Hebreos 13 - Biblia Guarani Tumpa Iñee

Oporogüɨrovia vae reta jeko

¹ Peyoaɨu päve avei.

² Pemboresive kavi avei mboupa, echa jökorai amogüe reta omboresive araɨgua jo pe oikuaambae reve.

³ Pemaendúa tembipɨɨrɨru pe ñogüɨnoi vae reta re, peï vi jae reta ndive rami. Pemaendúa vi oyererekoasɨ katu vae reta re, pe reta etei vi peiporara peï rami.

⁴ Opaete vae tomboete menda, agüɨye tomongɨa menda vae, echa Tumpa ojäata aguasa oyapo vae reta jare menda re oyuvanga vae reta.

⁵ Agüɨye peipotarai korepoti. Peyerovia mbaembae penoi vae re, echa Tumpa jei: “Ngaraa poeya peangarekoambae.”

⁶ Jáeramo yandepuere yae yakɨɨyembae reve körai: “YandeYa ko chemborɨ vae. Ngaraa akɨɨye mbae oyapota cheve vae güi.”

⁷ Pemaendúa oyangareko peré vae reta omombeu Tumpa iñee peve vae re. Pemae kërai yogüɨreko vae re jare pemomoe jae reta iporogüɨrovia.

⁸ Jesucristo ko oyepoepɨmbae etei iyɨpɨ güive, añave jare jekuae avei pegua.

⁹ Agüɨye peñemaeño peyererajauka oipotagüe mboromboe ambuaeyee vae pe; ikavi ko ñañemomɨ̈rata yandepɨa peTumpa ipɨakavi rupi, mbaetɨ mborookuai reta tembíu regua rupi. Echa mbaetɨi oporomomɨ̈rata jókuae mbaembae reta.

¹⁰ Yande ñanoi metei mɨmba oyeyuka oñemee jese vae, joko pe mbaetɨ ipuere okaru sacerdote reta o guakapi pegua pe oparavɨkɨ vae reta.

¹¹ Echa sacerdote tenondegua ete güɨroike mɨmba oyeyukagüe mbaeyoa re vae reta jugüɨ o mbaemboetea pe, ërei jetegüe oyeapɨ ikatu pe.

¹² Jáeramo Jesús vi oiporara mano tëta guasu güi ikatu pe, ñaneñono tee vaerä Tumpa peguarä jae jugüɨ rupi.

¹³ Jáeramo yaja ikotɨ tëta guasu güi ikatu pe, yaiporara vi ñereröɨro Jesús rami,

¹⁴ echa mbaetɨ ñanoi metei tëta guasu jekuae avei pegua vae kuae ɨvɨ pe, ërei yaeka ko jókuae tëta guasu outa vae.

¹⁵ Jáeramo yamboete avei Tumpa Jesús rupi, kuae oipota jei yamboete Tumpa yandeyuru pe.

¹⁶ Ërei agüɨye ñaneäteɨ yayapo vaerä ikavi vae jare yayomborɨ päve vaerä; echa kuae nunga ko omboyerovia Tumpa.

¹⁷ Peñeereendu oyangareko peré vae reta pe jare peiko jae reta jeia re, echa jae reta oyangareko oï perekove re, oikuaa reve Tumpa ojäata ko iparavɨkɨ re; jökorai peyapo yave, jae reta oparavɨkɨta Tumpa pe oyerovia reve, ipɨatɨtɨmbae reve, echa ipɨatɨtɨ reve oparavɨkɨ Tumpa pe yave, ngaraa jaekavi.

¹⁸ Peyerure Tumpa pe oreré. Echa roikuaa jekuaeño royapo ikavi vae pekotɨ. Jekuaeño roipota royapo jupi vae.

¹⁹ Jare che pomoñera yae peyerure vaerä Tumpa pe, jae chemondo ye vaerä jarembaeño pépɨri.

Tamaraeme reta

²⁰ Tumpa mbɨakatu omee vae, yandeYa Jesucristo omoingove ye omanogüe reta ipɨte güi vae, vecha reta iyangarekoa tuichagüe vae, tugüɨ morogüɨrökuavee päve opambae vae pegua rupi vae,

²¹ tapembojupi opaete mbae pe, peyapo vaerä jemimbota; Tumpa toyapo yanderé oipota vae Jesucristo rupi; ¡toyemboete Cristo jekuae avei rupi! ¡Amén!

²² Cherɨvɨ reta, pomoñera peropɨa vaerä kuae mbovɨ yemboarakuaa aikuatía peve vae.

²³ Tamombeu peve yanderɨvɨ Timoteo oë ma tembipɨɨrɨru güi. Jae ou yave ɨmambae, arajata cherupíe aja pépɨri yave.

²⁴ Tamaraeme toñogüɨnoi opaete peangarekoa reta jare opaete oporogüɨrovia vae reta. Italia pegua reta vi omondo peve tamaraeme.

²⁵ Tumpa ipɨakavi toï opaete pe ndive. ¡Amén!