Hebreos 10 - Biblia Guarani Tumpa Iñee

¹ Mborookuai jaeño oikuaauka mbaembae reta outa vae, oyembojaangaño ko jese, echa mɨmba oyeyukagüe reta oñemee Tumpa pe año ñavo vae, mbaetɨ etei ipuere opa omboai jökorai oya Tumpa re vae reta iyoa reta.

² Echa ipuere yave mona opa omboai, mbaetɨta tëi ma ko oñemee mɨmba oyeyukagüe reta. Echa jökorai omboete Tumpa vae reta mbaetɨta tëi ko oyemongeta ye iyoa re.

³ Ërei jókuae mɨmba oyeyukagüe reta Tumpa pe oñemee vae rupi oporomomaendúa año ñavo mbaeyoa re;

⁴ echa toro reta jugüɨ jare kavara reta jugüɨ mbaetɨ etei ipuere omboi mbaeyoa reta.

⁵ Jáeramo Cristo ou yave kuae ɨvɨ pe, jei Tumpa pe körai: “Mɨmba oyeyukagüe jare mbota mbaetɨ reipota; reyapo chereterä.

⁶ Mɨmba oyeyukagüe opaetei oyeapɨ vae jare ñɨ̈ro pegua mbaetɨ ndembopɨakatu.

⁷ Jáeramo jae: Mase, ko ayu cheRu Tumpa, ayapo vaerä nderemimbota, tembikuatía pe, oyekuatía oï cheregua rami.”

⁸ Cristo jei tenonde kërai Tumpa mbaetɨ oipota ani ombopɨakatu mɨmba oyeyukagüe, mɨmba oyeyukagüe opaetei oyeapɨ vae jare ñɨ̈ro pegua reta (yepe tëi opaete kuaekuae reta mborookuai jei oñemee vaerä),

⁹ jaɨkue rupi jei: “Mase, ko ayu cheRu Tumpa, ayapo vaerä nderemimbota.” Kuae oipota jei jókuae mɨmba oyeyukagüe oñemee vae reta mbaetɨ ma ko mbaerä ikavi, jare jókuae ipoepɨka pe Cristo jete oñemee Tumpa pe.

¹⁰ Jökorai Jesucristo omee jete metei veseño jekuae avei pegua. Jókuae jemimbota rupi Tumpa ñaneñono tee iyeupeguarä.

¹¹ Opaete sacerdote reta oyemboɨ Tumpa jo pe ara ñavo oyeokuai vaerä jare omee vaerä mɨmba oyeyukagüe mbaetɨi omboai mbaeyoa vae. Ara ñavo jae jaeño oyapo reta.

¹² Ërei Cristo omee jete metei veseño jekuae avei pegua, javoi oguapɨ Tumpa iyakatu kotɨ.

¹³ Jare oguapɨ joko pe güive, oäro oï Tumpa opa regua jovaicho reta oñono ipɨ igüɨ pe,

¹⁴ echa metei veseño omee jete vae rupi ombojupi jekuae avei pegua oñeñono tee vae reta.

¹⁵ Jare Espíritu Santo vi omombeu kuae yandeve, jei yave:

¹⁶ “Kuae morogüɨrökuavee päve ayapota jae reta ndive, jókuae ara reta taɨkuegua pe, cheporookuai reta añonota jare aikuatiata jae reta ipɨa pe.”

¹⁷ Jei vi: “Jare ngaraa ye ma chemaendúa iyoa reta re.”

¹⁸ Jare Tumpa iñɨ̈ro yandeve yandeyoa reta re yave, mbaetɨ ye ma ñamee mbae yandeyoa reta re.

¹⁹ Jáeramo, cherɨvɨ reta, yandepuere yaike yakɨɨyembae reve cuarto oñeñono tee kavi yaea pe Jesucristo jugüɨ rupi,

²⁰ tape ipɨau jare oikove vae jae oipea asoya o imboyaoa vae rupi, kuae ko jae Cristo jete;

²¹ ñanoi ramboeve sacerdote tuichagüe vae, Tumpa jo pe,

²² yayemboya Tumpa re yandepɨa jupi reve, yarovia kavi reve, yandepɨa oyetɨo reve yemongeta ikavimbae güi, jare yanderete oyeyoe reve ɨ ikɨambae pe.

²³ Jekuaeño ñanemomɨ̈rata yaipoɨumbae reve ñaäro vae re, echa jupi ko jókuae güɨrökuavee vae.

²⁴ Yaeka kërai yayomborɨ päve vaerä, ñañomoäta ngatu yayoaɨu vaerä jare tembiapo reta ikavigüe pe.

²⁵ Agüɨye yaata yemboatɨa pe, amogüe vae reta oyepokuaa rami, jaeño yayomboarakuaa; jeiete ñañemoäta ngatu, yaikuaa jókuae ara köi yae ramo.

²⁶ Echa yandeyoa yave ñanekɨ̈reɨ reve añete vae yaikuaa güire, mbaetɨ ye ma kia oñemee vaerä mbaeyoa reta re;

²⁷ jaeño ñaärota yavaetegüe Tumpa iporojäa, tata yavaetegüe omboaita Tumpa kotɨ oyemboyovaicho vaerä reta.

²⁸ Kia nunga vae oyapoä Moisés iporookuai yave, mókoi ani mboapɨ vae omombeu yave iyoa re, tomano oyepararekombae reve.

²⁹ Vɨtei pa güɨröɨro iyeugüi Tumpa Taɨ vae reta, oiporara yaeta ko, jare güɨröɨro tugüɨ morogüɨrökuavee päve pegua vae, jókuae tugüɨ rupi ñaneñono tee tëi iyeupeguarä, jökorai güɨröɨro Espíritu ipɨakavi.

³⁰ Yaikuaa ko Tumpa jei: “Oiporarauka vae ko che. Che tamboekovia chupe.” Jei vi: “YandeYa oiporaraukata imbae vae reta pe.”

³¹ ¡Yavaete yae ko yaa yave Tumpa oiko tee vae ipo pe!

³² Ërei pemaendúa ara reta oasagüe re, kërai Cristo re peyemboe yave, ïru vae reta oiporarauka yae peve yave pepɨ̈rata peporogüɨrovia pe,

³³ ïru vae reta pereröɨro, echa jei reta ikavimbae vae peve jare oyapo reta ikavimbae vae peve, opaete vae reta jovake. Jaeramiño vi peñemoïru pekɨ̈reɨ ngatu reve pe rami oiporara vae reta ndive.

³⁴ Echa peiparareko tembipɨɨrɨru pe ñogüɨnoi vae reta. Jare ïru vae reta pembaembae opɨ̈ro pegüi yave, peiporara peyerovia katu reve. Echa peikuaa penoi ko ara pe mbaembae ikavigüe opambae.

³⁵ Jáeramo peyeko avei Tumpa re, echa jókuae tuicha rupi jekoviata peve;

³⁶ echa jaekavi ko pepɨaguasu vaerä, peyapo vaerä Tumpa jemimbota, jökorai penoi vaerä jae güɨrökuavee vae.

³⁷ Echa Tumpa Iñee pe jei: “Echa joko ñoete ma, jókuae outa vae outa ko.

³⁸ Tumpa ombojupi vae güɨnoita tekove oporogüɨrovia ramo; ërei oime yave kia opia, ngaraa chemboyerovia.”

³⁹ Ërei yande jaeä ko Tumpa güi oyerova ye okañɨtei vaerä vae reta, yande reta ko jae oyemboasauka iporogüɨrovia re vae reta.