Hechos 22 - Biblia Guarani Tumpa Iñee

¹ “Tëtara reta jare cheru reta, peyeapɨsaka añemoeta peve cheyé vae re.”

² Jare tëta guasu pegua reta oendu jae imiari chupe reta ñee hebreo pe yave, opareve kïrii ngatu kavi. Jare Pablo jei chupe reta:

³ “Che ko jae metei judío. Aa Tarso Cilicia pegua pe, ërei akuakuaa kuae tëta guasu pe. Gamaliel chemboe kavi ñaneñemuñagüe reta iporookuai re. Che ayapo avei Tumpa jei vae, opaete pe reta añave peyapo rami.

⁴ Che ayapo ikavimbae vae opaete Tape pɨau rupigua reta pe ayuka regua. Aipɨɨ añoñauka tembipɨɨrɨru pe kuimbae reta jare kuña reta.

⁵ Sacerdote tenondegua jare opaete tëta guasu pegua reta itenondegua reta timiari peve cheregua. Jae reta oikuatía omee cheve tupapire jesegua reta araja vaerä ñanerëtara judío reta Damasco pe yogüɨreko vae reta pe. Jare aja aipɨɨ vaerä Jesús re güɨrovia vae joko pe ñogüɨnoi vae reta, aru vaerä Jerusalén pe, aiporarauka vaerä tëi chupe reta.

Pablo imiari kërai ko oporogüɨrovia vae re

⁶ Ërei köiño ma Damasco güi aja yave, kuaraɨ ara mbɨte rupi yave, güɨramoiño ou metei tembipe tuicha vae ara güi cheré.

⁷ Jare aa ɨvɨ re, jare aendu metei ñee jei cheve: ‘Saulo, Saulo, ¿maera pa reñemopüa chekotɨ?’

⁸ Jayave che jae: ‘¿Kia pa ko nde, cheYa?’ Jayave jae jei cheve: ‘Che ko jae Jesús Nazaret pegua. Nde reñemopüa ikotɨ vae.’

⁹ Jare che ndive ñogüɨnoi vae reta oecha tembipe, jare okɨɨye reta. Ërei mbaetɨ oikuaa mbae jei jókuae imiari che ndive vae.

¹⁰ Jayave che aparandu: ‘¿Mbae pa ayapota, cheYa?’ Jare yandeYa jei cheve: ‘Epüa ekua Damasco pe, jare joko pe amombeuukata ndeve opaete mbae reyapota vae.’

¹¹ Jayave che ndive ñogüɨnoi vae reta chepoko chereraja Damasco pe. Echa chepuereä etei aecha mbae, jókuae tembipe jeko pegua.

¹² Jare oiko joko pe metei kuimbae Ananías jee vae. Jae oipoɨu Tumpa güi mborookuai oyapo reve, jare opaete judío joko pe yogüɨreko vae reta imiari kavi jese.

¹³ Jae ou chépɨri, jei cheve: ‘Tëtara Saulo, emae ye.’ Jare jupiveiño amae, jare aecha Ananías.

¹⁴ Jayave jae jei cheve: ‘Ñaneñemuñagüe reta iTumpa ndeparavo, reikuaa vaerä jae jemimbota, reecha vaerä jókuae Jupi vae jare reendu vaerä iñee.

¹⁵ Echa nemiarita jesegua opaete ɨvɨ pegua reta pe. Remombeuta chupe reta reecha jare reendu vae.

¹⁶ Añave ¿mbae pa reäro? Epüa eyembobautisauka reyerure reve chupe, ndeyoa reta oyemboai vaerä.’

¹⁷ Jare ayu ye ma Jerusalén pe yave, ayerure aï ramboeve tupao pe, chekera.

¹⁸ Jare aecha Jesús, jei cheve: ‘Eë jarembae Jerusalén güi. Echa ngaraa oipota güɨrovia nde remombeuta cheregua chupe reta vae.’

¹⁹ Jayave che jae chupe: ‘CheYa, jae reta oikuaa katu ko kërai che ajase opaete judío reta itupao reta rupi añonouka vaerä tembipɨɨrɨru pe jare ainupauka vaerä nderé güɨrovia vae reta.

²⁰ Jare oyuka reta yave Esteban nderegua omombeu vae, che vi aï joko pe, jare jaekavi cheve imano. Jare che ayangareko oporoyuka vae reta jemimonde re.’

²¹ Jayave jae jei cheve: ‘Ekua. Echa che romondota mombɨrɨ judiombae vae reta kotɨ.’ ”

Pablo oï sundaro jeta vae juvicha ipo pe

²² Jare Pablo kuae jei yave, tëta guasu pegua reta mbaetɨ ma oipota oyeapɨsaka jese. Osapúkai reve jei reta: “Tomano jókuae kuimbae. Echa jupía oikove oiko vaerä.”

²³ Jare jae reta jeiete osapúkai, ombovava jemimonde, jare ɨvɨkúi omombo ɨvate ramo.

²⁴ Sundaro jeta vae juvicha oyókuai sundaro reta güɨroike vaerä Pablo sundaro rëta pe. Jare oyókuai vi oinupa reta vaerä chikote pe, omombeu vaerä mbae jeko pegua ra tëta guasu pegua reta osapúkai jökorai ikotɨ.

²⁵ Ërei sundaro reta oipokua ma yave kuyunda pe, Pablo jei cien sundaro vae juvicha joko pe oï vae pe: “¿Jupi pa peinupa vaerä metei Romaɨgua pejäambae reve?”

²⁶ Kuae oendu yave, cien sundaro vae juvicha ojo omombeu sundaro jeta vae juvicha pe: —¿Mbae pa reyapota? Kuae kuimbae Romaɨgua yepe.

²⁷ Jayave sundaro jeta vae juvicha ou Pablo oïa pe jare jei chupe: —¿Añete pa nde Romaɨgua? Jayave Pablo jei chupe: —Jae ko che.

²⁸ Jayave sundaro jeta vae juvicha jei chupe: —Che jeta amboepɨ ayeapo vaerä Romaɨguarä. Jayave Pablo jei chupe: —Che aa güive voi ma Romaɨgua.

²⁹ Jayave oyembosɨrɨ Pablo güi oinupata tëi vae reta. Jare sundaro jeta vae juvicha ave okɨɨye, oikuaa yave jae Romaɨgua ko, oipokua ramo.

Pablo mburuvicha judío reta jóvai

³⁰ Jare pɨareve pe sundaro jeta vae juvicha oipota oikuaa kavi mbae re ra judío reta omboeko Pablo. Jáeramo oyora Pablo, jare oyókuai sacerdote reta itenondegua reta jare opaete mburuvicha judío reta oyemboatɨ vaerä. Jayave güɨnoe Pablo oñono jae reta jóvai.