Hebreos 8 - Biblia Guarani Tumpa Iñee

Jesús jare morogüɨrökuavee ipɨau vae

¹ Jáeramo, che jae ma peve vae, jae ko oime ñanoi sacerdote tenondegua ete oguapɨ ma oï Tumpa iyakatu kotɨ ara pe vae,

² jae ko o mbaemboetea añetete pegua vae pe tenondegua oparavɨkɨ vae, yandeYa omopüa vae, mbaetɨ kuimbae reta jembiapo.

³ Opaete sacerdote tenondegua ete reta ñogüɨnoi ko omee vaerä mbota reta jare mɨmba oyeyukagüe reta. Jáeramo jupi ko kuae sacerdote tenondegua ete vae omee vaerä mbae,

⁴ ɨvɨ peño oiko yave mona, ngaraa etei ko oiko sacerdoterä, oime vɨteri ramboeve ïru sacerdote reta omee vaerä mbota reta mborookuai jei rami.

⁵ Ërei mbaravɨkɨ jae reta oyapo vae ko oyembojaanga ara pegua re. Echa ndei Moisés oyapouka Tumpa jo guakapi pegua mbove, Tumpa oechauka chupe kërai oyapouka vaerä. Jei chupe körai: “Emae kavi, reyapo vaerä ɨvɨtɨ re aechauka ndeve rami kavi.”

⁶ Ërei mbaravɨkɨ Tumpa omee Jesús pe vae ikavi yae mbaravɨkɨ jókuae ïru sacerdote reta oyapo vae güi. Echa jae ko morogüɨrökuavee ikavigüe rupi ñanemoñoövaiti Tumpa ndive vae.

⁷ Echa jókuae tenondegua morogüɨrökuavee päve oporombojupi yave mona, mbaetɨta tëi ko añave oime vae.

⁸ Echa omboeta reve jei chupe: “Mase, oväeta ara ayapo vaerä morogüɨrökuavee päve ipɨau vae Israel pegua reta jare Judá pegua reta ndive.

⁹ Mbaetɨta peñemuñagüe reta ndive morogüɨrökuavee päve ayapo rami, jókuae ara aipoko anoe ɨvɨ Egipto güi rami; echa yogüɨreko cheporogüɨrökuavee päve pe, jáeramo che aeya reta; che peYa ko jae kuae.

¹⁰ Jáeramo, kuae ko jae morogüɨrökuavee päve ayapota tëta Israel ndive jókuae ara kuri vae: Añonota cheporookuai reta ipɨa pe, aikuatiata ipɨa re; aikota jae reta iTumparä jare jae reta yogüɨrekota chembaerä.

¹¹ Jare ngaraa ye ma metei ave omboe japicha vae, ani ramo jëtara vae, jei reve: ‘Eikuaa yandeYa’; echa opaete vae chekuaata, mbaeä etei vae reta güive opaete tuichagüe reta;

¹² echa aipararekota jupimbae iyapoa, jare ngaraa ye chemaendúa iyoa reta re.”

¹³ Tumpa jei yave “morogüɨrökuavee päve ipɨau vae”, oipota jei tenondegua vae indechi ma ko. Jare mbae indechi vae okañɨ vaerä ma ko oï.