Hechos 12 - Biblia Guarani Tumpa Iñee

Herodes oyukauka Jacobo, jare oñoñauka Pedro tembipɨɨrɨru pe

¹ Jókuae ara reta pe mburuvicha guasu Herodes oipɨɨuka amogüe oporogüɨrovia vae reta, oyapo vaerä ikavimbae vae chupe reta.

² Oyukauka kɨsepuku pe Jacobo, Juan tɨkeɨ.

³ Jare Herodes oecha kuae oyapo vae ikavi judío reta pe yave, oipɨɨuka vi Pedro. Jókuae ara reta pe judío reta oyapo arete oyeu vaerä mbɨyape oyembovumbae.

⁴ Jare oipɨɨuka ma yave, oñoñauka tembipɨɨrɨru pe. Omee irundɨ atɨ sundaro reta pe oyangareko jese vaerä. Metei atɨ ñavo irundɨ sundaro oï vae pe. Herodes oyemongeta güɨnoeuka vaerä Pedro tëta guasu pegua reta jóvai Pascua oasa ma yave.

⁵ Jayave sundaro reta oäro Pedro tembipɨɨrɨru pe. Ërei oporogüɨrovia vae reta ikueraimbae reve oyerure ñogüɨnoi jese.

Araɨgua güɨnoe Pedro tembipɨɨrɨru güi

⁶ Pɨareve pe ma Herodes güɨnoeukata tëi yave, jókuae pɨ̈tu etei Pedro oke oï mókoi sundaro ipäu pe, oñeapɨti reve oï mókoi karena pe jese reta. Jare ïru sundaro reta tembipɨɨrɨru jöke oäro ñogüɨnoi.

⁷ Jare güɨramoiño metei yandeYa iaraɨgua oyekuaa, jare metei tembipe oesape tembipɨɨrɨru. Jayave araɨgua oñátai Pedro iyɨke pe omomba vaerä, jei chupe: “¡Epüa jarembae!” Jare karena reta opa oa ipoapɨ güi.

⁸ Jayave araɨgua jei chupe: “Eyeapo kavi jare emonde vi ndepɨapaa.” Jare Pedro jökorai oyapo. Jayave araɨgua jei chupe: “Eñeapeva ndeasoya pe, jare eyu cherupíe.”

⁹ Jayave Pedro oë araɨgua jupíe. Jae mbaetɨ oikuaa añete ra araɨgua oyapo vae. Ipɨa pe oyemongeta opaete kuae oecha oï ike peecha.

¹⁰ Oasa güire mókoi atɨa sundaro tembipɨɨrɨru oäro vae reta, yogüɨraja oväe öke jiero kaye kotɨ oï vae pe. Kuae öke jaeiño oyepea chupe reta. Jare oë reta ma yave, oguata reta metei kaye. Jayave güɨramoiño araɨgua oeya Pedro.

¹¹ Jayave ramo Pedro oikuaa kuae oyeapo vae añete yepe, jare jei iyeupe: “Añave aikuaa cheYa ko ombou iaraɨgua chereroasayepe Herodes güi jare opaete judío reta oipota oyapo cheve vae güi.”

¹² Kuae re ipɨa pe oyemongeta ramboeve, ojo oväe María jo pe. María ko jae Juan, Marcos pe oyeero vae ichɨ. Joko pe jeta vae yatɨ oyerure ñogüɨnoi.

¹³ Pedro ombopu öke kaye kotɨgua yave oë metei kuñatai Rode jee vae oecha vaerä kia ko vae.

¹⁴ Kuae kuñatai oikuaa Pedro iñee, ërei oyerovia güi mbaetɨ oipea öke. Osɨi japɨpe kotɨi ojo omombeu ïru reta pe Pedro oime oï öke pe vae.

¹⁵ Ërei jae reta jei chupe: —¡Rereiño ete ma! Ërei jae jeiete jei añete ko vae. Jayave jae reta jei: —¡Araɨgua oyangarekose jese vae ko!

¹⁶ Ërei Pedro jeiete ombopu öke. Jare jae reta oipea yave, oecha jae ko, jare ipɨakañɨ reta.

¹⁷ Ërei Pedro omopüa ipo omokïrii reta vaerä, jare imiari chupe reta kërai yandeYa güɨnoe tembipɨɨrɨru güi vae, jei: —Peikuaauka kuae, Jacobo jare ïru oporogüɨrovia vae reta pe. Jayave oë joko güi ojo ïkotɨa.

¹⁸ Jare köe ma yave sundaro reta täta oyombokepegua, echa mbaetɨ oikuaa mbae ra oasa Pedro ndive vae.

¹⁹ Jare Herodes oekauka tëi yave, mbaetɨ oväe Pedro. Jayave oparandu sundaro reta pe güire opa oyukauka. Kuae jaɨkue rupi Herodes ojo Judea güi Cesarea pe, jare opɨta joko pe.

Herodes omano

²⁰ Jare Herodes iyarasɨ oiko Tiro pegua reta jare Sidón pegua reta kotɨ. Jayave jae reta metei rami yogüeru ípɨri, jare oñemoïru reta metei mburuvicha guasu iyɨvɨrigua Blasto jee vae ndive. Jae reta jei chupe agüɨye vaerä mburuvicha guasu iyarasɨ ikotɨ reta. Echa jae reta güɨnoe jembiurä mburuvicha guasu Herodes iɨvɨ güi.

²¹ Jare Herodes oiparavo metei ara imiari vaerä chupe reta. Jayave jókuae ara Herodes oyemonde kavi temimonde mburuvicha pegua pe, oguapɨ mburuvicha iporojäa renda pe jare oñemoñee chupe reta.

²² Jare jae reta osapúkai reve jei: “¡Tumpa iñee ko, kuimbae iñeeä ko kuae!”

²³ Jare jupiveiño metei yandeYa iaraɨgua omombaerasɨ Herodes, echa mbaetɨ omboeteuka Tumpa. Jare taso opa jou jökorai omano.

²⁴ Ërei Tumpa iñee jeiete oñemoai jare oñemoërakua opaete rupi.

²⁵ Jare Bernabé jare Saulo yogüeru ye Jerusalén güi, iparavɨkɨ joko pe opa oyapo güire. Jare güeru reta jupíe Juan, Marcos pe oyeero vae.