GÉNESIS 7 - Biblia Guarani Tumpa Iñee

Ɨporu guasu

¹ Jaɨkue rupi yandeYa jei Noé pe: “Eike nde jare opaete ndero pegua reta ndive arca pe. Echa aecha ndeño jupi reguata cheróvai opaete vae reta güi.

² Mɨmba oyeu vae reta güi reiparavota chiu yoayu, mɨmba kuimbae jare mɨmba kuña. Ërei mɨmba oyeumbae reta güi reiparavota metei yoayuño, metei mɨmba kuimbae jare metei mɨmba kuña.

³ Jaeramiño vi güɨra reta güi chiu yoayu, güɨra kuimbae jare güɨra kuña, jökorai jae reta vi oñemuña ye vaerä kuae ɨvɨ pe.

⁴ Echa che amongɨta chiu araa pe, kuae ɨvɨ iárambo cuarenta ara jare cuarenta pɨ̈tu rupi. ¡Jökorai amokañɨteita ɨvɨ iárambo güi opaete oikove vae ayapogüe reta!”

⁵ Jare Noé oyapo opaete yandeYa oyókuai rami.

⁶ Jökorai Noé seisciento año ma güɨnoi yave ou ɨporu guasu ɨvɨ iárambo.

⁷ Jare ɨporu guasu outa vae jeko pegua Noé oike arca pe jembireko ndive jare opaete taɨ reta jembireko reve reve.

⁸ Jaeramiño vi opaete mɨmba oyeu vae reta jare mɨmba oyeumbae reta, güɨra reta vi, jare opaete ipɨtía re oguata vae,

⁹ mókoi mókoi päve oike arca pe Noé ndive; mɨmba kuimbae jare mɨmba kuña, Tumpa oyókuai Noé rami.

¹⁰ Jökorai chiúa ara pe ou ɨporu guasu ɨvɨ iárambo.

¹¹ Noé seisciento año ma güɨnoi yave; mokoía yasɨ re, diecisiete araa pe etei. Jókuae ara osoro ɨguasu jɨru ɨvɨgüɨ güi, jare ara güi oyepɨyere vi ama guasu.

¹² Jare okɨ ɨvɨ iárambo cuarenta ara jare cuarenta pɨ̈tu.

¹³ Jókuae ara etei Noé oike arca pe jembireko ndive jare taɨ Sem, Cam jare Jafet oike reta jembireko reve reve.

¹⁴ Jae reta, jare opaete mɨmba reta ñavo ambuaeyee oyougüi vae, ñana rupigua jare tëta rupigua, opaete ipɨtía re oguata vae jare opaete güɨra ñavo ambuaeyee oyougüi vae.

¹⁵ Yogüeru arca pe Noé ndive opaete oikove vae mókoi mókoi päve.

¹⁶ Yogüeru mɨmba kuimbae jare mɨmba kuña, Tumpa oyókuai vae rami. Jare yandeYa oyokenda öke chupe reta.

¹⁷ Jare okɨ ɨvɨ re cuarenta ara; ɨ omboɨpɨ okuakuaa jare oupi arca; jare arca omboɨpɨ ovevɨi ɨ iárambo.

¹⁸ Jare jeiete oyeupi ɨporu guasu, opaetei oyasoi ɨvɨ; jare arca ɨvate yae ma ovevɨi ɨ iárambo.

¹⁹ Jare ɨporu guasu oyasoi ɨvɨ; opaete ɨvɨtɨ guasu ɨvate vae reta opa vi oyasoi.

²⁰ Ɨporu guasu opa güire oyasoi ɨvɨtɨ guasu, oyapɨraa ye chiu metro rupi.

²¹ Omano opaete oikove vae ɨvɨ iárambo omɨi vae, jökorai vi güɨra reta, jare opaete mɨmba tëta rupigua, jare ñana rupigua, jare opaete ipɨtía re oguata vae, jare opaete kuimbae.

²² Opaete ipɨ̈túe re oikove vae, opaete ɨvɨ ipo omano.

²³ Jökorai opa okañɨtei opaete oikove ɨvɨ iárambo vae: Kuimbae güive opaete mbaemɨmba, jare ipɨtía re oguata vae, jare güɨra reta. Jaeño jembɨre Noé jare opaete jae ndive arca pe oike vae reta.

²⁴ Jare ɨguasu tɨpa raiviä ɨvɨ iárambo güi ciento cincuenta ara rupi.