Hechos 2 - Biblia Guarani Tumpa Iñee

Espíritu Santo ou vae regua

¹ Arete Pentecostés pe opaete oporogüɨrovia vae reta metei ramiño oyemboatɨ ñogüɨnoi.

² Jare güɨramoiño oyeendu jɨapu ou ara güi ɨvɨtu täta oyepeyu vae rami. Täta jɨapu jókuae o ñogüɨnoia pe.

³ Jare oyekuaa chupe reta tataendɨ rami vae, jókuae ogüeyɨ metei vae ñavo re.

⁴ Jayave opaete joko pe ñogüɨnoi vae reta tɨnɨe Espíritu Santo pe, jare omboɨpɨ imiari reta ambuaeyee vae ñee reta pe, Espíritu Santo omee chupe reta imiari vaerä vae pe.

⁵ Jare jókuae ara reta pe ñogüɨnoi Jerusalén pe jeta judío jupi vae reta, opaete ketɨ ketɨ tëtaguasu reta güi yogüeru vae reta.

⁶ Jare jókuae jɨapu vae oyeendu yave, oyemboatɨ jeta vae; jare opaete vae ipɨakañɨ, echa oporogüɨrovia vae reta imiari ñogüɨnoi metei ñavo yatɨ vae reta iñee ae pe.

⁷ Ipɨakañɨ yae reve jei reta: —¡Mase! ¿Galileaɨgua retaä pa ko opaete kuae imiari ñogüɨnoi vae reta?

⁸ ¿Këraiägua pa yaendu imiari reta ñaneñee ñanemichi güive ñanemiari pɨpe vae pe?

⁹ Echa yande reta ko Partiaɨgua, Mediaɨgua, Elam pegua, Mesopotamia, Judea, Capadocia, Ponto, Asia,

^10-11 Frigia, Panfilia jare Egipto pegua, jare África pegua Cirene kutɨ ye yaiko vae, jare Romaɨgua reta kuae pe yaiko vae, Creta jare Arabia pegua. Yande ko jae judío reta jare judiorä yayeapo vae reta. Opaete yaendu ñaneñee pe imiari ñogüɨnoi mbae tuichagüe Tumpa oyapo vae re.

¹² Jare opaete yatɨ vae reta ipɨakañɨ yae reve jei oyoupe: —¿Mbae ra ko kuae?

¹³ Ërei ïru vae reta oyóyai reve jei reta: —¡Osavaɨpo reta ko!

Pedro iñemoñee

¹⁴ Jayave Pedro oyemboɨ jókuae ïru once temimondo reta ndive, jare jei yatɨ vae reta pe iñeeäta reve: “Kuimbae judío reta jare opaete peiko Jerusalén pe vae. Aipota peikuaa kavi kuae regua. Peyeapɨsaka cheñee re.

¹⁵ Pe reta peyemongeta kuae reta osavaɨpo ko ñogüɨnoi. Ërei jökoraiä ko. Echa ndeimboveño vɨteri ko.

¹⁶ Kuae ko jae arakae ñeemombeúa Joel jei vae, echa jei:

¹⁷ ‘Jare ara reta taɨkuegua pe, jei Tumpa: Ambouta cheEspíritu opaete vae reta pe. Peraɨ reta jare perayɨ reta omombeuta cheregua. Jare kunumi reta oechata Tumpa oechauka vae jare indechi vae opaɨuta.

¹⁸ Jare jókuae ara reta pe ambouta cheEspíritu kuimbae reta jare kuña reta oyeokuai cheve vae pe, jare omombeu retata cheregua.

¹⁹ Jare ayapota mɨakañɨ reta tuichagüe ara re, jare ɨvɨ re mɨakañɨ reta: Oimeta tugüɨ, tata jare tätatina.

²⁰ Kuaraɨ oyembopɨtumimbita, jare yasɨ oyeapota tugüɨ rami, ndei cheporojäa iara oväe mbove. Jókuae ara opaete vae ipɨakañɨta ko.

²¹ Ërei opaete oyerure cheve omborɨ vaerä vae reta oyemboasaukata ko.’

²² Jei vi chupe reta: Kuimbae Israel iñemuña reta, peyeapɨsaka kuae re: Tumpa oyapo pepɨte pe mɨakañɨ reta Jesús Nazaret-ɨgua rupi. Jökorai Tumpa oechauka peve Jesús añete vae ko. Kuae peikuaa katu ko pe reta.

²³ Kërai Jesús oñemee peve, oyembopo vaerä Tumpa jei jare oikuaa voi ma oyeapo vaerä vae yave, pe reta peipɨɨ peikutuuka kurusu re kuimbae iyoa vae reta pe, jökorai peyukauka.

²⁴ Ërei Tumpa omoingove ye, oyora mano ipo güi, echa mano mbaetɨ ipuere jese.

²⁵ Echa David jei Jesús re körai: ‘Aecha avei cheYa cherenonde. Cheakatu pe oï ramo, ngaraa chemongúe vae.

²⁶ Jáeramo ayerovia yae, jare atairari ayekou reve. Aputuuta akɨɨyembae reve.

²⁷ Echa ngaraa chereeya omanogüe reta ñogüɨnoia pe. Che ko jae jupi vae. Ngaraa remaeño che reñono tee vae cheretegüe oikomegua vaerä.

²⁸ Reikuaauka cheve tape tekove pegua, jare ayerovia yaeta nde reï che ndive vae rupi.’

²⁹ Tëtara reta, tae peve ñaneñemuñagüe David re. Jae omano jare oñeotɨ, jare jɨvɨa oimeño ñanoi yande pɨte pe, añave regua.

³⁰ Jare David ko ñeemombeúa ramo oikuaa Tumpa jei ko jee re ae chupe, kërai iñemuña reta güi omopüata Cristo, oguapɨ vaerä jae iguapɨa pe.

³¹ Oikuaa voi ma ndei oyeapo mbove, imiari Cristo oikove yeta vae re. Echa jei Cristo re mbaetɨta ko oyeeya omanogüe reta ñogüɨnoia pe, jare ngaraa oikomegua jetegüe.

³² Tumpa omoingove ye kuae Jesús, jare opareve ore roecha kuae.

³³ Jare Tumpa güɨraja güire oñono iyakatu kotɨ, jare omee chupe jókuae jei omeeta chupe Espíritu Santo vae. Jáeramo Jesús etei ko ombou kuae peecha jare peendu vae.

³⁴ Echa David oyeupiä ara pe. Ërei jae etei jei körai: ‘YandeYa jei cheYa pe: Eguapɨ cheakatu kotɨ,

³⁵ nderovaicho reta opa regua añono ndepɨ igüɨ pe.’

³⁶ Israel iñemuña reta, peikuaa kavi kuae, jókuae Jesús peikutu kurusu re vae, añetete ko Tumpa oyapo ma yandeYarä jae Cristo ramo.”

³⁷ Kuae oendu reta yave, ipɨatɨtɨ yae reta, jare oparandu reta Pedro jare ïru temimondo reta pe: —Tëtara reta, ¿mbae pa royapota?

³⁸ Jayave Pedro jei chupe reta: —Peeya peyemongeta ikavimbae vae pepɨa pe penoi vae, jare peyembobautisauka metei ñavo Jesucristo jee re, Tumpa iñɨ̈ro vaerä peve peyoa reta re. Jare jae omeeta peve Espíritu Santo.

³⁹ Echa pembaerä ko Tumpa güɨrökuavee vae, peraɨ reta peguarä jare opaete mombɨrɨ ñogüɨnoi vae reta peguarä; opaete yandeYa Tumpa oenɨita vae reta peguarä.

⁴⁰ Jare Pedro jeta imiari jesegua jare omboarakuaa, jei reve chupe reta: —¡Añave, peyemboasauka kuae jeko ikavimbae vae reta güi!

⁴¹ Jayave Pedro jei vae güɨrovia vae reta oyembobautisauka; jare jókuae ara tres mil rupi oñemoïru oporogüɨrovia vae reta ndive.

⁴² Jare jekuae oporogüɨrovia vae reta oyemboe avei temimondo reta iporomboe re, jare opaete metei ramiño ñogüɨnoi. Oyemboatɨ avei reta, omboyao tembíu oyoupe, jare oyerure Tumpa pe.

Oporogüɨrovia vae reta oyapo vae

⁴³ Jare opaete vae reta ipɨakañɨ yae jare okɨɨye reta, temimondo reta oyapo jeta mɨakañɨ reta vae jeko pegua.

⁴⁴ Jare opaete oporogüɨrovia vae reta oyemboatɨ, jare opaete imbaembae reta metei ramiño güɨnoi reta.

⁴⁵ Omee imbaembae reta, jare omboyao jepɨgüe mbaetɨ mbae güɨnoi vae reta pe.

⁴⁶ Jare ara ñavo oyemboatɨ avei reta tupao pe. Jare o ñavo rupi omboyao tembíu oyoupe, okaru päve reta oyerovia jare ipɨakatu reve,

⁴⁷ omboete reta Tumpa, jare opaete vae reta ipɨakatu jese reta. Jare ara ñavo yandeYa omoïru jae reta ndive oyemboasauka vae reta.