Hechos 1 - Biblia Guarani Tumpa Iñee

Espíritu Santo outa vae regua

¹ Mburuvicha Teófilo, tenonde aikuatía ndeve vae pe amombeu ndeve opaete Jesús oyapo vae jare iporomboe re,

² ojo ye ara pe regua. Omee güire mborookuai reta Espíritu Santo rupi temimondo oiparavogüe reta pe.

³ Jesús omano güire, oyekuaa chupe reta jae etei, oechauka reve añetete ko oikove vae. Oyekuaa chupe reta cuarenta ara rupi, jare imiari chupe reta Tumpa iporookuaía re.

⁴ Jare jae oï vɨteri jae reta ndive yave, oyókuai agüɨye vaerä yogüɨraja tëta guasu Jerusalén güi. Oyókuai oäro vaerä yandeRu omeeta chupe reta vae. Echa jei chupe reta: —Jókuae re chemiari ma peve.

⁵ Juan oporombobautisa ɨ pe, ërei pe reta mbovɨ ara peño peyembobautisata ma Espíritu Santo pe.

Jesús ojo ara pe

⁶ Jayave yatɨ vae reta oparandu Jesús pe: —OreYa, ¿remopüa yeta pa Israel pe mborookuaía kuae ara reta rupi?

⁷ Jesús jei chupe reta: —Mbaetɨ ko peve reta oñemee jókuae peikuaa vaerä. Jaeño cheRu oikuaa jókuae re.

⁸ Ërei pe reta penoita mbaepuere ou yave Espíritu Santo peré, jare pemombeuta cheregua Jerusalén pe, opaete Judea rupi, Samaria rupi jare opaete ɨvɨ rupi.

⁹ Jare Jesús opa imiari chupe reta yave, Tumpa güɨraja, jae reta omae jese ramboeve. Jayave amapɨtu oñova Jesús, jare mbaetɨ ma oecha reta.

¹⁰ Jare omae ñogüɨnoi ara kotɨ Jesús ojo ramboeve, mókoi kuimbae jemimonde tïiasɨ vae oyekuaa jae reta iyɨpɨ pe.

¹¹ Kuae reta jei chupe reta: —Kuimbae Galileaɨgua reta, ¿maera pa pemae peï ara kotɨ? Kuae Jesús oyereraja pegüi ara pe vae, jae etei ko ou yeta peecha ojo ara pe rami.

Judas jekovia peguarä oyeparavo vae

¹² Jayave temimondo reta yogüeru ye Jerusalén pe ɨvɨtɨ Olivo jee vae güi. Jókuae ɨvɨtɨ köiño oï Jerusalén güi. Ara mbutuu pe oyeguata rami.

¹³ Yogüeru oväe yave, oike reta jare oyeupi oɨvate jae reta yogüɨrekoa pe. Jae ko Pedro, Jacobo, Juan, Andrés, Felipe, Tomás, Bartolomé, Mateo, Alfeo taɨ Jacobo jee vae, Simón Zelote jare Jacobo tɨvɨ Judas jee vae.

¹⁴ Opaete kuae reta oyemboatɨ avei oyerure vaerä Jesús ichɨ María jare ïru kuña reta, jare Jesús tɨvɨ reta ndive.

¹⁵ Jare jókuae ara reta rupi Pedro imiari oporogüɨrovia vae reta ciento veinte rupi oyemboatɨ ñogüɨnoi vae pe, jei:

¹⁶ “Cherɨvɨ reta, jupi ko oyembopo vaerä Espíritu Santo jei David rupi Tumpa Iñee pe Judas re vae. Kërai Judas güɨraja kuimbae reta Jesús oïa pe oipɨɨuka vaerä.

¹⁷ Jae oikose yande ndive, jare oyeparavo ko oyapo vaerä kuae mbaravɨkɨ.

¹⁸ Ërei jae ikavimbae oyapo vae jepɨgüe re ogua metei ɨvɨ. Joko pe oa ɨvate güi, jare jɨe osoro, opaetei ichuri oyekuavo.

¹⁹ Kuae jërakua opaete Jerusalén pegua reta pe. Jáeramo jókuae ɨvɨ jee Acéldama jae reta iñee pe (Acéldama oipota jei: ‘Ɨvɨ tugüɨ jepɨgüe’).

²⁰ Echa oyekuatía oï Tumpa iñee pe Salmo reta pe körai: ‘Jo topɨta ipombae oiko vaerä, jare agüɨye kia toiko pɨpe.’ Jare jei vi: ‘Ambuae vae topɨta jekovia pe.’

²¹ Jáeramo ikavi ko kuae pe kuimbae reta yogüɨreko yande ndive opaete ara Jesús oiko yande pɨte pe güive,

²² jae ko Juan ombobautisa Jesús güive, ojo regua ara pe. Kuae reta güi toyeparavo metei oñemoïru vaerä yande ndive, jae omombeu vaerä Jesús oikove ye vae re.”

²³ Jayave oiparavo reta mókoi kuimbae: Metei jee José Barsabás, jae ko oyeero Justo pe vae. Ïru kuimbae jee Matías.

²⁴ Jayave oyerure reta Tumpa pe körai: “OreYa, nde reikuaa opaete ipɨa vae, eechauka oreve kia nunga ra reiparavo ma kuae mókoi kuimbae güi,

²⁵ jae oporomborɨ vaerä kuae mbaravɨkɨ pe, jare oiko vaerä temimondorä, Judas iyoa jeko pegua oeya vae pe, jae ojo ma jendarä oiparavoa pe.”

²⁶ Jayave oyapo reta suerte jee reta re. Jare suerte oa Matías jee re; jare oyepapa Jesús jemimondo once vae reta ndive.