Hechos 27 - Biblia Guarani Tumpa Iñee

Omondo reta Pablo Roma pe

¹ Jare mburuvicha reta oyemongeta ma oremondo vaerä ɨvɨ Italia pe yave, omee reta Pablo jare amogüe ïru tembipɨɨ reta cien sundaro vae juvicha Julio jee vae pe. Jae ko metei atɨ Augusto jee vae juvicha.

² Jare rojo joko güi metei barco pe tëta guasu Adramitio pegua pe. Kuae ojota Asia pegua tëta guasu reta ɨguasu jembeɨ pe ñogüɨnoi vae reta rupi. Ojo orerupíe Aristarco Tesalonicaɨgua jae ko ɨvɨ Macedonia pegua.

³ Pɨareve pe rojo roväe tëta guasu Sidón pe. Jare Julio ipɨakavi Pablo pe. Jáeramo omaeño jese ojo vaerä opou ivɨa-ïru reta pɨri, jae reta oyangareko vaerä jese.

⁴ Jayave joko güi rojo ye ɨguasu rupi, jare roasa ɨguasu-päu Chipre iä rupi, agüɨye vaerä ɨvɨtu orerövaiti.

⁵ Jayave roasa ɨguasu rupi ɨvɨ Cilicia jare Panfilia jóvai rupi, jare rojo roväe tëta guasu Mira pe, ɨvɨ Licia pegua pe.

⁶ Jare joko pe cien sundaro vae juvicha oväe metei barco Alejandría pegua ojota Italia kotɨ vae, jare pɨpe oremboyeupi.

⁷ Jeta ara rojo mbegüe, jare yavai yae reve rojo roväe tëta guasu Gnido jóvai, ɨvɨtu orerövaiti ramo. Jare Gnido güi rojo ɨguasu-päu Creta iä rupi ɨvɨ Salmón jóvai rupi.

⁸ Jare rojo ɨguasu jembeɨ rupi, jare yavai yae reve rojo roväe Buenos Puertos pe. Kuae güi köiño oï tëta guasu Lasea.

⁹ Jare ɨma yae ma roguata ramo, ikaviä ma rojoño vaerä ɨguasu rupi. Echa oyearo ma iroɨ vaerä ramo, Pablo omboarakuaa reta,

¹⁰ jei chupe reta: —Tëtara reta, yajaño yave, yavai yaeta ko jare jetata mbae okañɨ; mbaetɨta okañɨ voɨtaño ani barco, yande vi güɨramoi ñamanota.

¹¹ Ërei cien sundaro vae juvicha güɨrovia katu barco jeroataa jare barco iya Pablo jei vae güi.

¹² Jare jókuae barco reta ipɨtaa mbaetɨ ikavi ropɨta vaerä opaete iroɨ guasu iara oasa regua. Jáeramo opaete seri ore ndive ñogüɨnoi vae reta ikɨ̈reɨ rojoño vaerä joko güi. Jei reta güɨramoi orepuereta rojo roväe tëta guasu Fenice pe, ropɨta vaerä joko pe iroɨ guasu iara pegua. Fenice ko jae barco ipɨtaa Creta pegua. Joko güi ɨguasu oyekuaa ɨvɨtuguasu kuaraɨ oëa kotɨ mí jare arayevɨ kotɨ kuaraɨ oikea kotɨ mí.

Ɨvɨtuai tätagüe ɨguasu pe

¹³ Jare ɨvɨtu omboɨpɨ oyepeyu mbegüe kavi arayevɨ kotɨ güi yave, jae reta jei ikavi yae rojo vaerä. Jayave barco jeroataa reta oupi barco iyepɨtasoka, jare rojo ɨguasu jembeɨ Creta iyɨ́vɨri rupi.

¹⁴ Ërei ndei ɨma mbove ɨvɨtuai Euroclidón jee vae, oövaiti barco.

¹⁵ Jókuae ɨvɨtuai oipota omboyerova barco, jare orepuereä ma romomae ɨvɨtu kotɨ ramo, romaeño orereraja.

¹⁶ Jare rojo yave ɨguasu-päu Clauda iä rupi, añeapea roupi barco raɨ barco jaɨkue rombotɨrɨrɨ vae.

¹⁷ Jare oupi reta ma barco pe yave, barco jeroataa reta oyokua barco tɨmasa pe. Jare oyemongeta reta güɨramoi ojota oyepókoi ɨvɨkuitï Sirte jee vae pe, jare okɨɨye reta. Jáeramo ombogüeyɨ reta barco iguataka tuicha vae ɨvate güi. Jare ropɨta ɨvɨtu jeia re.

¹⁸ Jare jeieteño ɨvɨtu oreve. Jáeramo pɨareve pe barco jeroataa vae reta omboɨpɨ omombo voɨta reta.

¹⁹ Jare mboapɨ araa pe ipo pe etei omombo reta jókuae barco pegua tembiporu reta.

²⁰ Mbaetɨ oyekuaa kuaraɨ jare yasɨtata mbovɨ ara rupi ma, jare ɨvɨtuai täta oreve jeko pegua, mbaetɨ ma roäro roasayepeta vae.

²¹ Jare mbovɨ ara yae ma mbaetɨ rokaru yave, Pablo oyemboɨ mbɨte pe jare jei: —Kuimbae reta, peyeapɨsakata tëi ko cheñee re, agüɨye vaerä tëi yayu Creta güi pemokañɨtei opaete kuae mbaembae.

²² Ërei añave che jae peve peñemoäta ngatu vaerä. Echa ngaraa kia omano pepɨte pe. Jaeño barco okañɨteita.

²³ Echa pɨare oyekuaa cheve metei Tumpa iaraɨgua. Jókuae Tumpa imbae ko che jare chupe ayeokuai.

²⁴ Araɨgua jei cheve: “Pablo, agüɨye ekɨɨye, echa reo ñotai ko reyemboɨ César jóvai. Jare Tumpa ipɨakavi nde ndive ramo, oepɨta vi opaete kuae nderupíe yogüɨraja vae reta.”

²⁵ Jáeramo, kuimbae reta, peñemoäta ngatu. Echa che arovia Tumpa, jare jae jei cheve vae oyembopota ko.

²⁶ Ërei yaja ñotai ko ñaväe metei ɨguasu-päu pe.

²⁷ Jare catorce ara oasa ma yave, ɨvɨtu orereraja ramboeve Ɨguasu Adriático rupi, pɨare mbɨte yave barco jeroataa reta oikuaa köiño ma yogüɨraja ɨvɨ güi.

²⁸ Jayave ojäa reta ɨ tɨpɨgüe yave, oikuaa ɨ tɨpɨgüe güɨnoi treinta y seis metro rupi. Jare rojo katu ye ma yave, ojäa ye, jare ɨ tɨpɨgüe güɨnoi veintisiete metro rupi.

²⁹ Jayave jae reta okɨɨye oyererokuata ita reta re ramo, ombogüeyɨ reta irundɨ barco iyepɨtasoka reta juguai kotɨ. Jare oipotaecha ma köe vaerä tëi chupe reta.

³⁰ Jare barco jeroataa reta oipota tëi opa otekuarai barco güi. Jáeramo ombogüeyɨ barco raɨ ɨ pe, barco iyepɨtasoka reta ombogüeyɨta jenonde kotɨ rupi vae rami oyeapo reta.

³¹ Ërei Pablo jei cien sundaro vae juvicha jare sundaro reta pe: —Kuae reta mbaetɨ opɨta barco pe yave, pe reta ngaraa pepuere peyereroasayepe.

³² Jayave sundaro reta oyasɨa barco raɨ iïcha, jare omaeño okañɨ.

³³ Jare köe ma ou yave, Pablo omboarakuaa opaete joko pe ñogüɨnoi vae reta okaru vaerä. Jei chupe reta: —Catorce ara ma pekeä, jare mbaetɨ etei mbae ave peu.

³⁴ Jáeramo che pomoñera pekaru, pepɨ̈rata vaerä. Echa ngaraa metei pea ave okañɨ peäka güi.

³⁵ Jare kuae jei güire, oipɨɨ mbɨyape, jare omee yasoropai Tumpa pe opaete vae jovake. Jayave opɨ̈saa mbɨyape jare jou.

³⁶ Jayave opaete jae reta oñemoäta ngatu, jare okaru reta vi.

³⁷ Opaete reve roï barco pe vae ko dosciento setenta y seis.

³⁸ Jare opareve iyangapɨɨ yave, omombo reta trigo ɨguasu pe, ombovevɨi vaerä barco.

Barco okañɨ ɨguasu pe

³⁹ Jare köe ma yave, mbaetɨ oikuaa reta jókuae ɨvɨ. Ërei oecha reta metei ɨ jugua jare ɨvɨ ipe kavi joko pe. Jáeramo jokotɨ oipota reta omboya barco, ipuere yave.

⁴⁰ Jayave jae reta omombo oeya ɨ pe barco iyepɨtasoka reta, jare omongúe timón iïcha. Jayave oupi barco iguataka michi vae, jare güɨraja ɨ jembeɨ kotɨ.

⁴¹ Jayave barco ojo oyererokua ɨvɨkuitï re oyepókoi ndei ojo oväe ɨ jugua pe mbove. Echa joko pe ɨ oyoasa oï. Jare barco itï oyeatɨka joko pe, jare mbaetɨ ye omɨi. Jayave ɨguasu iyɨaparúa omboɨpɨ oyoka barco juguai kotɨ.

⁴² Jare sundaro reta oipota tëi oyuka tembipɨɨ reta, agüɨye vaerä metei ave oɨtai otekuarai.

⁴³ Ërei cien sundaro vae juvicha oipota oepɨ Pablo ramo, jei sundaro reta pe agüɨye vaerä oyuka reta. Oyókuai ipuere oɨtai vae reta räri oa vaerä ɨ pe, yogüɨraja vaerä oväe ɨvɨ pe.

⁴⁴ Jare oyókuai ïru reta yogüɨraja vaerä ɨvɨrape re ani oipotagüe barco pe oï vae re. Jare jökorai opaete reve oë reta ɨguasu güi.