GÉNESIS 9 - Biblia Guarani Tumpa Iñee

Tumpa oyapo Noé ndive morogüɨrökuavee päve

¹ Tumpa iñee kavi Noé pe jare taɨ reta pe, jei chupe reta körai: “Peñemuña jeta, pemotɨnɨe vaerä ɨvɨ.

² Opaete mbaemɨmba ɨvɨ pegua tokɨɨye pegüi, güɨra reta, opaete oikove vae, jare opaete jevae reta ɨguasu pe ñogüɨnoi vae. Pepo pe ko oñemee.

³ Opaete mbaemɨmba toiko perembiurä, jökorai opaete temitɨ amee peve rami.

⁴ Ërei agüɨyeta peu soo jugüɨ reve. Echa jugüɨ re ko oï jekove.

⁵ Echa che añetete ayepɨta ko perugüɨ re; opaete mbaemɨmba re jare kuimbae re. Kuimbae ñavo re ayepɨta japicha jekove re chupe.”

⁶ “Kia ñavo japicha oyuka yave, jae tomano vi japicha ipo pe. Echa kuimbae, Tumpa rami ko ayapo.

⁷ Ërei pe reta, peñemuña jeta kuae ɨvɨ pe. Pemotɨnɨe kuae ɨvɨ.”

⁸ Tumpa omomiari Noé jare taɨ reta, jei reve:

⁹ “Mase, kuae morogüɨrökuavee päve añonota peve, jökorai vi peñemuña reta peraɨkue rupigua peguarä;

¹⁰ jare opaete oikove vae ñogüɨnoi pe ndive vae reta: Güɨra reta, opaete mbaemɨmba arca güi oë pe ndive vae güive opaete mbaemɨmba ɨvɨ pegua.

¹¹ Cheporogüɨrökuavee päve ngaraa ye ma aipoepɨ pegüi: Ngaraa ye ma amokañɨtei opaete oikove vae ɨporu guasu pe. Ngaraa ye ma oime ïru ɨporu guasu omboai vaerä ɨvɨ.

¹² Jare jei ye: Kuae kañɨmaa rupi peikuaata morogüɨrökuavee päve ayapo peve vae, jare opaete oikove vae reta, pe ndive ñogüɨnoi vae, kuae oikota jekuae avei rupi:

¹³ Cheyɨɨ añono amapɨtu re, kuae kañɨmaa rupi peikuaata ayapo ko morogüɨrökuavee päve ɨvɨ pegua reta ndive vae.

¹⁴ Ambou yave ɨvɨ iárambo amapɨtu, cheyɨɨ oyekuaata amapɨtu re.

¹⁵ Jayave chemaenduata cheporogüɨrökuavee päve amee peve vae re, jare opaete oikove vae pe. Jare ngaraa ye ma oime ɨporu guasu omboai vaerä opaete oikove vae.

¹⁶ Jökorai yɨɨ oyekuaa yave amapɨtu re, aechata jare chemaenduata morogüɨrökuavee päve jekuae avei pegua ayapo yandeve vae re, jare opaete oikove vae, ɨvɨ iárambo ñogüɨnoi vae reta ndive.

¹⁷ Körai Tumpa jei Noé pe: ‘Kuae ko jae kañɨmaa morogüɨrökuavee päve pegua, kuae añono cheyeupe opaete ɨvɨ iárambo oikove vae reta ndive.’ ”

Noé jare taɨ reta

¹⁸ Noé taɨ reta, arca güi oë vae reta jae ko: Sem, Cam jare Jafet; Cam jae ko Canaán tu.

¹⁹ Kuae mboapɨ reta jae ko Noé taɨ reta. Kuae reta güi oñemuña opaete ɨvɨ rupi.

²⁰ Jayave Noé omboɨpɨ oparavɨkɨ kó pe, jare oñono metei uvarupa.

²¹ Jou vino jókuae uva güi oyeapogüe, osavaɨpo, jare inandi etei oyepɨso oï jo guakapi pegua mbɨte pe.

²² Jare Cam, Canaán tu, oecha tu Noé inandi ko oï vae, jare omombeu tɨkeɨ jare tɨvɨ ikatu pe ñogüɨnoi vae pe.

²³ Jayave Sem jare Jafet oeka reta temimonde, jare oñono reta iyatiɨ re, jare jaɨkue kotɨ oguata reta reve yogüɨraja omboyasoi tu inandi oï vae, ïkotɨa omae reta reve, jökorai mbaetɨ oecha reta tu inandi ko oï vae.

²⁴ Noé okuera ma isavaɨpo güi yave, oikuaa taɨ mbɨte pegua oyapo chupe vae.

²⁵ Jare jei: “¡Cheyepopeyu toï Canaán re! ¡Tembiokuaiasɨ katu toiko tɨkeɨ reta pe!”

²⁶ Javoi jei ye: “CheYa Tumpa iporerekua toiko Sem ndive, jare Canaán toiko jembiokuairä.

²⁷ Tumpa tombotuicha Jafet, Sem toiko o guakapi pegua pe, jare Canaán toiko jembiokuairä.”

²⁸ Noé oiko ye tresciento cincuenta año ɨporu guasu oasa güire.

²⁹ Opaete ara Noé oikove oiko vae noveciento cincuenta año jare omano.