Hechos 18 - Biblia Guarani Tumpa Iñee

Pablo Corinto pe

¹ Kuae jaɨkue rupi Pablo ojo Atenas güi tëta guasu Corinto pe.

² Jare oväe joko pe metei judío Aquila jee vae. Jae ko Ponto pegua. Kuae judío ou ramo oväe Italia güi jembireko Priscila ndive. Echa mburuvicha guasu Claudio jee vae oyókuai opaete judío reta ñogüɨnoe vaerä Roma güi. Jare Pablo ojo ípɨri.

³ Jare Pablo oikatu oyapo Aquila iparavɨkɨ ramo, opɨta jae reta ndive, jare oparavɨkɨ päve reta. Jae reta ko o asoya pegua iyapoa.

⁴ Ara mbutuu ñavo Pablo oyoaka judío reta itupao pe. Kuae oyapo, judío reta jare judiombae vae reta güɨroviauka vaerä.

⁵ Silas jare Timoteo yogüeru oväe yave Macedonia güi, Pablo oñemoäta ngatu yae oï omoërakua vaerä Tumpa iñee. Omombeu reve judío reta pe Jesús ko jae Cristo.

⁶ Ërei jókuae judío reta oyovaicho jare jei reta ikavimbae vae ikotɨ. Jáeramo Pablo omotumo jemimonde, jare jei chupe reta: —Pe reta aeño penoita teko peyeupe pekañɨtei re. Che mbaetɨa chereko. Añave güive ajata judiombae vae reta kotɨ.

⁷ Jayave ojo joko güi kuimbae Justo jee vae jo pe. Kuae kuimbae omboete Tumpa, jare jae jo oï judío reta itupao iyɨpɨ pe.

⁸ Jare judío reta itupao pegua reta itenondegua Crispo jee vae jare opaete jo pegua reta güɨrovia yandeYa re. Jare jeta Corinto pegua reta oendu Pablo omoërakua vae yave, güɨrovia jare oyembobautisauka.

⁹ Jare yandeYa jei Pablo pe pɨ̈tu yave ike pe: “Agüɨye ekɨɨye. Nemiari jare agüɨye nekïrii.

¹⁰ Echa che aï nde ndive, jare ngaraa kia ipuere oyapo ikavimbae vae ndeve. Echa oime jeta chembae vae reta kuae tëta guasu pe.”

¹¹ Jare Pablo opɨta oporomboe Tumpa iñee re joko pe, metei año jare ova yasɨ.

¹² Ërei Galión jee vae oiko mburuvicharä ɨvɨ Acaya pe yave, judío reta oñemopüa metei rami Pablo kotɨ, jare güɨraja morojäa renda pe,

¹³ jei reta: —Kuae kuimbae mbaetɨ oporomboe mborookuai pe jei rami omboete vaerä Tumpa.

¹⁴ Pablo omboɨpɨ imiari yave, Galión jei judío reta pe: —Judío reta, kuae kuimbae oyapo yave ikavimbae vae pekotɨ, ani oporoyuka yave, ayeapɨsakata tëi peré.

¹⁵ Ërei ajäa vaerä ñee reta, tee reta re ani mborookuai penoi vae re yave, pe reta etei pepuere pejäa. Echa che mbaetɨ aipota ajäa kuae nunga.

¹⁶ Jayave Galión opa omoë reta morojäa renda güi.

¹⁷ Jayave griego reta oipɨɨ judío reta itupao pegua itenondegua Sóstenes jee vae, jare okua jese morojäa renda jóvai. Ërei Galión mbaetɨ etei oyemoambeko jese.

¹⁸ Ërei Pablo opɨtaño vɨteri jeta ara joko pe. Javoi oyupavo ojo oporogüɨrovia vae reta güi, ojo barco pe Siria kotɨ, Priscila jare Aquila ojo jupíe. Jare tëta guasu Cencrea pe Pablo oñeapiasɨ. Ombopo vaerä Tumpa pe oñererökuavee vae.

¹⁹ Jare yogüɨraja oväe yave tëta guasu Efeso pe, Pablo oeya joko pe Priscila jare Aquila. Jayave oike judío reta itupao pe, jare oyoaka judío reta ndive.

²⁰ Jare jae reta omoñera opɨta vaerä jae reta ndive mbovɨ ara katu pegua yave, jae mbaetɨ oipota.

²¹ Ërei jae oyupavoño chupe reta jei reve: “Ajata ñotai ko Jerusalén pe, ayapo vaerä arete oyearo ma oï vae. Ërei Tumpa oipota yave, ayu yeta pepɨ.” Jayave ojo barco pe Efeso güi.

Pablo ojo ye Antioquía pe jare omboɨpɨ ye mboapɨa ma güɨraja Tumpa iñee

²² Jare ojo oväe yave Cesarea pe, ojo maraetei oyapo oporogüɨrovia vae reta pe Jerusalén pe. Jare joko güi ojo Antioquía pe.

²³ Jare mbovɨ ara joko pe oï güire, ojo omboapɨ opaete tëta reta Galacia jare Frigia rupi, omoäta ngatu reve opaete oporogüɨrovia vae reta.

Apolos oñemoñee Efeso pe

²⁴ Jókuae ara rupi ou Efeso pe metei judío Alejandría pegua Apolos jee vae. Kuae kuimbae ipoki oñemoñee, jare oikuaa kavi yae Tumpa Iñee re vae.

²⁵ Kuae kuimbae oyemboe ma yandeYa jemimbota re. Jäta ngatu, imiari jare oporomboe jaekavi yandeYa re. Ërei jaeño oikuaa Juan iporombobautisa regua.

²⁶ Jae omboɨpɨ imiari okɨɨyembae reve judío reta itupao pe. Ërei Priscila jare Aquila oendu yave jei vae, güɨraja imiari jae ndive jaeño pe, jare omboe kavi Tumpa jemimbota re.

²⁷ Jare Apolos ikɨ̈reɨ ojo Acaya pe yave, oporogüɨrovia vae reta omoäta ngatu, jare oikuatía reta metei tupapire joko pegua oporogüɨrovia vae reta pe, omboresive kavi reta vaerä Apolos. Jae ojo oväe yave joko pe, omborɨ kavi jókuae Tumpa ipɨakavi rupi oporogüɨrovia vae reta.

²⁸ Jae oyoaka mbaepuere reve judío reta ndive tëta guasu pegua reta jovake, oechauka reve chupe reta Tumpa Iñee rupi Jesús ko jae Cristo vae.