GÉNESIS 8 - Biblia Guarani Tumpa Iñee

Ɨporu guasu iyapɨ

¹ Jare Tumpa imaendúa Noé re, jare opaete mbaemɨmba reta jae ndive ñogüɨnoi arca pe vae re. Jare Tumpa ombou ɨvɨtu ɨvɨ iárambo, jare ɨ omboɨpɨ jagüe.

² Oyeokenda ɨguasu jɨru ɨvɨgüɨ kotɨ jare ama jape oyeokenda vi ara pe. Jare ama opoo.

³ Ɨ jagüe mbegüe mbegüe pe ɨvɨ iárambo güi; jare ɨ opa jagüe ciento cincuenta araa pe ramo.

⁴ Jare arca oguapɨ ɨvɨtɨ guasu Ararat jee vae iárambo chiúa yasɨ re, diecisiete araa pe.

⁵ Kuae jae ko ara tenondegua jókuae yasɨ payandepoa re, ɨ jekuaeño jagüe oiko, jayave etei omboɨpɨ oyekuaa ɨvɨtɨ guasu reta iyapɨte.

⁶ Cuarenta araa pe Noé oipea arca iventana jae oyapogüe.

⁷ Jare omondo metei chucha, kuae ojo jare oyerova mbovɨ ye rupi, opa ɨ tɨpa ɨvɨ iárambo güi regua.

⁸ Omondo vi metei pɨkasu, oikuaa vaerä opa ma ra ɨ tɨpa ɨvɨ iárambo güi vae.

⁹ Jókuae pɨkasu mbaetɨ oväe kia pe oguapɨ vaerä, jare ou ye arca pe Noé oïa pe. Echa jekuaeño ɨ oime ɨvɨ iárambo. Jayave Noé omoë ipo jare oipɨɨ omoinge arca pe.

¹⁰ Oäro ye chiu ara rupi, jayave ramo omondo ye pɨkasu arca güi ikatu kotɨ.

¹¹ Jare pɨkasu ou ye ikotɨ kaaru ma yave; güeru itï pe ɨvɨra olivo jee vae joogüe. Noé oikuaa ɨ opa ma ko jagüe vae.

¹² Ërei oäro ye ïru chiu ara, jayave ramo omondo ye pɨkasu, ërei añave mbaetɨ ma oyerova ye ikotɨ.

¹³ Noé seisciento uno año ma güɨnoi yave ɨ opa tɨpa ɨvɨ iárambo güi, metei ara ma tenondegua yasɨa re. Noé oipea arca jare omae yave oecha opa ma ɨvɨ otini.

¹⁴ Mokoía yasɨ re, veintisiete araa pe opa ɨvɨ otiniasɨ.

¹⁵ Jayave Tumpa omomiari Noé, jei reve:

¹⁶ “Eë arca güi nde jare nderembireko, jare nderaɨ reta jembireko reve reve toë reta nde ndive.

¹⁷ Enoe vi opaete mɨmba reta ñogüɨnoi nde ndive vae: Güɨra reta, jevae reta jare opaete ipɨtía re oguata vae. Jare toyogüɨraja toñemuña reta ɨvɨ iárambo rupi.”

¹⁸ Jayave Noé oë jembireko ndive jare taɨ reta jembireko reve reve ñogüɨnoe jae ndive.

¹⁹ Jare vi opaete mɨmba reta, jare opaete ipɨtía re oguata vae jare opaete güɨra reta, jare opaete ɨvɨ iárambo omɨi vae ñavo oë reta arca güi.

²⁰ Noé omopüa mɨmba oyeyuka oyeapɨ jese vae yandeYa peguarä, jare oipɨɨ mɨmba oyeu vae ñavo güi, güɨra oyeu vae ñavo güi, oyuka omee opaetei oyeapɨ vae Tumpa pe.

²¹ YandeYa oëtu yave ipiche katu mbota, jei ipɨa pe: “Ngaraa ye ma ayepopeyu ɨvɨ re kuimbae jeko pegua, yepe tëi kuimbae taɨrusu güive ipɨa pɨ̈chɨi yae vae reño; ngaraa ye ma amboai opaete oikove vae añave ayapo rami.

²² Oime ɨvɨ oiko ramboeve ngaraa opɨta maetɨ jare mbaarɨvo; iroɨ jare araku, araku guasu jare iroɨ guasu, ara jare pɨ̈tu.”