Hebreos 11 - Biblia Guarani Tumpa Iñee

Mborogüɨrovia regua

¹ Mborogüɨrovia ñanoi yave, yaikuaa ñanoita ko ñaäro ñaï yayerovia reve vae, yepe tëi mbaetɨño yaecha.

² Ñaneñemuñagüe reta iporogüɨrovia rupi omboyerovia Tumpa.

³ Mborogüɨrovia rupi yaikuaa ɨvɨ jare opaete ara re ñogüɨnoi vae oyeapo ko Tumpa iñee rupi; opaete mbaembae oyekuaa vae, oyeapo ko mbaetɨ vae güi.

⁴ Iporogüɨrovia rupi Abel omee Tumpa pe mɨmba oyeyukagüe, ikavi yae jókuae Caín omee vae güi. Jókuae rupi Tumpa oikuaauka ombojupi ko Abel, jare omboresive mbota omee chupe vae; yepe tëi Abel omano ma, ërei iporogüɨrovia rupi jekuaeño imiari.

⁵ Iporogüɨrovia rupi Enoc oyereraja ɨvɨ güi jekove reve. Mbaetɨ kia ipuere oväe chupe. Echa Tumpa güɨraja ɨvɨ güi. Ndei Tumpa güɨraja mbove, jae ombopɨakatu Tumpa.

⁶ Ërei mbaetɨ ñanoi mborogüɨrovia Tumpa re yave, ngaraai yamboyerovia. Echa yarovia Tumpa yave, yaroviata oime ko jae jare omboekovia ko oeka vae reta pe.

⁷ Iporogüɨrovia rupi Noé oyapo barco guasu jëtara reta oasayepe vaerä ɨporu guasu güi. Echa ndei ɨporu guasu ou mbove, Tumpa oikuaauka Noé pe. Jáeramo Noé oyapo barco guasu oipoɨu güi, jo pegua reta oyemboasauka vaerä; jare jókuae iporogüɨrovia rupi Noé oikuaauka ɨvɨ pegua reta pe ikavimbae vae oyapo vae reta ko, jare güɨnoi yembojupi iporogüɨrovia rupi.

⁸ Iporogüɨrovia rupi Abraham, Tumpa oenɨi yave ojo, Tumpa güɨrökuavee omeeta ɨvɨ imbaerä vae kotɨ; oë ojo oikuaambae reve ketɨ ko ojo vae kotɨ.

⁹ Iporogüɨrovia rupi Abraham oiko ketɨgua rami ɨvɨ oñemeeta chupe vae pe ɨvɨ ambuae pe rami. Oiko o guakapi pegua pe Isaac jare Jacob ndive, yepe tëi jae reta vi ko ɨvɨ iyarä vae.

¹⁰ Echa Abraham oäro tëi oike vaerä tëta guasu opambae vae Tumpa oyapo vae pe.

¹¹ Iporogüɨrovia rupi vi Sara imembɨ, yepe tëi jae ko imembɨmbae jare itɨ̈aro yae ma; echa güɨrovia Tumpa ombopota ko iñee.

¹² Jáeramo vi Abraham indechi yae ma vae güi jeta iñemuña, yasɨtata ara re ñogüɨnoi vae rami jare jeta yae ɨvɨkuitï ɨguasu jembeɨ rupi rami.

¹³ Iporogüɨrovia reve opa omano omboresivembae reve Tumpa güɨrökuavee chupe reta vae, ërei oecha reta mombɨrɨ güi iporogüɨrovia rupi jare omomaraetei, jare jae reta omae iyé ketɨguaño ko kuae ɨvɨ pe.

¹⁴ Jare jökorai jei vae reta, oipota jei oeka ko jëtaguasurä;

¹⁵ echa oyemongeta yave mona jókuae ɨvɨ Abraham oë ojo chugüi vae re, ipuereño tëi opa ye oyerova reta jokotɨ.

¹⁶ Ërei oipota reta tëta ikavi yae vae jókuae güi. Oipota reta tëtaguasu ara pegua. Jáeramo Tumpa mbaetɨ oñerenoi oiko vaerä jae reta iTumparä, echa omokätɨro chupe reta metei tëtaguasu.

¹⁷ Iporogüɨrovia rupi Abraham, Tumpa ojäa iporogüɨrovia yave, oyukata tëi Isaac omee vaerä Tumpa pe. Oïndaivi omee vaerä taɨ jaevaeño vae yepe tëi omboresive morogüɨrökuavee,

¹⁸ Tumpa jei yave chupe: “Isaac rupiño oimeta neñemuña.”

¹⁹ Echa Abraham güɨrovia oyuka yave taɨ, Tumpa ipuere omoingove ye. Jare yandepuere yae Abraham omboresive ye ko Isaac mano güi.

²⁰ Iporogüɨrovia rupi Isaac jei ñee kavi Jacob pe jare Esaú pe, oyeapota chupe reta vae regua.

²¹ Iporogüɨrovia rupi Jacob omanota ma yave, jei ñee kavi José taɨ reta ñavo pe, jare omboete Tumpa oyeko reve ipopoka re.

²² Iporogüɨrovia rupi José omanota ma yave, jei Israel pegua reta pe oëta ko yogüɨraja Egipto güi vae; jare oyókuai reta jetegüe re.

²³ Iporogüɨrovia rupi Moisés oa yave tu reta oñomi güɨreko mboapɨ yasɨ rupi, echa oecha reta michia Moisés maepöra yae ko, jare mbaetɨ okɨɨye reta mburuvicha guasu iporookuai güi.

²⁴ Iporogüɨrovia rupi Moisés okuakuaa ma yave, oipotaä oiko vaerä Faraón tayɨ imembɨrä;

²⁵ oiparavo oiporara vaerä Tumpa imbae vae reta ndive, oyerovia vaerägüe yerovia mbaeyoa pegua pe michi pegua,

²⁶ chupeguarä ikavi yae ko oiporara vaerä Cristo oiporara rami, Egiptoɨgua reta imbaeyekou güi; echa omae avei Tumpa omeeta chupe mbota vae re.

²⁷ Iporogüɨrovia rupi Moisés ojo Egipto güi, okɨɨyembae reve mburuvicha guasu iyarasɨ güi, echa oñemomɨ̈rata oecha rami Tumpa Oyekuaambae vae.

²⁸ Iporogüɨrovia rupi Moisés oyapo Pascua jare oñapiramo öke reta tugüɨ pe, agüɨye vaerä araɨgua mano jerúa oyuka Israel iñemuña taɨrɨpɨ reta.

²⁹ Iporogüɨrovia rupi Israel iñemuña reta oasa Ɨguasu Pɨ̈ta vae ɨvɨ otini vae rupi rami; jare Egiptoɨgua reta oipota tëi oasa jae reta rami yave opa ɨ oyasoi.

³⁰ Mborogüɨrovia rupi tëta guasu Jericó ikësea opa osururu chiu ara ma oyere jese reta güire.

³¹ Iporogüɨrovia rupi kuña iyaguasa pota vae Rahab mbaetɨ okañɨtei oporogüɨroviambae reta ndive, Echa jae omboresive kavi Israel pegua temimondo oporopïaro vae reta.

³² ¿Mbae ye pa jaeta? Arovia oatata cheve ara chemiari vaerä, peve Gedeón, Barac, Sansón, Jefté, David, Samuel jare ñeemombeúa reta regua;

³³ iporogüɨrovia rupi opɨ̈ro reta mborookuaía reta, oyapo reta jupi vae, omboresive reta oñererökuavee chupe reta vae, jare oiyuruokua yaguapope reta,

³⁴ ombogüe reta tata yavaetegüe, oasayepe reta kɨsepuku güi, oñemomɨ̈rata reta ipɨtu pɨte pe, imbaepuere yae reta ñeraro pe, opa ombotekuarai tovaicho ketɨgua reta.

³⁵ Amogüe kuña reta omboresive ye omano chugüigüe oikove ye vae. Ërei ïru vae reta omano oiporara yae reve, oñemaeño reve oikove ye vaerä kuri ikavi yae vae peguarä.

³⁶ Ïru vae reta oyeyuvangauka iyé jare oñenupauka chikote pe, jare ïru vae reta oñeñoñauka tembipɨɨrɨru pe.

³⁷ Amogüe vae oyapi ita pe oyuka, ïru vae reta oyasɨa ikúa rupi siera pe oyuka, ojäa reta iporogüɨrovia, omano reta kɨsepuku pe; oguata reta oipota rupi oyemonde reve vecha ipiregüe ani kavara ipiregüe peño, poriau reta, ipɨatɨtɨ yae reta, yogüɨrekoasɨ katu;

³⁸ opaete kuae reta, mbaetɨ jaekavi yogüɨreko vaerä ɨvɨ pe, oguata yogüɨreko ñuu rupi, ɨvɨtu guasu reta rupi, ɨvɨkua tuicha vae reta rupi, itakua reta rupi.

³⁹ Opaete jókuae reta omboyerovia Tumpa iporogüɨrovia pe. Ërei omboresiveä oñererökuavee chupe reta vae.

⁴⁰ Echa Tumpa omokätɨro yandeve mbae ikavi yae vae, agüɨye vaerä jae reta räri oyembojupiuka yandegüi.