Hebreos 9 - Biblia Guarani Tumpa Iñee

¹ Jáeramo, tenondegua morogüɨrökuavee päve pe oyókuai kërai omboete reta vaerä jókuae o mbaemboetea ɨvɨ pegua pe.

² Jókuae tupao guakapi pegua güɨnoi mókoi cuarto. Tenondegua cuarto jee Oñeñono tee vae, joko pe oï mechero jenda, mesa jare mbɨyape reta mbaemboete pegua.

³ Jare ïru cuarto asoya omboyao vae ikupe pegua jee, cuarto Oñeñono tee kavi yae vae,

⁴ joko pe oï tätapɨirɨru oro pegua, käjou morogüɨrökuavee päve pegua oro pe oñeova vae, metei yapepo oro pegua maná oï pɨpe vae, Aarón ipopoka jokɨ vae jare itape reta morogüɨrökuavee päve güɨnoi vae.

⁵ Jare jókuae käjou oro katuai vae iárambo ñogüɨnoi mókoi araɨgua reta querubín iä, oñova reta güɨnoi ipepo pe ñɨ̈ro renda. Kuae reta re mbaetɨ chepuere amombeu kavi peve añave.

⁶ Opaete kuae mbaembae oyeapo kavi ma yave, sacerdote reta oike avei cuarto oñeñono tee vae pe, joko pe oyapo vaerä iparavɨkɨ.

⁷ Ërei cuarto oñono tee kavi yae vae pe, sacerdote tenondegua eteño oike metei vese año pe, güɨroike reve tugüɨ. Jae omee iyegua jare jeta vae reta oikuaambae reve iyoa vae re.

⁸ Jökorai Espíritu Santo oikuaauka ndeiño oyepea opaete vae pe cuarto Oñeñono tee kavi yae vae, oimeño vɨteri ramboeve tupao guakapi pegua.

⁹ Opaete kuaekuae reta oyembojaanga ko añave rupiguarä. Joko pe sacerdote reta omee yepi mbota jare mɨmba oyeyukagüe ipuerembae ombokavi Tumpa omboete vae reta iyemongeta vae,

¹⁰ echa jaeño güɨnoi mborookuai tembíu reta regua jare kërai jae reta oyeyoe vaerä Tumpa kotɨ. Opaete jókuae mborookuai reta ɨvɨ peguaño ko, oñeñono ko Tumpa opaete oyapokatu regua.

¹¹ Ërei ou ma Cristo, sacerdote tenondegua ete mbaembae oikota vae pegua. Jare jae oyapo mbaravɨkɨ tupao ikavigüe yae vae pe. Echa jókuae tupao kuimbae reta oyapogüeä ko.

¹² Jare Cristo mbaetɨ oike omee kavara kuimbae jugüɨgüe ani toro taɨrusu vae jugüɨgüe, güɨroike ko jae jugüɨ etei metei veseño cuarto Oñeñono tee kavi yae vae pe jekuae avei pegua, jökorai omee yandeve yemboasa opambae vae.

¹³ Echa toro jugüɨ jare kavara kuimbae jugüɨ jare guaka itanimbugüe pe oñapiramo jókuae ikɨa Tumpa jóvai vae reta, oitɨo vaerä jete Tumpa peguarä.

¹⁴ Vɨtei pa Cristo jugüɨ, echa jae Espíritu Santo oikoño mai vae rupi oñemee Tumpa pe ikɨambae etei, jókuae rupi oitɨo yandeyemongeta ikavimbae mano pegua güi, yayeokuai vaerä Tumpa oikove vae pe.

¹⁵ Jare jókuae jeko pegua jae oï ñanemoñoövaiti vaerä Tumpa ndive morogüɨrökuavee päve ipɨau vae rupi vae. Echa Cristo omano omboepɨ vaerä tenondegua morogüɨrökuavee päve pe mbaeyoa oyapo vae reta re. Jáeramo Tumpa oenɨi vae reta güɨnoita imbaerä güɨrökuavee chupe reta vae.

¹⁶ Echa metei kuimbae imbaembaegüe opɨta vaerä iyarä vae pe, jókuae mbaembae iya omanota räri ko.

¹⁷ Echa kuimbae omano yave ramo jae reta ipuere güɨnoi imbaerä jókuae mbaembae. Ërei mbaetɨta omboresive iyarä vae, mbaembae iya oikoveño ramboeve.

¹⁸ Jáeramo oyeporu tugüɨ tenondegua morogüɨrökuavee päve oyeapo vaerä.

¹⁹ Echa Moisés opa güire omombeu Israel pegua reta pe opaete mborookuai reta, jayave oiporu toro taɨrusu vae reta jugüɨ jare kavara kuimbae reta jugüɨ, ɨ, vecharaagüe oñemopɨ̈tagüe jare ñana hisopo, pɨpe oñapiramo tembikuatía jare opaete vae reta,

²⁰ jei reve: “Kuae ko jae tugüɨ morogüɨrökuavee päve regua, Tumpa omee yayapo vaerä vae.”

²¹ Jaeramiño vi Moisés oñapiramo tugüɨ pe o guakapi pegua jare opaete kopa oyeporu mbaemboetea pe vae.

²² Jare tugüɨ rupi mborookuai jei rami opaete seri oyeyoe Tumpa kotɨ. Jare tugüɨ oyepɨyerembae reve Tumpa mbaetɨ iñɨ̈ro mbaeyoa reta re.

Cristo imano omboai mbaeyoa

²³ Jare opaete kuae reta ara pegua re oyembojaanga vae ikavi oyetɨo vaerä Tumpa kotɨ jökorai. Ërei mbaembae ara pegua oyetɨo tugüɨ ikavi yae ete vae pe, jókuae reta güi.

²⁴ Cristo oike ma ara pe etei Tumpa jóvai, oyerure vaerä yanderé, mbaetɨ oike mbaemboetea oyeapogüe pe, echa jókuae mbaemboetea ko oyembojaanga añetete pegua ara pegua re;

²⁵ ërei mbaetɨ ko oike avei, sacerdote tenondegua ete año ñavo oike cuarto oñeñono tee kavi yae vae pe tugüɨ ambuae ndive vae rami;

²⁶ echa jökorai yave mona, omanota tëi ko jeta vese ɨvɨ oyeapo güive. Ërei añave ara reta taɨkuegua pe oñemee omano vaerä metei veseño jekuae avei pegua, omboai vaerä mbaeyoa reta.

²⁷ Jökorai, oñeñono ɨvɨ pegua reta omano vaerä metei veseño; jare kuae jaɨkue rupi Tumpa ojäata.

²⁸ Jökoraiño vi Cristo metei veseño güɨrökuavee jekove mano pe, güɨraja vaerä jeta vae reta iyoa. Jare ou ye yave mbaetɨta ma ou omboasa vaerä iyoa vae reta, outa güɨraja vaerä jese oäro vae reta.