Hebreos 7 - Biblia Guarani Tumpa Iñee

Jesús ko jae sacerdote Melquisedec rami

¹ Kuae Melquisedec ko jae Salem pegua mburuvicha guasu, Tumpa tuichagüe vae isacerdote. Jae oë oövaiti Abraham ou ye omoamɨri güire mburuvicha guasu reta. Jare Melquisedec jei ñee kavi chupe.

² Jayave Abraham omee Melquisedec pe payandepo güi metei opaete güɨnoi vae güi. Tee Melquisedec oipota jei: “Mburuvicha guasu jupi vae”. Kuae Melquisedec ko jae Salem pegua mburuvicha guasu, jare kuae oipota jei: “Mburuvicha guasu mbɨakatu pegua.”

³ Mbaetɨ yaikuaa kia ra jae tu ani ichɨ vae jare kia iñemuña pegua ra vae; mbaetɨ vi yaikuaa kërai yave oa vae regua ani imano regua, körai oyeapo sacerdote jekuae avei pegua Tumpa Taɨ rami.

⁴ Mase, pemae kërai tuichagüe yae ko Melquisedec, echa ñaneñemuñagüe Abraham etei omee chupe payandepo güi metei opaete mbaembae opɨ̈rogüe güi.

⁵ Leví iñemuña sacerdote reta güɨnoi mborookuai omboresive vaerä payandepo güi metei jëtara reta güi, Moisés iporookuai jei rami. Yepe tëi jae reta vi Abraham iñemuña.

⁶ Ërei Melquisedec yepe tëi Leví iñemuña peguaä, ërei Abraham güi omboresive payandepo vae güi metei vae reta, jare jae jei ñee kavi Abraham morogüɨrökuavee güɨnoi vae pe.

⁷ Jare ngaraa kia ipuere mbae jei, tenondegua ko jei ñee kavi taɨkuegua pe yave.

⁸ Jare kuae ɨvɨ pe Israel pegua reta omee payandepo güi metei sacerdote reta pe, yepe tëi jókuae sacerdote reta omano vae ko. Ërei Tembikuatía pe jei kërai Melquisedec oikoveño vae rami.

⁹ Jare yandepuere yae kuae: Abraham rupi Leví iñemuña omboepɨ ma payandepo güi metei vae, yepe tëi añave jae reta omboresive payandepo güi metei vae;

¹⁰ echa Leví ndei oiko mbove Melquisedec oë oövaiti Abraham.

¹¹ Oime yave mona yembojupi sacerdote levita reta rupi (echa jae reta omboresive mborookuai jeta vae reta peguarä), mbaetɨ ma oata ïru sacerdote Melquisedec rami vae, Aarón iñemuña peguambae vae.

¹² Echa sacerdote pegua mbaravɨkɨ oyepoepɨ yave, oyepoepɨ tai vi ko mborookuai.

^13-14 Echa oyekuaa kavi kërai kuae ïru sacerdote Tumpa Iñee jökorai imiari jese vae jae ko yandeYa, Judá iñemuña pegua, mbaetɨ Leví iñemuña pegua. Echa Judá iñemuña mbaetɨi oparavɨkɨ sacerdoterä mɨmba oyeyukagüe oñemeea pe. Jare Moisés mbaetɨ etei imiari Judá iñemuña reta yogüɨreko vaerä sacerdoterä.

¹⁵ Ërei oyekuaa kavi yae vae jae ko oime vaerä ïru sacerdote Melquisedec rami vae,

¹⁶ ërei mbaetɨ oyeparavo ñemuña rupi mborookuai jei rami. Jaeño oyeparavo mbaepuere tekove opambae vae güɨnoi ramo.

¹⁷ Echa Tumpa iñee jei jesegua körai: “Nde ko jae sacerdote reiko avei vaerä, Melquisedec rami.”

¹⁸ Jare jókuae mborookuai ñɨma vae opa, mbaetɨ ipuere jare osiriveä ramo.

¹⁹ (Echa mborookuai mbaetɨ oporombojupi), ërei jendagüe pe ou yandeve ikavi yae vae, jókuae rupi yandepuere yaya Tumpa re.

²⁰ Jare oñono sacerdoterä Tumpa jei reve jee re ae,

²¹ ërei ïru sacerdote reta oñono ko Tumpa jeimbae reve jee re. Ërei yandeYa, oñeñono Tumpa jei jee re aeño vae rupi, echa jei chupe: “YandeYa jei jee re ae, jare ngaraa oipoepɨ iyemongeta: ‘Nde ko jae sacerdote reiko avei vaerä, Melquisedec rami.’ ”

²² Jáeramo, Jesús ko jae morogüɨrökuavee ikavi yae vae imoañetea.

²³ Jare jókuae sacerdote reta jeta yae ko, echa mano jeko pegua mbaetɨ oiko avei;

²⁴ ërei Jesús oimeño mai oiko, jáeramo ipuere oyapo sacerdote iparavɨkɨ jekuae avei rupi.

²⁵ Jáeramo, jae ipuere omboasa jekuae avei pegua, opaete oya jae rupi Tumpa re vae reta, echa oiko avei oyerure vaerä Tumpa pe jese reta.

²⁶ Echa kuae nunga sacerdote tenondegua ete ko ikavi yandeve; echa jae ko jupi vae, jekombae vae, ikɨambae vae, oyembosɨrɨ iyoa vae reta güi vae tuichagüe yae vae;

²⁷ jae mbaetɨ omee mɨmba oyeyukagüe jókuae ïru sacerdote tenondegua ete reta ara ñavo omee rami, echa jae reta tenonde omee iyoa re räri jare jaɨkue rupi opaete vae reta re. Ërei Jesús jae etei oñemee metei veseño jekuae avei pegua.

²⁸ Echa kuimbae reta mborookuai rupi oyeparavouka sacerdote tenondegua eterä vae iyoa vae reta ko. Ërei añave Tumpa oiparavo jee re ae Taɨ oiko vaerä sacerdote tenondegua eterä mborookuai jaɨkue rupi, jae ko iyoambae jekuae avei pegua vae.