HABACUC 1 - Biblia Guarani Tumpa Iñee

Habacuc iñeengeta jupimbae kotɨ

¹ Kuae jae yandeYa oechauka ñeemombeúa Habacuc pe vae.

² CheYa Tumpa, ¿kërai yave regua pa asapukaita, aeka ndeporomborɨ jare mbaetɨ reendu cheve? ¿Kërai yave regua pa aiporuta ndeve remboapɨ vaerä ikavimbae, jare mbaetɨ orereepɨ?

³ ¿Maera pa remaeño aecha ikavimbae jare yemoambeko reta? Ipɨa-pïrimbae jare kañɨtei ipɨte pe aï; opaete rupi oime ñeapo reta jare ñeraro reta.

⁴ Mbaetɨ oyeapo mborookuai jei vae, morojäa mbaetɨ oyeapo jupi rupi, iyoa vae reta omotareɨ jeko kavi vae, jáeramo mbaejupi oikomegua.

YandeYa omboyevɨ ñee

⁵ YandeYa jei: “Pemae tëtaguasu reta peɨvɨrigua re; jare pepɨakañɨ jese. Echa köi yae ma mbae ayapo vaerä perovake, ngaraa perovia oyemombeu peve yave.

⁶ Caldeaɨgua reta pe ameeta oñeraro vaerä, jae ko ipɨa-pïrimbae yae vae reta, oïndaivi avei oguata vaerä opaete ɨvɨ rupi opɨ̈ro vaerä ɨvɨ ambuae vae.

⁷ Kɨɨyea yae vae reta ko jare yavaetegüe, jae reta mborookuai oyapo vaeño ombotenonde.

⁸ Ikavayu reta iñäkua yae yagua reta güi, pochɨ yae reta aguarayaɨmba reta pɨ̈tu yave oë oguata vae güi. Jeta yae ikavayu regua reta yogüeru mombɨrɨ güi oporepeña, güɨraké oporepeña jembia re rami.

⁹ Ojoa rupi opa oporomboai; jenondeve okɨɨye voi ma ñogüɨnoi, jeta yae tembipɨɨ oyapo, ɨguasu jembeɨ pe ɨvɨkuitï oï rami.

¹⁰ Oyóyai yóyai mburuvicha guasu reta jare mburuvicha reta imboetea yae vae, oyóyai tëta guasu ikësea, oyapo yeupika oike reta vaerä.

¹¹ Ɨvɨtuai rami oasa reta; oyapo reta ikavimbae, imbaepure güɨnoi reta itumpa reta güi.”

Habacuc iñeengeta pɨau ye

¹² CheYa Tumpa, ¿jaeä pa ko nde reiko avei vae cheTumpa Iyoambae omanombae vae? CheYa, ita guasu cheñepɨ̈roa, nde remee Caldeaɨgua pe neporojäa, remopüa jae reta oiporarauka vaerä.

¹³ Ikɨa vaeä ko nde remae vaerä ikavimbae re jare ndepɨakatu vaerä jese; jayave, ¿maera pa remaeño oporoyuka vae reta re, jare kïriiño remae jeko kavimbae vae reta re omboai yave jeko ikavi chugüi vae reta?

¹⁴ ¿Maera pa kuimbae reta re remaeiño jevae ɨguasu rupigua re rami, mɨmba michi raɨ yae vae iyangarekoambae re rami?

¹⁵ Caldeaɨgua reta oyemombae ïru ɨvɨ re. Yeporaka regua oyemombae jevae re rami, pinda pe oipɨɨ jare pɨsa pe omboa javoi oecha yave oyerovia yae.

¹⁶ Jáeramo yeporaka regua omboete yae ipɨsa jare ipinda, omee mɨmba oyeyuka vae jare oapɨ ikäti kavi vae incienso omboete jeko pegua; echa jókuae rupi güɨnoi jou vaerä tembíu ikavigüe ikɨra kavi vae.

¹⁷ Jökorai, ¿jekuaeñota pa Caldeaɨgua reta oremboa ipɨsa reta pe? ¿Jekuaeñota pa oporoyuka reta oporopararekombae reve?