Hechos 24 - Biblia Guarani Tumpa Iñee

Pablo oñemoe iyé Félix jóvai

¹ Pandepo ara ma oasa yave, yogüeru sacerdote tenondegua ete Ananías, amogüe tëta guasu pegua reta itenondegua reta ndive jare metei kuimbae Tértulo jee vae. Kuae kuimbae ko iyarakuaa katu imiari vaerä. Jae reta oñeapo Pablo re ɨvɨruvicha pe.

² Jare Pablo güeru reta ma jóvai yave, Tértulo omboɨpɨ omboeko Pablo. Jei reve Félix pe: —Ndereko pegua orepɨakatu roiko. Ndearakuaa jeko pegua reporookuai kavi jeta mbaembae re oreɨvɨ pe.

³ Oreruvicha tuichagüe vae Felix. Opaete kerupi jekuae avei royapo yasoropai ndeve opaete kuae re.

⁴ Ndepɨakavi ramo, romoñera reyeapɨsaka vaerä oreré michi pegua yepe, agüɨye vaerä romoambeko mbatee.

⁵ Echa roikuaa ma kuae kuimbae ko mbaerasɨ ikavimbae rami. Jae omopüa judío reta oyokotɨ opaete kerupi. Jare jae ko Nazaret-ɨgua jupiegua reta itenondegua.

⁶ Jae oipota vi omongɨa tupao. Ërei ore roipɨɨ, jare rojäata tëi oreporookuai pe oyekuatía oï vae rupi.

⁷ Ërei Lisias sundaro jeta vae juvicha ou rai rai opɨ̈ro oregüi jare güɨraja.

⁸ Jare oyókuai omboeko vae reta yogüeru vaerä ndekotɨ. Ërei añave nde etei rejäa yave, reikuaata mbae re ko romboeko vae.

⁹ Judío reta jei vi añete ko opaete kuae mbaembae.

¹⁰ Jayave ɨvɨruvicha jei ipo pe Pablo imiari vaerä. Jare jae jei: —Che aikuaa katu ko nde ɨma rupi ma reporojäa kuae ɨvɨ pe, jáeramo chepɨakatu reve añemoeta cheyé.

¹¹ Nde ndepuere reparandu reikuaa vaerä, doce ara ramo aja Jerusalén pe, amboete vaerä Tumpa.

¹² Jare kuae reta mbaetɨ chereecha ayoaka kia ndive, ani amboemboe tëta guasu pegua reta tupao pe, ani judío reta itupao reta pe, ani tëta guasu pe.

¹³ Ërei mbaetɨ ipuere oechauka reta añete vae ndeve cheregua chemboeko vaerä.

¹⁴ Ërei kuae amombeu ndeve. Che aguata Tape pɨau pe, ayeokuai cheñemuñagüe reta iTumpa pe, judío reta ombojee mboromboe añetembae pe vae. Arovia reve opaete mborookuai pe oyekuatía oï vae, jare ñeemombeúa reta oikuatiagüe.

¹⁵ Che arovia ko jae reta rami Tumpa omoingove yeta omanogüe reta. Oikove yeta jupi vae reta jare jupimbae vae reta.

¹⁶ Jáeramo che aipota chepɨa ikavi avei anoi vaerä Tumpa kotɨ jare ɨvɨ pegua reta kotɨ.

¹⁷ Ɨma pe ayu ye cheɨvɨ pe. Aru mbota iparavete vae reta peguarä jare Tumpa peguarä, añererökuavee chupe rami.

¹⁸ Jare kuae ayapo aï ramboeve, amogüe Asia pegua judío reta chereecha tupao pe. Joko pe ayetɨo aï Tumpa jóvai mborookuai jei rami. Mbaetɨ aï jeta vae ndive ani ayapo tekorai.

¹⁹ Jaekavi yae ko jókuae judío reta yogüeru vaerä tëi kuae pe oñeapo cheré ndeve, oime yave mbae re chemboeko vaerä.

²⁰ Ani kuae reta etei tomombeu ndeve mbae nunga teko ra oväe cheré, mburuvicha judío reta jóvai aï yave.

²¹ Güɨramoi jaeño metei mbae re ipuere chemboeko. Mburuvicha reta ipɨte pe aï yave cheñeeäta reve jae: “Omanogüe vae reta oikove yeta vae re pe reta chejäa peï kuae ara.”

²² Jare Félix kuae oendu yave oeya räri. Echa jae oikuaa kavi ma jókuae Tape pɨau regua ramo, jei judío reta pe: —Lisias sundaro jeta vae juvicha ou yave, aikuaa kavita kuae pemombeu cheve vae re.

²³ Jayave Félix oyókuai cien sundaro vae juvicha oäro vaerä Pablo. Oyókuai vi oikoiño vaerä, jare agüɨye vaerä oyopia jëtara reta, ou yave ípɨri omborɨ vaerä.

²⁴ Mbovɨ ara pe Félix ou jembireko Drusila ndive. Drusila ko jae metei judía. Jayave Félix oenɨi Pablo, jare oyeapɨsaka mborogüɨrovia oï Jesucristo re vae re.

²⁵ Ërei Pablo jei chupe kërai ikavi yayapo vaerä jupi vae, jare yayopia vaerä yanderete oipota vae güi, jare kërai Tumpa ojäata ɨvɨ pegua reta. Félix kuae oendu yave okɨɨye jare jei Pablo pe: —Ekuaño räri. Chepuere yave, toroenɨi ye kuri.

²⁶ Ërei Félix oipota tëi vi Pablo omee vaerä korepoti chupe, oyorauka vaerä. Jáeramo güeruruka avei, imiari vaerä jae ndive.

²⁷ Ërei mókoi año ma oasa yave, Porcio Festo ou Félix jekovia pe. Jare Félix oipota omboyerovia judío reta ramo, oeya Pablo tembipɨɨrɨru pe.