Hebreos 4 - Biblia Guarani Tumpa Iñee

¹ Jáeramo yaipoɨu, echa güɨramoi amogüe pe reta ngaraa peupitɨ penoi vaerä jókuae mbutuu Tumpa omee vae pe.

² Echa yandeve vi oñemoërakua ñee ikavi vae chupe reta oñemoërakua rami; ërei jókuae ñee ikavi vae mbaetɨ oyapo mbae chupe reta, echa mbaetɨ güɨrovia reta jókuae oendugüe.

³ Jare yande yarovia Tumpa vae yaupitɨ jókuae mbutuu, Tumpa jei rami: “Jáeramo, chearasɨ reve jae: Mbaetɨta oike reta mbutuu ameeta vae pe.” Yepe tëi Tumpa opa oyapo iparavɨkɨ, ɨvɨ opa oyapo güive.

⁴ Echa oime tembikuatía pe jei ara chiu regua: “Tumpa oputuu chiúa ara pe opaete jembiapo reta güi.”

⁵ Jei ye vi: “Mbaetɨta oike reta mbutuu ameeta vae pe.”

⁶ Yaikuaa ko mbaetɨño oike mbutuu pe vae, echa tenonde voi ma omoërakua ñee ikavi vae chupe vae reta mbaetɨ oike reta iñeereendúä jeko pegua.

⁷ Jáeramo, Tumpa omee ye “kuae ara”. Echa arakae ma jei David rupi körai: “Añave peendu yave iñee: Agüɨye pepɨa pemotäta, chemboarasɨuka yave rami.”

⁸ Echa Josué omee yave mona mbutuu ñaneñemuñagüe reta pe, ngaraa tëi Tumpa imiari ye ïru ara re.

⁹ Jáeramo, oimeño vɨteri ko mbutuu Tumpa imbae vae reta peguarä.

¹⁰ Echa oike jókuae mbutuu pe vae, oputuu ko iparavɨkɨ reta güi, Tumpa oputuu iparavɨkɨ güi rami.

¹¹ Jáeramo, ñañemoäta ngatu yaike vaerä jókuae mbutuu pe, agüɨye vaerä oasa yande ndive jókuae iñeereendumbae vae reta rami.

¹² Echa Tumpa iñee ko oikove jare imbaepuere, jaimbe yae metei kɨsepuku jaimbe yoyavi vae güi, ipuere oike yandepɨa pe jare yanderekove pe, yandeyoapɨa pɨa pe jare ñaneäputuu pe; ojäa yandeyemongeta reta jare yandepɨa jemimbota reta.

¹³ Oyapo mbaembae Tumpa oyapo vae mbaetɨ ipuere oñemi chugüi. Echa opaetei ko mbaembae oyekuaa oï jókuae ñanejäata vae jóvai.

Jesús ko sacerdote tenondegua ete tuichagüe

¹⁴ Jesús Tumpa Taɨ, jae ko yandesacerdote tenondegua ete tuichagüe oike ara pe vae, jáeramo, ñañemoäta ngatu yandeporogüɨrovia pe.

¹⁵ Echa yandesacerdote tenondegua ete yandeparareko ko ñanepɨ̈ratambae re, echa jae oiporara opaete morojäa reta yande rami, ërei jae mbaetɨ etei iyoa.

¹⁶ Jáeramo, yayemboya yaipoɨumbae reve ipɨakavi yae vae iguapɨa re, jae yandeparareko vaerä jare ipɨakavi rupi yandemborɨ vaerä yaiporara yave.