu oreré, oreiño orembaepuere rupi ani jupigüe roiko vae rupi rombogüera kuae kuimbae rami?

¹³ Ñaneñemuñagüe reta Abraham, Isaac, Jacob iTumpa omboeteuka ma Taɨ Jesús. Kuae Jesús pe reta pemee, jare peröɨro Pilato jóvai; Pilato jei tëi oyorauka vaerä yave.

¹⁴ Ërei pe reta peröɨro Iyoambae vae jare Jupi vae, jare peyerure Pilato pe oyorauka vaerä peve metei oporoyuka vae.

¹⁵ Jare peyukauka jókuae tekove Iya. Jae ko Tumpa omoingove ye omanogüe reta ipɨte güi vae. Jókuae ko ore roecha vae.

¹⁶ Kuae kuimbae pe reta peecha jare peikuaa vae okuera ko Jesús jee re güɨrovia ramo. Kuae iporogüɨrovia Jesús re vae ombogüera ete pe reta peecha peï rami.

¹⁷ Añave, tëtara reta, aikuaa peruvicha reta jare pe reta vi peyapo kuae ikavimbae vae Jesús pe, mbaetɨ peikuaa ramo.

¹⁸ Ërei jökorai oyapo Tumpa, opaete ñeemombeúa reta rupi jei rami. Echa jei Cristo oiporara ñotai ko.

¹⁹ Jayave peeya peyemongeta ikavimbae vae pepɨa pe penoi vae jare peyerova Tumpa kotɨ, peyoa reta oyemboai vaerä, jare ou vaerä yandeYa güi ara mbɨakatu pegua,

²⁰ jare Tumpa ombou ye vaerä Jesucristo, tenonde güive ma oñemoërakua peve vae.

²¹ Ërei jae opɨta vɨterita ara pe opaete mbaembae oyeapo kavi regua. Jókuae mbaembae re Tumpa imiari arakae güive ñeemombeúa reta oñono tee vae rupi vae.

²² Echa Moisés jei ñaneñemuñagüe reta pe: YandeYa Tumpa omopüata peve ñeemombeúa perëtara reta güi, chembou rami. Peyeapɨsakata jese opaete jeita peve vae re.

²³ Jare oime yave kia mbaetɨ oyeapɨsaka jókuae ñeemombeúa re vae, oyemombota ko ïru vae reta ipɨte güi.

²⁴ Jökorai vi jei opaete ñeemombeúa reta Samuel güive. Opaete metei rami omoërakua reta kuae ara reta re.

²⁵ Pe reta ko jae ñeemombeúa reta iñemuña reta, jare ñaneñemuñagüe reta pe Tumpa oyapo morogüɨrökuavee päve jei reve Abraham pe: ‘Neñemuña rupi outa cheporerekua opaete ɨvɨ pegua reta re.’

²⁶ Tumpa omopüa Taɨ peve, oyapo vaerä ikavi vae peve, metei ñavo peyerova vaerä Tumpa kotɨ pereko ikavimbae vae güi.”