Hechos 13 - Biblia Guarani Tumpa Iñee

Bernabé jare Saulo omboɨpɨ yogüɨraja omoërakua ñee ikavi vae

¹ Jókuae ara rupi yogüɨreko oporogüɨrovia vae Antioquía pegua ipɨte pe amogüe Tumpa iñee omoërakua vae reta jare Tumpa iñee re oporomboe vae reta. Jae reta ko: Bernabé, Simón Niger, Lucio Cirene pegua, Manaén mburuvicha guasu Herodes ndive okuakuaa vae jare Saulo.

² Kuae reta oyeokuai yandeYa pe jare oyekuaku tembíu güi ramboeve, Espíritu Santo jei chupe reta: “Peñono tee cheve Bernabé jare Saulo oyapo vaerä mbaravɨkɨ che aiparavo ma chupegua retarä vae.”

³ Jayave oyekuaku reta tembíu güi, jare oyerure reta Tumpa pe. Javoi ïru reta oñono ipo jese reta jare omondo reta.

Temimondo reta oñemoñee Chipre pe

⁴ Jayave Saulo jare Bernabé oyemondouka Espíritu Santo pe, jare yogüɨraja tëta guasu Seleucia pe, jare joko güi yogüɨraja ɨguasu rupi ɨvɨ Chipre pe.

⁵ Jare yogüɨraja oväe yave tëta guasu Salamina pe, omoërakua reta Tumpa iñee judío reta itupao reta rupi. Jare Juan ojo jae reta ndive omborɨ vaerä.

⁶ Jare opaete Chipre omboapɨ yave, yogüɨraja oväe tëta guasu Pafos pe, jare joko pe oväe reta metei ichoropa vae judío Barjesús jee vae. Jae ko ñeemombeuaraanga.

⁷ Kuae kuimbae oï mburuvicha Sergio Paulo jee vae ndive. Kuae mburuvicha iyarakuaa katu ko. Jae oenɨi Bernabé jare Saulo, ikɨ̈reɨ oyeapɨsaka Tumpa iñee re.

⁸ Ërei ichoropa vae Elimas omboavai tëi, agüɨye vaerä mburuvicha oporogüɨrovia.

⁹ Ërei Saulo oyeero Pablo pe vae tɨnɨe Espíritu Santo pe, jare omae ngatu Elimas re,

¹⁰ jare jei chupe: —Aña guasu taɨ, oporombotavɨ vae, ikavimbae vae iyapoa, ¿jekuaeñota pa remboavai yandeYa jape güi vae?

¹¹ Mase, añave yandeYa tombou ipo nderé, ndesambae reiko vaerä. Ngaraa reecha kuaraɨ mbovɨ ara rupi. Jare jupiveiño Elimas ipuereä mbae oecha, pɨtumimbi yave rami, jare kotɨ kotɨ oeka tëi kia oipoko güɨraja vaerä.

¹² Jayave mburuvicha jókuae oasa vae oecha yave, güɨrovia Tumpa iñee. Echa ipɨakañɨ yandeYa regua mboromboe re.

Pablo jare Bernabé Antioquía Pisidia pegua pe

¹³ Jayave Pablo jare iñeïru reta yogüɨraja barco pe Pafos güi, yogüɨraja oväe tëta guasu Perge ɨvɨ Panfilia pegua pe. Ërei Juan oeya reta ye ojo Jerusalén kotɨ.

¹⁴ Jayave jae reta yogüɨraja Perge güi tëta guasu Antioquía Pisidia pegua kotɨ. Jare joko pe yogüɨraja oväe yave, oike reta judío reta itupao pe ara mbutuu pe, jare oguapɨ reta.

¹⁵ Jare ïru vae reta opa omongeta mborookuai güi jare ñeemombeúa reta jembikuatía yave, tupao pegua reta itenondegua reta jei chupe reta: —Tëtara reta, oime penoi ñee yemboarakuaa pegua yave, pemiari.

¹⁶ Jayave Pablo opüa, jare omopüa ipo omokïrii reta vaerä. Jayave jei chupe reta: —Kuimbae Israel iñemuña reta jare opaete pe kuaeɨgua reta peipoɨu Tumpa güi vae, peyeapɨsaka cheré:

¹⁷ Israel pegua reta iTumpa oiparavo ñaneñemuñagüe reta, jare ombotuichauka Egipto pe ketɨgua yogüɨreko ramboeve. Jare Tumpa imbaepuere yae rupi opa güɨnoe joko güi

¹⁸ Jare cuarenta año güɨropɨa chupe reta ñuu rupi;

¹⁹ jare opa omboai yave Canaán güi chiu tëtaguasu pegua reta, omee kuae reta iɨvɨgüe ñaneñemuñagüe reta imbaerä.

²⁰ “Kuae jaɨkue rupi cuatrociento cincuenta año rupi Tumpa omee chupe reta mburuvicha oporojäa vae reta ñeemombeúa Samuel oï regua.

²¹ Jayave jae reta oiporu juvicha guasurä. Jare Tumpa omee chupe reta Saúl, Cis taɨ, cuarenta año pegua. Jae ko metei kuimbae Benjamín iñemuña pegua.

²² Jare Tumpa kuae kuimbae omombo yave, omee chupe reta David juvicha guasurä. Jare Tumpa jei David re: ‘Che aikuaa David, Isaí taɨ ko metei kuimbae chemboyerovia vae. Jae oyapota opaete che aipota vae.’

²³ Kuae David iñemuña reta güi Tumpa omee Jesús jae güɨrökuavee rami. Jae ko Israel pegua reta Imboasaa.

²⁴ Ndei Jesús ou mbove, Juan omoërakua opaete Israel pegua reta pe oeya vaerä iyemongeta ikavimbae vae ipɨa pe güɨnoi vae, jare oyembobautisauka vaerä.

²⁵ Jare Juan omboapɨ ma omoërakua chupe reta vae yave, jei: ‘Pe reta peyemongeta tëi che ko jae Cristo. Ërei ko ou cheraɨkue rupi jupiä che ayora vaerä ipɨapaa ave vae.’

²⁶ Tëtara reta, Abraham iñemuña reta jare pe kuaeɨgua peipoɨu Tumpa güi vae reta. Tumpa ombou peve kuae ñee peyemboasauka vaerä.

²⁷ Echa Jerusalén pegua reta jare juvicha reta mbaetɨ oikuaa kia ra ko Jesús vae ani ñeemombeúa reta jeigüe, ara mbutuu ñavo pe jae reta omongeta tëi vae. Jáeramo jae reta jei Jesús oyeyukauka vaerä, jare jökorai ombopo reta oyekuatía oï jese vae.

²⁸ Yepe tëi mbaetɨ oväe teko Jesús re omano vaerä, ërei oiporu reta Pilato pe oyukauka vaerä.

²⁹ Jare jae reta opa ma oyapo chupe opaete jese oyekuatía oï vae yave, ombogüeyɨuka reta kurusu güi, jare oñonouka tɨvɨa pe.

³⁰ Ërei Tumpa omoingove ye omanogüe reta ipɨte güi.

³¹ Jare jae jeta ara oyekuaa jupíe yogüɨraja Galilea güi Jerusalén pe vae reta pe. Jae reta añave omombeu ïru vae reta pe.

³² Jare ore vi romombeu peve ñee ikavi vae, kërai Tumpa jei ñaneñemuñagüe reta pe vae.

³³ Tumpa etei ombopo ma yandeve. Echa omoingove ye Jesús. Oyekuatía oï Salmo pe körai: ‘Nde ko jae cheRaɨ. Che ko romoñemuña añave.’

³⁴ Tumpa omoingove ye omanogüe reta ipɨte güi, agüɨye vaerä jetegüe oikomegua. Jare kuae re jei: ‘Tamee ndeve mboroparareko jupigüe David pe jae amee vaerä vae.’

³⁵ Jáeramo jei vi ïru Salmo pe: ‘Che ko jae jupi vae. Ngaraa remaeño che reñono tee vae cheretegüe oikomegua vaerä.’

³⁶ Ërei David opa oyeokuai yave opaete jëtaɨgua reta pe Tumpa oipota vae rupi, omano, jare oñeotɨuka iñemuñagüe reta ñogüɨnoia pe, jare jetegüe oikomegua.

³⁷ Ërei jókuae Tumpa omoingove vae jetegüe mbaetɨ etei oikomegua.

³⁸ Jáeramo, tëtara reta, peikuaa kavi oñemoërakua peve Jesús rupi Tumpa iñɨ̈rota peve peyoa reta re vae.

³⁹ Echa mbaetɨ pepuere peyembojupiuka Moisés iporookuai rupi vae, añave pepuere peyembojupiuka perovia jese yave.

⁴⁰ Jáeramo peyeandu, agüɨye vaerä oyeapo peve ñeemombeúa reta jei vae. Echa jei reta körai:

⁴¹ ‘Oporogüɨröɨro vae reta, pepɨakañɨ jare pekañɨtei. Echa che ayapota metei mbaravɨkɨ peiko ramboeve. Pe reta ngaraa perovia, yepe tëi kia imiari jese peve.’ ”

⁴² Jare oë reta judío reta itupao güi yave, judiombae vae reta omoñera imiari ye vaerä chupe reta ara mbutuu ou yeta vae pe.

⁴³ Jare tupao pe yatɨ vae reta opa yogüɨraja yave, jeta judío reta jare judiorä oyeapo vae omboete Tumpa vae reta yogüɨraja Pablo jare Bernabé ndive. Kuae mókoi reve imiari chupe reta, jare omoäta ngatu jekuaeño oyeko reta vaerä Tumpa ipɨakavi re.

⁴⁴ Jare ara mbutuu oväe ma yave opaete seri tëta guasu pegua reta oyemboatɨ, oyeapɨsaka vaerä Tumpa iñee re.

⁴⁵ Ërei judío reta oecha yave jeta vae yatɨ, oñemoägüɨro, jare jei añeteä ko Pablo jei vae, jare jei ikavimbae vae Pablo kotɨ.

⁴⁶ Jayave Pablo jare Bernabé imiari okɨɨyembae reve chupe reta. Jei reta: —Añete jaekavi ko romoërakua vaerä peve räri Tumpa iñee. Ërei peröɨro ma. Mbaetɨ ma peipota, jökorai peikuaauka oreve mbaetɨta penoi tekove opambae vae. Jáeramo añave romoërakuata judiombae vae reta pe.

⁴⁷ Echa yandeYa oreokuai körai: “Poñono tembipe rami judiombae vae reta pe, peraja vaerä yemboasa opaete ɨvɨ pegua reta pe.”

⁴⁸ Jare judiombae vae reta oendu yave kuae ñee, oyerovia yae reta jare ombotuicha Tumpa iñee. Jare güɨrovia opaete jókuae Tumpa oiparavo tekove opambae vae güɨnoi vaerä vae reta.

⁴⁹ Jare Tumpa iñee oñemoai opaete jókuae ɨvɨ rupi.

⁵⁰ Ërei judío reta omboemboe kuña jupi jare imboetea vae reta jare tëta guasu pegua tenondegua reta, oñemopüa Pablo jare Bernabé re, jare omombo reta iɨvɨ güi.

⁵¹ Jayave Pablo jare Bernabé omotumo ɨvɨkúi ipɨ güi, oechauka vaerä tëta guasu pegua reta ko teko güɨnoi; javoi yogüɨraja oväe tëta guasu Iconio pe.

⁵² Ërei oporogüɨrovia vae reta oyerovia yae, jare tɨnɨe Espíritu Santo pe.