HAGEO 1 - Biblia Guarani Tumpa Iñee

Tumpa omboeta tupao opa oñemopüa pɨau vaerä

¹ Mokoía año ma Darío oiko mburuvicha guasurä yave, ova yasɨ tenondegua ara pe yandeYa iñee ou ñeemombeúa Hageo rupi, Zorobabel mburuvicha Judá pegua, Salatiel taɨ pe jare Josué sacerdote tenondegua, Josadac taɨ pe.

^2-3 Kuae jei YandeYa Imbaepuere yae ete vae ñeemombeúa rupi: “Kuae tëta pegua reta jei mbaetɨño oväe ara chero oñemopüa pɨau ye vaerä.

⁴ Ërei, ¿peve reta pa oväe ma ara peiko vaerä o ikavigüe rupi, chero oyemboai oï ramboeve?

⁵ YandeYa Imbaepuere yae ete vae jei körai: Peyemongeta kavi pereko reta re.

⁶ Pemaetɨ jeta, ërei mbovɨ yae pemboɨru; pekaru, ërei mbaetɨ perɨ̈vɨata; peɨu, ërei mbaetɨ peɨuve omboasa; peyemonde, ërei mbaetɨ pemboaku katu; jare ara ñavo oparavɨkɨ omongana vaerä vae omboresive korepoti yave, oñono ivosiko osoro vae pe rami.

⁷ YandeYa Imbaepuere yae ete jei körai: Peyemongeta kavi pereko reta re.

⁸ Pekua ɨvɨtɨ güi peru ɨvɨra jare pemopüa pɨau ye chero; añonota jese cheyerovia katu jare cheyemboetea, jei yandeYa.

⁹ Peeka tëi jeta, ërei mbovɨ yae peväe; pemboɨru pero pe vae, che opata amboai pegüi cheɨvɨtu pe. ¿Peikuaa pa maera? Jei yandeYa Imbaepuere yae ete vae. Chero oyemboai oï jeko pegua; echa metei ñavo peyemoambeko pero ae re.

¹⁰ Jáeramo ama opɨta pegüi jare ɨvɨ mbaetɨ omee peve mbaagüɨye.

¹¹ Jare aru ara-tini ɨvɨ re, ko reta re jare trigo re, uvarupa re, ɨvɨra olivorupa re, mɨmba reta re jare opaete kuimbae reta ipo pe oyeapo vae re.”

¹² Zorobabel, Salatiel taɨ jare sacerdote Josué tenondegua ete Josadac taɨ jare opaete ïru reta oendu yandeYa Tumpa iñee, ñeemombeúa Hageo rupi jei chupe reta vae, yandeYa Tumpa oyókuai vae rami; jare opaete vae okɨɨye yandeYa güi.

¹³ Jayave Hageo, yandeYa jemimondo imiari yandeYa iporookuai rupi, opaete vae pe, jei reve: “YandeYa jei: ‘Che aï pe ndive.’ ”

¹⁴ Körai yandeYa omokɨ̈reɨ Zorobabel mburuvicha Judá pegua, Salatiel taɨ, jare Josué sacerdote tenondegua ete Josadac taɨ jare opaete ïru reta; jare omboɨpɨ reta omopüa pɨau yandeYa Tumpa Imbaepuere yae ete vae jo,

¹⁵ mokoía año ma Darío oiko mburuvicha guasurä yave, ova yasɨ veinticuatro ara pe.