Hebreos 3 - Biblia Guarani Tumpa Iñee

Jesús tuichagüe yae Moisés güi

¹ Jáeramo, cherɨvɨ oporogüɨrovia vae reta, Tumpa pereenɨi vae reta, pemae kavi Cristo Jesús temimondo jare sacerdote tenondegua ete, jese yarovia vae re;

² Jesús oiko jupi rupi imboguapɨa kotɨ, Moisés jupi rupi oiko opaete Tumpa jo pe rami.

³ Jare Jesús oyembotuichauka yae Moisés güi. O iyapoa imboetea yae jae o oyapo vae güi rami.

⁴ Jare opaete o, oime iyapoa. Ërei opaete mbaembae iyapoa, jae ko Tumpa.

⁵ Añete Moisés jupi opaete Tumpa jo pe, tembiokuai rami, omoërakua vaerä taɨkue rupi oikota vae.

⁶ Ërei Cristo ko jae Tumpa Taɨ, jare jae ko opaete Tumpa jo iYa. Jare jökoraita ñaneräta ngatu jare yayerovia yave ñaäro ñaï vae re.

Tumpa imbae reta iputuu

⁷ Jáeramo, Espíritu Santo jei rami: “Añave peendu yave iñee:

⁸ Agüɨye pepɨa pemotäta, chemboarasɨuka yave rami; jókuae ara pejäa Tumpa ipɨaguasu ñuu pe rami,

⁹ peñemuñagüe reta oipota tëi oyavɨuka chevea pe, chemboaporova reta, yepe oecha reta tëi ayapogüe cuarenta año rupi.

¹⁰ Jókuae jeko pegua chearasɨ aiko kuae ñemuña reta kotɨ, jare jae: ‘Kuae tëta ipɨa güɨrave avei, ¡jare mbaetɨ oikuaa reta cheporookuai!’

¹¹ Jáeramo, chearasɨ reve jae: ‘Mbaetɨta oike reta mbutuu ameeta vae pe.’ ”

¹² Jáeramo cherɨvɨ reta, peyeandu agüɨye vaerä pepɨa oñemotäta mbaetɨ peporogüɨrovia ramo, jare pesɨrɨ Tumpa oikove vae güi;

¹³ ërei ara ñavo peñomoäta ngatu, “kuae ara” yae ramboeve, agüɨye vaerä metei ave pepɨte pegua oyembopɨatäta mbaeyoa iporombotavɨ rupi.

¹⁴ Echa ñañemoïru ma Cristo ndive, ñanepɨ̈rata yave iyɨpɨ güive yarovia vae re,

¹⁵ yae ramboeve: “Añave peendu yave iñee: Agüɨye pepɨa pemotäta, chemboarasɨuka yave rami.”

¹⁶ ¿Kia reta pa jókuae Tumpa iñee oendu güire omboarasɨuka vae? ¿Jaeä pa Moisés güɨnoe Egipto güi vae reta?

¹⁷ Jáeramo Tumpa iyarasɨ cuarenta año jókuae ñaneñemuñagüe reta pe, iyoa reta ramo opa omano ñuu rupi.

¹⁸ Echa Tumpa jei jee re ae mbaetɨ vaerä oike reta iputuúa pe, jókuae iñeereendumbae reta.

¹⁹ Jare yaikuaa jae reta mbaetɨ ko ipuere oike Canaán pe, mbaetɨ güɨrovia reta Tumpa ramo.