Hechos 20 - Biblia Guarani Tumpa Iñee

Pablo ojo Macedonia jare Grecia kotɨ

¹ Oasa güire jókuae tekorai, Pablo oenɨi oporogüɨrovia vae reta, jare opa omboarakuaa reta yave, oiküava jare ojo chugüi reta Macedonia kotɨ.

² Jare opa yave omboapɨ tëta reta omboarakuaa kavi reve oporogüɨrovia vae reta, ojo oväe ɨvɨ Grecia pe.

³ Opɨta joko pe mboapɨ yasɨ. Jare barco pe ojota Siria kotɨ yave, oikuaa judío reta oyomboemboe oyapo vaerä ikavimbae vae chupe. Jáeramo Pablo ojo ye ɨvɨ rupi Macedonia rupi.

⁴ Jare yogüɨraja jupíe Sópater Berea pegua; Aristarco jare Segundo Tesalónica pegua reta; Gayo Derbe pegua; Timoteo, Tíquico jare Trófimo Asia pegua reta.

⁵ Kuae reta yogüɨraja tenonde, jare oreräro Troas pe.

⁶ Ërei ore arete mbɨyape oyembovumbae pegua oasa yave, rojo barco pe Filipos güi, jare pandepo araa pe rojo roväe chupe reta Troas pe. Joko pe ropɨta chiu ara.

Pablo opou Troas pe

⁷ Jare tenondegua ara semana iyɨpɨ pe oporogüɨrovia vae reta oyemboatɨ opɨ̈saa vaerä mbɨyape yave, Pablo pɨareve pe ma ojota ramo, ipɨarembɨte oporomboe.

⁸ Jare jeta mechero oï jókuae o ɨvategua pe yatɨ ñogüɨnoia pe;

⁹ jare metei kunumi Eutico jee vae oguapɨ oï ventana pe, jare täta jopeɨ oï, Pablo jeiete puku oporomboe ramo kunumi oke jare oa jókuae o mboapɨ yoaramboa güi oka kotɨ ɨvɨ pe. Jare omopüa reta jëogüegüe.

¹⁰ Jayave Pablo ogüeyɨ jare oyapakua kunumi re, oiküava jare jei: —Agüɨye pekɨɨye, oikove ko oï.

¹¹ Jayave Pablo oyeupi ye, jare joko pe ñogüɨnoi vae reta opɨ̈saa oyoupe mbɨyape jare okaru reta güire Pablo iköe omboe reta. Javoi ojo chugüi reta.

¹² Jare joko pe yatɨ vae reta güɨraja kunumi oikove ye vae, jare ipɨakatu yae reta.

Pablo ojo Troas güi Mileto pe

¹³ Jare ore räri rojo barco tëta guasu Asón pe, joko pe roupi vaerä Pablo, jae jei rami. Echa jae ikɨ̈reɨ ojo ɨvɨ rupi.

¹⁴ Jare roñoväe yave jae ndive Asón pe, Pablo oyeupi barco pe, jare rojo päve ɨvɨ Mitilene pe.

¹⁵ Jare joko güi rojo ye barco pe, jare pɨareve pe rojo roväe ɨvɨ Quío jóvai. Joko güi pɨareve pe rojo roväe ɨvɨ Samos pe barco reta opɨtaa pe. Joko güi rojo ropɨta ɨvɨ Trogilio pe, joko güi pɨareve pe rojo roväe tëta guasu Mileto pe.

¹⁶ Echa Pablo ikɨ̈reɨ oasa güɨrave Efeso güi, agüɨye vaerä opɨta Asia pe. Echa jae ikɨ̈reɨ oï Jerusalén pe Pentecostés iara pe, ipuere yave.

Pablo oñemoñee Mileto pe

¹⁷ Jare Mileto güi Pablo omondo Efeso pe oenɨiuka oporogüɨrovia vae reta itenondegua reta.

¹⁸ Jae reta yogüeru oväe Pablo oïa pe yave, jei chupe reta: “Pe reta peikuaa katu ko kërai aiko pe reta ndive tenonde ete Asia pe ayu ɨpɨ güive.

¹⁹ Ayeokuai yandeYa pe añemomichi reve jare cheresaɨ reve, Judío reta chemboavai jare ikɨ̈reɨ oyapo reta ikavimbae cheve vae jeko pegua.

²⁰ Ërei mbaetɨ aipoɨu amoërakua vaerä peve opaete ikavi peve peguarä vae. Jare pomboe jeta vae jovake jare pero reta rupi vi.

²¹ Amombeu reve judío reta jare judiombae vae reta pe oyerova vaerä Tumpa kotɨ jare güɨrovia yandeYa Jesucristo re.

²² Jare añave, ko aja Jerusalén kotɨ Espíritu Santo chemondo ramo, aikuaambae reve mbae ra cheräro joko pe.

²³ Jaeño aikuaa opaete tëta guasu reta rupi Espíritu Santo omombeu cheve cheräro tembipɨɨrɨru jare jeta tembiporara.

²⁴ Ërei mbaetɨ akɨɨye. Mbaetɨ aɨu cherekoveño. Jaeño aipota amboapɨ kavi ayerovia reve mbaravɨkɨ yandeYa Jesús omee cheve vae. Echa jae cheokuai chemiari vaerä ñee kavi Tumpa ipɨakavi regua.

²⁵ Jare añave aikuaa katu opaete pe reta, amoërakua peve Tumpa iporookuaía regua vae reta, ngaraa ma chereecha ye.

²⁶ Jáeramo añave jae peve, che mbaetɨ etei anoi teko peve.

²⁷ Echa amombeu kavi peve opaete Tumpa jei vae.

²⁸ Jáeramo peyeandu jare peyangareko opaete oporogüɨrovia vae reta re, Espíritu Santo peparavo peyangareko jese vaerä vae reta re. Jókuae yandeYa oiparavo vae reta re, jae ogua jugüɨ ae pe vae.

²⁹ Che aikuaa katu ko aja ma yave, oiketa pepɨte pe aguarayaɨmba rami vae reta, jae reta ikɨ̈reɨta opa omokañɨtei oporogüɨrovia vae reta.

³⁰ Jare pepɨte güi etei omopüata kuimbae oporomboeta añetembae re vae reta. Kuae reta ombojopata oporogüɨrovia vae reta.

³¹ Jáeramo peyeandu jare pemaendúa kërai mboapɨ año rupi cheresaɨ reve pomboarakuaa metei ñavo ara rupi jare pɨ̈tu rupi vae re.

³² Añave cherɨvɨ reta, poeya Tumpa jare iñee ipɨakavi pegua pe. Echa kuae ñee güɨnoi mbaepuere pemomɨ̈rata jare omee peve pembaerä opaete jókuae oñeñono tee Tumpa peguarä vae reta ndive.

³³ Mbaetɨ aipota amae ïru vae ikorepoti, ioro ani jemimonde re.

³⁴ Pe reta peikuaa katu ko kërai chepo pe etei aparavɨkɨ, mbaembae oata cheve vae anoi vaerä, jare amee vaerä cheïru reta pe.

³⁵ Pomboe kavi ma kërai ikavi ko jökorai yaparavɨkɨ yamborɨ vaerä mbae oata chupe vae reta. Yandemaendúa reve yandeYa Jesús iñee re, echa jei: ‘Mbae ñamee vae ko ikavi, mbae oñemee yandeve vae güi.’ ”

³⁶ Jare kuae opa jei güire, Pablo oyetavatɨka jare oyerure Tumpa pe opaete jae reta ndive.

³⁷ Jayave opaete joko pe ñogüɨnoi vae reta täta oapïro, jare oiküava reta Pablo jare oovapɨte reta.

³⁸ Ipɨatɨtɨ yae reta, Pablo jei chupe reta ngaraa ye ma oecha vae re. Jayave jae reta yogüɨraja jupíe barco oïa pe.