Hechos 25 - Biblia Guarani Tumpa Iñee

Pablo oiporu ojo vaerä mburuvicha guasu César jóvai

¹ Festo ou oväe jókuae ɨvɨ pe, jare mboapɨ araa pe ojo Cesarea güi Jerusalén pe.

² Jayave sacerdote reta itenondegua reta jare judío tuichagüe yae joko pe vae reta oñeapo reta chupe Pablo re, jare omoñera

³ oyapo vaerä ikavi vae chupe reta, güeruruka vaerä Pablo Jerusalén pe. Ërei jae reta yepe oyemongeta okätɨrota vaerä jese tape rupi, oyuka vaerä.

⁴ Ërei Festo jei chupe reta oime ko Pablo oyepɨɨ oï Cesarea pe vae jare jae ojo yeta ko ɨmambaeño joko pe.

⁵ Jare jei chupe reta: —Pegüi reta oime yave kia, tojo cherupíe. Jare oyapo yave teko ikavimbae vae jókuae kuimbae, peñeapo jese joko pe.

⁶ Festo opɨta Jerusalén pe juri ani payandepo ara rupi güire ou ye Cesarea pe. Jayave pɨareve pe oguapɨ oporojäaa pe, jare omondo güeruruka Pablo.

⁷ Jare Pablo ou ma yave, judío Jerusalén güi yogüeru vae reta oyemboya Pablo re jare omboeko jeta mbae ikavimbae yae vae re. Ërei mbaetɨ ipuere oechauka reta teko añete vae jesegua.

⁸ Jayave Pablo oñemoe iyé, jei: —Mbaetɨi ayovaicho judío reta iporookuai kotɨ, tupao kotɨ ani César kotɨ ave mbaetɨ cheyoa.

⁹ Ërei Festo oipota omboyerovia judío reta ramo, oparandu Pablo pe: —¿Reipota pa reo Jerusalén pe, rojäa vaerä joko pe kuae teko reta re?

¹⁰ Ërei Pablo jei chupe: —Cesar ko neñono reporojäa vaerä, ikavi ko nde chejäa kuae pe. Ayapoä etei mbae ikavimbae judío reta kotɨ. Nde etei reikuaa rami.

¹¹ Echa oime yave mbae ikavimbae yae ayapo amano vaerä, ngaraa etei mbae jae. Ërei kuae teko omboya reta cheré vae ayapoä reve, ngaraa kia ipuere chemee chupe reta. Aiporu mburuvicha guasu César chejäa vaerä.

¹² Jayave Festo oñomomiari ïru mburuvicha reta ndive yave, jei Pablo pe: —Reiporu César nejäa vaerä. Jayave reota César jóvai.

Pablo, Agripa jare Berenice jóvai

¹³ Mbovɨ ara ma oasa yave, mburuvicha guasu Agripa jare jeindɨ Berenice yogüeru Cesarea pe, opou vaerä Festo pɨri.

¹⁴ Jare mbovɨ ara ma joko pe ñogüɨnoi yave, Festo omombeu mburuvicha guasu pe Pablo regua. Jei chupe: —Oime kuae pe metei kuimbae Félix oeya tembipɨɨrɨru pe vae.

¹⁵ Jerusalén pe aja yave, sacerdote reta itenondegua reta jare tëta guasu pegua reta itenondegua reta oiporu cheve oyeyukauka vaerä.

¹⁶ Ërei che jae chupe reta: “Romaɨgua reta mbaetɨ ko omee kia omano vaerä, ndei omboeko vae reta yogüeru oñeapo jese mbove jare ndei oyeepɨ omboeko vae reta güi mbove.”

¹⁷ Jáeramo jae reta yogüeru oväe yave, mbaetɨ aäro. Jókuae pɨareve pe voi aguapɨ aporojäaa pe jare aruruka jókuae kuimbae.

¹⁸ Jare omboeko vae reta kuae pe ma ñogüɨnoi yave, mbaetɨ etei omombeu reta cheve, cheyemongeta pe omboya retata teko jese vae.

¹⁹ Jaeño omboeko reta jae iporogüɨrovia re, jare metei kuimbae Jesús jee vae omano ma vae re. Ërei Pablo jei oikove ye ko.

²⁰ Che mbaetɨ aikuaa mbae ra ayapota kuae re ramo aparandu Pablo pe oipotata ra ojo Jerusalén pe, jare joko pe che ajäa vaerä kuae mbaembae re.

²¹ Ërei Pablo oiporu Augusto César ojäa vaerä. Jáeramo ayókuai sundaro reta oäro vaerä, jókuae mburuvicha jóvai amondo regua.

²² Jayave Agripa jei Festo pe: —Che aipotaecha vi ayeapɨsaka jókuae kuimbae re. Jayave Festo jei chupe: —Pɨareve reyeapɨsakata jese.

²³ Jayave pɨareve pe, Agripa jare Berenice yogüeru jemimonde ipöra vae ndive, jare oike reta Festo oporojäaa vae pe sundaro jeta vae juvicha reta jare tëta guasu pegua reta itenondegua reta ndive. Jayave Festo oyókuai güeru vaerä Pablo.

²⁴ Jayave Festo jei: —Mburuvicha guasu Agripa, jare opaete pe reta kuae pe peï ore ndive vae, ko oï kuae kuimbae. Opaete judío reta Jerusalén pe jare kuae Cesarea pe oiporu reta osapúkai reve oyeyuka vaerä.

²⁵ Ërei che mbaetɨ aväe teko jese omano vaerä. Jare jae etei oipota mburuvicha guasu Augusto ojäa vaerä. Jáeramo ayemongeta ma amondo vaerä ikotɨ.

²⁶ Ërei mbaetɨ aikuaa mbae re ra aikuatiata cheruvicha pe ramo aruruka peróvai, jare nderóvai etei, mburuvicha guasu Agripa, aikuaa vaerä mbae re aikuatiata, opa yaparandu chupe yave.

²⁷ Echa mbaetɨ ko jaekavi yamondo vaerä metei tembipɨɨ mbaetɨ reve yamombeu mbae teko ra güɨnoi vae.