Hebreos 5 - Biblia Guarani Tumpa Iñee

¹ Opaete sacerdote tenondegua ete oyeparavo ko kuimbae reta ipɨte güi, oñeñono ko kuimbae reta re oï vaerä Tumpa jóvai, jare ipuere vaerä omee Tumpa pe mbota jare mɨmba oyeyukagüe mbaeyoa reta re.

² Jare ipɨaguasu vaerä oikuaambae reve iyoa vae pe jare ombaeyavɨ vae pe, echa jae etei vi ipɨ̈ratambae vae ko;

³ jáeramo, ikavi ko omee vaerä iyegua mɨmba oyeyukagüe jare opaete vae reta re.

⁴ Jare mbaetɨ kia ipuere oyeparavo jaeiño, oiko vaerä sacerdote tenondegua eterä. Jaeño Tumpa oiparavo vae ipuere oiko sacerdote tenondegua eterä, Aarón oyeparavo vae rami.

⁵ Jaeramiño vi Cristo mbaetɨ oyeparavo jaeiño sacerdote tenondegua eterä. Tumpa ko oiparavo jei yave: “Nde ko jae cheRaɨ. Che ko romoñemuña añave.”

⁶ Jare Tumpa Iñee pe oyekuatía ye oï körai: “Nde ko jae sacerdote reiko avei vaerä, Melquisedec rami.”

⁷ Cristo kuae ɨvɨ pe oiko ramboeve, iñeeäta jare jesaɨ reve jeta oyerure ipuere tëi omboasa mano güi vae pe. Jare iñeereendu ramo Tumpa oendu chupe iyerure.

⁸ Ërei yepe tëi jae ko Tumpa Taɨ, ërei oyemboe iñeereendu oiporara vae rupi.

⁹ Jare opaete Tumpa jei vae oupitɨ ma yave, ou opɨta yemboasa opambae vae, opaete jae jei vae oyapo vae reta peguarä;

¹⁰ jare Tumpa oñono sacerdote tenondegua eterä Melquisedec rami.

Yeandu yembopɨapochɨ Tumpa kotɨ vae regua

¹¹ Aipota tëi amombeu peve jeta kuae regua, ërei yavai ko oï amombeu peve vaerä, mbegüe rupi yae peikuaa ramo.

¹² Echa peporomboeta tëi ma ko, ɨma rupi ma peiko güire jekuaeño peipota pomboe ye tenondegua yemboe Tumpa iñee regua re. Peyu pepɨta michia necheño jou vae rami, mbaetɨ tembíu täta vae jou vae rami.

¹³ Michia necheño vɨteri jou vae mbaetɨ ko ipoki yemboe arakuaa pegua pe, echa michia ko;

¹⁴ ërei tembíu täta vae ko okuakuaa vae reta peguarä, oikatu ma omboyoavɨ ikavi vae ikavimbae güi vae reta peguarä.