Hechos 28 - Biblia Guarani Tumpa Iñee

Pablo Malta pe

¹ Opareve roë ma ɨvɨ pe yave, roikuaa jókuae ɨguasu-päu yepe jee Malta.

² Jare joko pegua reta ipɨakavi yae ore ndive. Oremboresive kavi reta, oyatapɨ reta tuicha, ama okɨ jare iroɨ ramo.

³ Jare Pablo omboatɨ yepea, jare oñono tata pe. Jayave metei mboi tata güi oë osɨi vae oichuu Pablo ipo pe.

⁴ Jare joko pegua reta oecha yave mboi osagüɨu oï Pablo ipo re, jei reta oyoupe: “Kuae kuimbae oporoyuka vae yepe. Oasa yepe tëi ma ɨguasu güi, ërei Tumpa mbaetɨ omaeño oikoño vaerä.”

⁵ Ërei Pablo omotumo ipo güi mboi tata pe, jare mbaetɨ maratu.

⁶ Joko pegua reta oäro tëi iruruta ani güɨramoiño omanota oa. Ërei jae reta oäro tëi ɨma güire, oecha mbaetɨ maratu. Jayave jei reta: “Kuae kuimbae tumpa ko.”

⁷ Jare jókuae ɨguasu-päu pegua reta juvicha Publio jee vae güɨnoi jokoropi iɨvɨ reta. Jae oremboresive kavi, jare oyangareko kavi oreré mboapɨ ara.

⁸ Jare Publio tu imbaerasɨ oï jupa pe. Jaku jare jepotiugüɨ. Pablo oike omae jese. Jare oyerure Tumpa pe yave, oñono ipo jese, jare ombogüera.

⁹ Jare kuae oyeapo yave, ïru imbaerasɨ vae jókuae ɨguasu-päu pegua reta yogüeru, jare Pablo ombogüera vi.

¹⁰ Jayave jae reta omee vi oreve jeta mbaembae. Jare royeupi ye yave barco pe, jeta orembotapeke reta.

Pablo ojo oväe Roma pe

¹¹ Jare mboapɨ yasɨ ma oasa yave, rojo joko güi metei barco Alejandría pegua pe. Kuae barco opɨta jókuae ɨvɨ pe, iroɨ iara omboasa vaerä. Barco itï re güɨnoi ɨvɨra pegua tumpa-raanga Cástor jare Pólux jee vae iä.

¹² Jayave rojo roväe tëta guasu Siracusa pe, jare ropɨta joko pe mboapɨ ara.

¹³ Jayave joko güi royere ɨguasu jembeɨ rupi jare rojo roväe tëta guasu Regio pe. Jare pɨareve pe ɨvɨtu oyepeyu arayevɨ kotɨ güi oreve, jare mókoi araa pe rojo roväe tëta guasu Puteoli pe.

¹⁴ Joko pe roväe oporogüɨrovia vae reta. Jare jae reta oparea oreve ropɨta vaerä jae reta ndive chiu ara pegua. Joko güi rojo tëta guasu Roma kotɨ.

¹⁵ Jare orerërakua oporogüɨrovia vae Roma pegua reta pe, jare amogüe jae reta yogüeru orerövaiti tëta Foro Apio pe, jare ïru vae reta yogüeru orerövaiti tëta Tres Tabernas pe. Pablo oecha yave kuae reta, omee yasoropai Tumpa pe, jare oñemoäta ngatu.

¹⁶ Jare rojo roväe yave Roma pe, cien sundaro vae juvicha omee tembipɨɨ reta metei sundaro reta juvicha tenondegua ete pe. Ërei omaeño Pablo re oikoiño vaerä metei sundaro oäro vae ndive.

Pablo omoërakua ñee ikavi vae Roma pe

¹⁷ Jare mboapɨ ara ma oasa güire, Pablo oenɨiuka judío reta itenondegua reta. Jare oyemboatɨ reta yave, jae jei chupe reta: —Tëtara reta, yepe tëi ayapoä mbae nunga teko ñanerëtaɨgua reta kotɨ ani ñaneñemuñagüe reta iporomboe kotɨ, ërei Jerusalén pegua reta chepɨɨ chemee Romaɨgua reta ipo pe.

¹⁸ Jare jae reta oparandu cheve güire, oipota tëi cheyora, ayapoä mbae nunga teko amano vaerä ramo.

¹⁹ Ërei judío reta oyovaicho cheré ramo, aiporu mburuvicha guasu César ayu vaerä chejäa, mbaetɨ ayu amboeko vaerä cherëtaɨgua reta.

²⁰ Jáeramo che poenɨi poecha vaerä jare chemiari vaerä pe ndive. Echa yande Israel pegua reta ñaäro vae re ko ayepokua aï kuae karena pe.

²¹ Jayave jae reta jei chupe: —Mbaetɨ kia ombou tupapire oreve Judea güi nderegua. Jare mbaetɨ vi ou metei ave ñanerëtara joko güi omombeu vaerä oreve ani jei vaerä ikavimbae vae nderegua.

²² Ërei roipota roikuaa ndegüi etei mbae ra reyemongeta vae. Echa roikuaa opaete rupi jërakua ikaviä ko kuae mboromboe.

²³ Jayave jei reta Pablo pe mbae ara pe yogüeruta vae. Jayave jókuae ara jeta vae yogüeru Pablo oïa pe. Jare ndeimbove güive Pablo ikaaru omombeu chupe reta Tumpa iporookuaía regua. Jare Moisés iporookuai rupi jare ñeemombeúa reta oikuatiagüe rupi, güɨroviauka chupe reta Jesús regua.

²⁴ Jare amogüe güɨrovia Pablo jei vae. Ërei ïru vae reta mbaetɨ güɨrovia.

²⁵ Jáeramo oyemboyao reta oyougüi, jare yogüɨraja Pablo oïa güi yave jei chupe reta: —Jaekavi jei Espíritu Santo ñeemombeúa Isaías rupi ñaneñemuñagüe reta pe. Echa jei körai:

²⁶ “Ekua jare ere kuae tëta pe: Peendu tëita, ërei ngaraa peikuaa. Peecha tëita, ërei ngaraa peecha.

²⁷ Echa kuae reta ipɨatäta, jare iyapɨsa pe oendu reta tëi, jare oñesaöva reta, agüɨye vaerä oecha reta jesa pe, jare agüɨye vaerä oendu iyapɨsa pe, jare agüɨye vaerä oikuaa ipɨa pe, jare agüɨye vaerä oyerova chekotɨ, ambogüera reta vaerä.”

²⁸ Peikuaa kuae, añave güive Tumpa iporomboasa güeru judiombae vae reta pe. Jare jae reta oyeapɨsakata jese.

²⁹ Jare kuae Pablo opa jei yave, judío reta yogüɨraja oyoaka reve oyoupii.

³⁰ Jare Pablo mókoi año oiko metei o omboepɨ vae pe. Joko pe omboresive opaete yogüeru opou ípɨri vae reta.

³¹ Jare omombeu reve Tumpa iporookuaía regua, jare oporomboe yandeYa Jesucristo re okɨɨyembae reve, jare mbaetɨ kia omboavai.