Hechos 19 - Biblia Guarani Tumpa Iñee

Pablo Efeso pe

¹ Apolos Corinto pe oï ramboeve, Pablo ou oväe Efeso pe, opa yave omboapɨ tëta reta ɨvɨtɨ rupi oï vae. Jare joko pe oväe amogüe oporogüɨrovia vae reta.

² Pablo oparandu chupe reta: —¿Pemboresive pa Espíritu Santo peporogüɨrovia yave? Jae reta jei chupe: —Mbaetɨ etei roendu Espíritu Santo regua.

³ Oparandu ye chupe reta: —¿Mbae nunga bautismo rupi pa peyembobautisauka? Jare jae reta jei chupe: —Juan iporombobautisa rupi.

⁴ Jayave Pablo jei chupe reta: —Juan ombobautisa jókuae oeya iyemongeta ikavimbae vae ipɨa pe güɨnoi vae reta. Jare jei chupe reta güɨrovia vaerä outa jaɨkue rupi vae re. Jae ko Jesús Cristo jee vae re.

⁵ Jare kuae oendu reta yave, oyembobautisauka reta yandeYa Jesús jee re.

⁶ Jayave Pablo oñono ipo jese reta yave, ou jese reta Espíritu Santo, jare jae reta imiari ambuae ñee reta pe, jare omoërakua reta Tumpa iñee.

⁷ Jare kuae kuimbae reta ñogüɨnoi doce rupi.

⁸ Jayave Pablo oike judío reta itupao pe, jare imiari okɨɨyembae reve. Jare mboapɨ yasɨ oyoaka jare güɨroviauka Tumpa iporookuaía re.

⁹ Ërei amogüe ipɨatäta jare mbaetɨ oipota güɨrovia, jei reta ñee ikavimbae vae tëta guasu pegua reta jovake Tape pɨau kotɨ. Jayave Pablo ojo chugüi reta, jare güɨraja jae ndive oporogüɨrovia vae reta, jare oyoaka ara ñavo Tiranno jee vae oporomboea pe.

¹⁰ Jökorai oyapo mókoi año rupi, jökorai opaete judío jare griego reta Asia pegua oendu ñee yandeYa Jesús regua.

¹¹ Jare Tumpa oyapo mɨakañɨ reta tuichagüe Pablo rupi.

¹² Echa ïru vae reta güɨraja yave Pablo ipañuera ani mbae nunga jemimonde omboya imbaerasɨ vae reta re yave okuera, jare aña reta osɨrɨ oya jese vae reta güi.

¹³ Jayave amogüe oguataiño vae judío aña ombosɨrɨ vae reta, omboɨpɨ tëi oenɨi yandeYa Jesús jee aña reta oya jese vae reta re, jei reve: “Poyókuai Jesús Pablo omombeu vae jee re, peë.”

¹⁴ Metei judío Esceva jee vae sacerdote reta itenondegua güɨnoi chiu taɨ reta. Kuae kuimbae taɨ reta ko jökorai jei aña pe vae.

¹⁵ Ërei aña jei chupe reta: “Che aikuaa ko Jesús, jare aikuaa katu kia ko jae Pablo. Ërei ¿pe reta pa ko kia?”

¹⁶ Jare jókuae kuimbae aña oya jese vae oporepeña jese reta, jare jëia yae chugüi reta opa omoamɨri. Jare opa ombotekuarai reta jókuae o güi inandi jare ipere reve.

¹⁷ Jare kuae jërakua opaete judío jare judiombae Efeso pegua reta pe. Jáeramo opaetei okɨɨye vae, jare jökorai yandeYa Jesús jee oyembotuicha yae.

¹⁸ Jare jeta oporogüɨrovia vae reta yogüeru omombeu jeko jare ikavimbae oyapo vae regua.

¹⁹ Jökoraiño vi jeta ipaye vae reta güeru itupapire reta, jare oapɨ opaete vae jovake. Jare kuae tupapire reta jepɨ oyepapa yave, oupitɨ cincuenta mil korepoti pegua.

²⁰ Jökorai Tumpa iñee okuakuaa avei jare oñemoai mombɨrɨ rupi, mbaepuere yae reve.

²¹ Kuae mbaembae oasa güire Pablo oñeñono ojo vaerä Jerusalén kotɨ opa omboapɨ yave Macedonia jare Acaya. Jare jei vi: “Joko güi ajata vi ko Roma pe.”

²² Jayave omondo Macedonia kotɨ mókoi imborɨa reta Timoteo jare Erasto. Ërei jae opɨtaño mbovɨ ara Asia pe.

Tekorai Efeso pe

²³ Jókuae ara reta pe oï tekorai Tape pɨau kotɨ.

²⁴ Echa metei kuimbae Demetrio jee vae korepoti imondɨkuía oyapo tumpa-raanga Diana itupao raɨ iä korepoti pegua. Jae omboepɨ kavi omborɨ oyapo vae reta pe.

²⁵ Kuae kuimbae omboatɨ imborɨa reta jare ïru jókuae nunga mbaravɨkɨ iyapoa reta, jei chupe reta: “Tëtara reta, peikuaa katu ko kuae mbaravɨkɨ güi ñamongana yaikokatu vaerä.

²⁶ Jare peecha jare peyandu ma kërai kuae Pablo omboyerova jeta vae Efeso pe jare opaete seri Asia rupi jae iporomboe pe, jei reve: ‘Kuimbae reta oyapo vae tumpa retaä ko.’

²⁷ Echa güɨramoi tëta guasu pegua reta ngaraa güɨröɨro kuae yandeparavɨkɨño, güɨröɨrota vi ko tumpa guasu Diana jee vae itupao, jökorai opata okañɨtei Asia jare opaete ɨvɨ pegua reta omboete yae vae.”

²⁸ Kuae oendu reta yave, iyarasɨ yae, jare osapúkai reve jei reta: “¡Tuichagüe yae ko Efeso pegua reta itumpa Diana!”

²⁹ Jare tekorai tɨnɨe tëta guasu. Jare opaete vae metei rami osɨi reta yuvanga renda kotɨ. Jare oipɨɨ güɨraja joko pe Pablo iguataïru reta Gayo jare Aristarco, Macedoniaɨgua reta.

³⁰ Jayave Pablo oipota tëi oike tëta guasu pegua reta yatɨ ñogüɨnoia pe. Ërei oporogüɨrovia vae reta omaeñoä jese.

³¹ Jare amogüe Asia pegua mburuvicha Pablo ndive oyopokuaa vae omondo omombeu Pablo pe agüɨye vaerä ojo yuvanga renda pe.

³² Jare opaete yatɨ vae reta iñee tee tee osapúkai, tekorai tuicha vaeño oyapo reta. Jare jeta joko pe ñogüɨnoi vae mbaetɨ oikuaa maera ra oyemboatɨ joko pe vae.

³³ Jayave judío reta omoaña omondo tenonde Alejandro jee vae yatɨ vae reta ipɨte güi, iñee omoë vaerä. Jayave Alejandro omopüa ipo omokïrii vaerä tëi. Echa oipota tëi imiari tëta guasu pegua reta pe, agüɨye vaerä jae reta omboeko judío reta.

³⁴ Ërei yatɨ vae reta oikuaa yave jae ko judío, opaete metei rami mókoi ora seri osapúkai reve jei reta: “¡Tuichagüe yae ko Efeso pegua reta itumpa Diana!”

³⁵ Jayave tëta guasu pegua reta juvicha omokïrii yatɨ vae reta yave, jei chupe reta: “Kuimbae Efesoɨgua reta. Opaete vae oikuaa kavi ko kuae tëta guasu oï ko oyangareko vaerä tumpa guasu Diana itupao re jare iä ara güi oa vae re.

³⁶ Jare mbaetɨ kia ipuere oikuaku kuae, jayave ikavi ko peyembopɨakatuño, agüɨye peyapo rai voi mbae ikavimbae.

³⁷ Echa kuae kuimbae reta peru kuae pe vae, mbaetɨ ko mbae ikavimbae jei reta yandetupao kotɨ ani ñanetumpa kuña kotɨ.

³⁸ Demetrio jare imborɨa reta oipota yave oñeapo kia re, oime ko mburuvicha oporojäa vae reta ñogüɨnoi oñeapo vaerä chupe, joko pe toñeapo oyoe.

³⁹ Ërei oime yave ïru mbae nunga teko, yemboatɨ guasu rupi toyeapo katu.

⁴⁰ Echa ipuere mburuvicha reta yandemboeko kuae oyeapo vae re. Echa jeita ñañemopüa ko ikotɨ reta. Mbaetɨta yaikuaa mbae yae chupe reta, jae reta oparandu yave yandeve kuae tekorai re.”

⁴¹ Opa kuae güire, opa omondo yatɨ vae reta.